euskalkultura.eus

Donostia-San Sebastian. Olentzero, euskal kondairetako ikazkin maitatua, gaur egungo moldeetara egokitu da eta, ederki gainera! Interneten berari buruz azken urteetan sortu diren webguneez gain, aurten nobedade bat agertu da: telefono mugikorrentzako Olentzeroren aplikazioa. Bizkaiko Asoma enpresak sortu du aplikazioa, eta bertan Olentzerori gutuna telefonoaren bitartez idatzi eta bidaltzeko aukera dago.

Olentzeroren jolasa erabiltzea oso erraza da. Lehenik eta behin, aplikazioa deskargatu egin behar da Google Play dendatik. Gutuna idazten hasi baino lehen Olentzerok txikiak ondo portatu diren jakin nahiko du. Ondoren, bost oparien zerrenda betez, gutuna idatzi eta bidali ahalko da.

Eitb.com-ek ere Olentzerori eskainitako Olentzero jokoak webgune berezia sortu du eta bertan aurki daitezkeen baliabideen artean, aipagarriak dira joko animatuak: Olentzerori opariak banatzen lagundu, edo sar zaitez Behekobasoko jostunaren ipuinean. Horrez gain, Olentzerorekin etorri zen panpinaren ipuinaren bideoa ere eskaintzen du. Amaitzeko, webgune honetan Olentzerori gutuna idatzi eta bidali ahal izango diozu.

Azkenik, Olentzero zaleek ikazkinaren omenez sortu duten webgunea aipatu behar dugu: Olentzero.net. Bertan, Olentzerori buruzko joko eta datuez gain, Euskal Herrian zehar ikazkinak egiten dituen bisita eta ekitaldien argazkiak biltzen dira. Eta www.izenaduba.com eta Olentzeroren Etxea, ahaztu gabe, Bizkaiko Mungian.

(Beste webgunerik ezagutzen baduzu, idatz ezazu iruzkina eta zerrendan jasoko dugu)