euskalkultura.eus

Ayacucho, Argentina. Ahalik eta modu onenean itxi du urtea Euskal Odola Ayacuchoko euskal etxeak: lagunez inguratuta eta afari eder bat partekatuz. Urte-amaiera jaia joan den ostiralean izan zen eta azken topa egitean esker beroak adierazi zizkieten erakundeko kideek bildutako jendeari baita “urrun egonda ere gurekin dauden guztiei ere”.

[Ignacio Echeverria euskal etxeko lehendakaria, Olentzeroren azalean, jaiko protagonistetako bat izan zen (argazkiaEE)]

Azken festa honetan jendez gainezka agertutako aretoa, beste hainbat ekitaldiren egoitza ere izan da urtean zehar. Ohikoez gain, soilik azaroan karta-joko lehiaketak, bingoa, herriko Telefono-Aurkibidearen aurkezpena eta mus txapelketa burutu dira euskal egoitzan. Horien artean oihartzun berezia izan zuen bat, Argentina-Mercosur-erako Euskadiren ordezkari Sara Pagolaren bisita izan da. Buenos Aires probintziako zenbait euskal etxetara egindako biraren baitan, Euskal Odolako lagunekin ez ezik, udal mandatari diren Emilio Cordonnier eta Julio Veneroso-rekin elkartu zen Pagola. Ayacucho utzi aurretik, egoitza berriaren obrak bisitatu zituen Euskadiren ordezkariak.

[Udal agintariekin elkartu zen Pagola Ayacuchon, tartean, Emilio Cordonnier-ekin eta Julio Veneroso-rekin (argazkia Ayacucho al Día)]

2013 honetan egindako gauzak ez dira gutxi izan eta oso oinarri sendoa bilakatzen dira datorren urtean ere egitarau sendo bati ekiteko. Gogo eta asmo horrekin altxatu zituzten kopak Euskal Odola-koek topa egiteko momentuan. Festa, ordu txikiak arte luzatu zen 'Cuadrilla Rural' musika taldearen eskutik. Gaua aurrera joan ahala, Olentzeroren opariak eta sariak banatu zitzaizkien gonbidatuei.