euskalkultura.eus

Arrecifes, Argentina. Joan den abenduaren 20an beste urte bati agur esan zioten Euskaldunak Denak Bat Euskal Etxeko kide eta lagunek. Arratsaldeko zazpiak aldera,  egoitzako 'Haritzaren Patioa' gunean, Renzo Bustos eta Juan Ignacio Sáez Abarrategui dantzariek “Aurreskua” dantzatu zioten euskal etxeko lehendakari Marilyn Bóveda Aldazabal-i. Ohorezko dantza honekin festari hasiera eman zitzaion. Ondoren, Etxeko dantza talde guztiek euren koreografiak aurkezteko aukera izan zuten.

Ugarritzak-ekoek “Fandango”, “Arin-Arin” eta “Orbaizeta” eskaini zizkioten bildutako jendeari. Jarraian, Marianela Rimini, Miguel Garcia Bernaus eta Renzo Bustos-en eskutik txikienak igo ziren oholtzara “Orpo punta”, “Mari Balentxi” eta “Ikurrinarena” egitera. Teresa de Zavaleta irakasle, nerabeen taldeak dantzak, dokumentalak eta antzerkia batuz, ikuskizun bat prestatu zuen aurtengo jairako: antzinako emakumeen omenez, lihoa egiteko prozesu eta aldi berean ezkontzarako bideko prozesuari buruzko lau zatiko antzezlana egin zuten talde honetako neskek. Lehenengoan, Baserrian izenekoa, neskak baserriko lanak egiten ikusi ahal ziren; bigarrenean, Zelaian, lurra lantzen zuten bitartean abesten zuten; hurrengo eszenan, Plazan, neska batek bere mutila ezagutu eta “Jaurrieta dantza”, “Fandango” eta “Arin-Arin” interpretatu zituzten; eta bukatzeko, Ezkontzan izeneko zatian, ezkontza bera antzeztu zuten eta “Lore Arku” dantzatu.

[Euskal Etxeko "Txiki Zaharrak" Taldea (argazkia EE)]

Dantzaldiko azken taldea Txiki Zaharrak izan zen. Victoria Saez Abarrateguiren gidaritzapean, Etxeko lagun helduenek osatutako taldeak, kolore biziko arropaz jantzita, “Lantzeko Inauteria” eta jauzi bat egin zituzten. Erakustaldia bukatuta, jaia luzatu zen ordu txikiak arte.

Urte berriari begira, webgune berria

Beste alde batetik, Euskaldunak Denak Bat euskal etxeko kideek pasa den astean abiatu dute elkarteko webgune berria. Orrian, erakundearen historia, ekintzak, egutegia, argazkiak, kideen informazioa, berriak eta beste datu batzuk eskura daitezke. Nahiz eta baliabide batzuk oraindik amaitu gabe egon, nahi duenak bisitatu ahal du helbide honetan: www.centrovascoarrecifes.com.