Aurrez aurre arituko diren taldeak zeintzuk diren ez da “martxo bukaerara arte edo apiril hasierara arte” jakingo, antolakuntzako kide Argia Beristainek EuskalKultura.com-i adierazi dionez. Europako aldetik, Espainiako lehenengo dibisioko bat izatea espero da. Edozelan ere, norgehiagokari buruzko informazio garrantzitsua topatuko dute interesatuek webgunean, “tartean, ekitaldia nola babestu edota zelan diruz lagundu”.
Boise, AEB. Superbowl-aren webgune ofizialak bezala, Basque Soccer Friendly-ko webguneak atzera-kontu handi bat du hasierako orrian. Egunak, orduak, minutuak, segundoak, uztailaren 29ko arratsaldeko 18:00etan lagunarteko futbol partida hasiko den arte. Boise State University-ko Albertsons Estadioan izango da norgehiagoka.
Euskaraz, ingelesez zein gazteleraz irakurri daitezke webguneko artikuluak. Hala nola, partiduaren inguruko informazioa, proiektuaren nondik norakoak –Basque Studies Foundation eta Idaho Youth Soccer Association elkarteak ezagutzera emateko antolatu dute, bai eta hainbat beka sortzeko ere− eta joko zelaiari buruzko datuak. Horrez gain, gastuei aurre egiten lagunduko duten diru laguntzak jasotzen ari dira orain, eta horren inguruko informazioa ere lor daiteke bertan.
Web atarian eskegiko duten informazioa emailean jasotzerik ere bada eta e-posta zerrenda sortu dute horretarako. Prebisioak egiten lagunduko dio honek antolakuntzari ere, ikusle kopurua eta eguna nola planteatu aldera.
Prentsa ohar baten bidez adierazi duten legez, erregulartasunez eguneratuko dute webgunea, taldeen inguruko informazioa emanaz, sarrerak non eta noiz eskuratu azalduz, aurre-salmentarako aukerak eskainiz eta, oro har, norgehiagokaren inguruko guztiaz informatuz.
Argitara eman duten azken berriaren arabera, FIFAko arauak jarraitze aldera, belar berdea jarriko dute Boiseko Albertsons Stadium-eko zelai urdinaren gainean. Gerora, gainera, berdegune hori Udalari emango diote bi futbol zelai berri egiteko.
* Babesle izan nahi izatekotan hurrengo helbidera igorri emaila: argia@basquesoccerfriendly.com.
* Informazio gehiago: info@basquesoccerfriendly.com, Facebook eta Twitter @BasqueSoccer.