euskalkultura.eus

Bilbao, Bizkaia. El Correo egunkariak argitaratu zuen berria eta, harrezkero, bolo-bolo dabil Mexiko eta AEBetako Athletic-en zaletuen artean. Talde bizkaitarrak jarraitzaile asko ditu bi herrialde hauetako euskal Diasporan, eta ilusioz hartu dute denboraldi amaieran taldea ikusteko aukera. Antza, taldeak hiru lagunarteko partida jokatuko lituzke: Mexiko DFn, New Yok-en eta AEBetako beste hiri batean.

EuskalKultura.com Athletic-ekin harremanetan jarri da eta taldeak onartu du Espainiako Ligak proposamena helarazi diola, baina momentuz ez duela beste ezer esatekorik. Taldearen helburu nagusia une hauetan aurtengo denboraldi bikainarekin jarraitzea omen da eta horretara bideratuko du Athletic-ek ahalegin guztia. Talde zurigorria laugarren postuan sailkatua dago momentuz, horrela jarraituz gero Champions League delakoa jokatzeko aukerarekin.