euskalkultura.eus

Korrika 19 martxoaren 19tik 29ra bitartean egingo da Euskal Herrian, baina Diasporan euskaldunak irrikaz ziren nonbait, eta ekitaldiak asteburu honetan bertan hasiko dira. Aurrenekoak, Parisen eta AEBetako Newport hirian egingo dira, larunbat honetan bertan. Ondotik etorriko dira Edinburgh, Tolosa (Frantzian), Lima, Bartzelona, Madrid, Cancun eta Valentzia, besteak beste.

Donostia-San Sebastian. Badator Korrika, bai behintzat Diasporako euskaldunen artean, zenbait euskal etxek asteburu honetan bertan ekingo baitiote euskararen aldeko lasterketari. Aurrenekoak Paris eta New Englandeko euskal etxeak izango dira, larunbatean bertan. Jarraian, Diasporan egingo diren zenbait lastekerten datak eta egitarauak:

-Paris, martxoaren 7an: Korrika 19 antolatzen buru-belarri ibili dira Pariseko Eskual Etxean eta festa itzela egingo dute. Lasterketa Montmatre-eko Sacré Coeur eliza ezagunean hasiko da, eta Euskal Etxean amaituko. Ondoren, trikipoteoa auzoan, erromeria euskal etxean eta DJak goizaldeko ordu txikiak arte.  

-Newport (AEB), martxoaren 7an: Goiz hasi diren beste batzuk, New England Basque Club elkartekoak dira. Newport herrian bilduko dira eta lasterketa egingo dute KIing Park gunean, portu ondotik doan bidexka ederrean barrena. Ondoren, familia afaria herriko jatetxe batean.

-Tolosa (Frantzia), martxoaren 14an:  Tolosako euskaldunek Korrika 19 dela eta hainbat ekitaldi antolatu dituzte. Hitzordua Capitolen dute egina, 11:00tan. Eguerdian, 14:00tan, piknika egingo dute Dauraden eta 16:00tan Korrika abiatuko da Capitoletik.

-Edinburgh (Eskozia), martxoaren 14an: Edinburgoko euskaldunek berriz ere Korrikari ongi etorria egingo diote (Korrika 17rekin ere egin zuten ekitaldirik). Egitarau zabala prestatu dute: 10:30etan Korrika, Edinburgo erdialdetik, Royal Mile-etik abiatuta, Gaztelura igo eta Meadows parkean bukatuz. Ondore, herri kirolak Meadows parkean, babarrun-jana, zozketak eta kantuak. Arratsalde partean, Euskal Ceilidhs, eta amaitzeko, Punk Rock kontzertua.

-Lima, martxoaren 15ean: Limako euskaldunek goizeko 10:30tan dute hitzordua, Miraflores auzoan. Lasterketa malekoiko itsasargitik hasiko da eta Parque del Amor delakoan amaituko. Ondoren, jaiak Euskal Etxean jarraituko du eta han mus partidak eta txikientzako herri kirol jokoak egingo dira. Bazkaria 14:00tan hasiko da eta hortik aurrera, bazkalondoa eta festa!