euskalkultura.eus

Buenos Aires, Argentina. "Bahiketa", "Secuestro" izenpean, gaztelaniara itzulitako laugarren eleberria du Asel Luzarragak, aurkeztu berria orain Buenos Airesko Euskaltzaleak-en, Lauburu argitaletxea Argentina argitaratzaile. Liburuaren egilea Zoom bidez izan zen aurkezpenean, eta Euskaltzaleak elkarteko kide Alfonsina Leranozek egin zuen bere aurkezpena. urriaren 4an, ostiralez. Euskal idazle eta itzultzailearen lagunak, irakurle eta jarraitzaileak, eta euskara ikasleak bertaratu ziren eta bat egin zuten elkarrizketarekin. Argentinako Ediciones Lauburuko arduradun Nicolas Chaves editorea ere bertaratu zen.

"Buenos Airesko La Hoz egunkarian luzetsita daude, Matxinen artikulua iristen ez delako. Ez artikulua, ez Matxin bera. Haren inguruko berririk ez dagoela jabetzean, alarmak piztu zaizkio Eduri, lagun mina baitu; Euskal Herritik ihesi alde egin zuenean, Matxinek lagundu zion Argentinara. Bizi-bizi ari da Eduren burua, arriskuak ez baitira gutxi: ultra-eskuinak bahituko al zuen laguna, edo zerbitzu sekretuek? Nongotarrek, baina? Edo Euskal Herrira itzultzea erabaki ote du, berari ezer esan gabe? Sortuz gero inoiz desagertu ez diren beldurrak, mamuak, kontzientzia txarra, eldarnioak… Guztiak hasi dira dantzan Eduren baitan, bizitokiaren eta sorterriaren, iraganaren eta orainaren, errealitatearen eta fantasiaren arteko espiral zoro batean. Bahituta nor edo zer egon den ez jakiteraino", aurkezten dute liburua jatorrizko euskaraz.

Buenos Airesen jatorria duen nobela

"Apunte asko hartu nituen Buenos Airesen bizi izan nintzen bost urteetan, han nengoela, azkeneko egunetan, hasi nintzen idazten, eta hemen amaitu nuen, baina sortu Buenos Airesen sortu zen eta hor elikatu, Buenos Airesen bizi izandako bizipenetatik", dio idazleak "Bahiketa" ren idazketa-prozesuari buruz. Nobelaren egituraz, "lisergiko samarra (da), beti gustatu izan zait perspektibarekin jolastea, pertsonaiarengandik urruntze eta hurbiltzeekin, lehen pertsonatik irten eta kanpotik ikusi ahal izatea, izan ere editoreek, batzuetan, galdetu izan didate ea okertu al nintzen", dio Asel Luzarragak, berezkoa duen umorearekin. “Konplexutasun pixka bat izan dezake, baina, aldi berean, azaleko irakurketa bat onartzen du, lehen irakurketan harrapatzen duzunarekin erraz goza dezakezu”, gaineratzen du.

Jatorriz "Bahiketa" izenburupean, eleberriaren lehen edizioa 2020koa da, Txalaparta argitaletxe nafarrak argitaratua. Gaztelaniazko lehen edizio honek, egileak bera itzultzaile, Lluís Ràfols diseinatzaile eta ilustratzaile katalanaren ilustrazio bat darama azalean. "Bahiketa" liburuak $ 15.000ko prezioa du eta Buenos Airesen Euskaltzaleak elkartetik pasatuz eros daiteke, Bernardo de Irigoyen 826 helbidean, CABAn (euskaltzaleak@yahoo.com.ar; IG: idiomavasco; FB: euskara); baita Ediciones Lauburun ere (IG: edicioneslauburu; FB: Ediciones Lauburu, edo mail bidez, edlauburu@gmail.com helbidera idatziz) edo honako liburudendetan: Zivals, Sudestada, Del Pasaje eta La Libre.