Bartzelona, Katalunia. ‘‘Ozen i Fort’ du izena Euskal Herriaren eta Kataluniaren arteko loturak bultzatu nahi dituen Musika Bulegoa elkartearen proiektuak. Proiektuak egonaldi artistikoa eskaintzen die bi artistari, bata Euskal Herrikoa eta bestea Kataluniakoa. Egonaldian zehar eta elkarlanean musika-lan berri bat sortu behar dute eta bukatutakoan publikoaren aurrean aurkeztu. “Egonaldiak bi lurraldeetako musikarien arteko loturak sustatzea du helburu, gaur egun programarik eta espaziorik ez dagoen testuinguru batean”, dio deialdiak.
Eskaintzak bi fase nagusi ditu, eta biak Bartzelonan, Fabra i Coats-Fàbrica de Creació egoitzan egingo dira. Lehenengoa ekainaren 13tik 26ra burutuko da. Euskal artistak artista katalan batekin batera, sortze-prozesuari ekingo dio, garapen artistikoa eta lehen entseguak eginez. Bigarren zatia, urriaren 22tik azaroaren 10era, eta epe horretan prestatzen segitu eta azken erakusketa Bartzelonako lehen mailako areto batean egingo dituzte. Bi egonaldien artean, irailean, showcase formatuan aurkeztuko dute bi artistek beren sormenaren emaitza, estatu mailako azoka profesional batean. Prozesuan aholkulari arituko da Bartzelonako Euskal Etxea.
Parte hartzeko baldintzak
Deialdia Euskal Herrikoak diren edo bertan bizi diren euskal sortzaile, jotzaile edo musikagileei (bakarlariak nahiz taldeak) dago zuzenduta. Hautagaiak musikari profesionalak edo semiprofesionalak behar dute izan, fakturatzeko gai eta Bartzelonan egonaldia egiteko gai. Hautatze prozesuan artisten ibilbidea, proposamenaren kalitatea eta artista katalanarekin elkarlanean aritzeko gaitasuna hartuko dira kontuan. Egonaldiaren baitan bidaia, ostatu eta otorduen gastuak sartuko dira, baita 1250 eurotako ordainketa ere.
Interesatuek formulario hau betez eman dezakete izena, xehetasunak MusikaBulegoa.eus-ean. Izen-ematea apirilaren 10era artekoa da.
Lagun bati bidali
Komentarioa gehitu
