euskalkultura.eus

Mar del Plata, Argentina. Ez da hau batere Mar del Platan ikastolen alde antolatzen den lehenengo jaia, aurretik ere urtero antolatu izan baitira Euskal Herriko lurralde bakoitzeko ikastolen jaiekin bateginik jai paraleloak, Herri Urrats, Ibilaldia, Araba Euskaraz, Kilometroak eta Nafarroa Oinez izenekin. Oraingoan, ordea, oro har Ikastolaren aldeko jaia izan da, bertatik, Diasporatik, 'harri koskor' bat, hondar ale bat, bidali nahirik Euskal Herrira, Mar del Platako haur eta gaztetxoen indarraz.

[Ertaineko taldeko kide batzuk sustatzaile eta lguntzaileekin, egindako artelanaren ondoan]

"Gure haurrek auzolanaren indarra senti dezaten nahi dugu, euskara eta euskal kulturaren bidez Euskal Herriko parte senti daitezen". "Eurek hemendik ekar dezaketen harri koskor hori, hondar ale hori, zinez garrantzitsua dela sines dezaten nahi dugu, eta festa hau medio gauzatu dugu hori, aurrerantzean festa hau urtero egitea baita geure asmoa", adierazi diote EuskalKultura.com-i.

[Jokoen artean, sokatira klasikoa]

[Jolasak, jokoak, kantuak eta gainerakoek partaidetza giro polita sortu zuten]

Antzerkia Euskal Herria eta Mar del Plata lotuz

'Harri koskorra'ren lehenengo edizio honetako egitaraua larunbatean arratsaldeko ordubi t'erdietan hasi zen. "Ospakizunaren gaian sartzeko, Mar del Platako Euskal Etxeko txikiek, euren dantza zuzendarien eta euskara tailerreko irakasleen laguntzaz, antzerki moduko bat prestatu zuten Herensuge pertsonaia mitologikoari buruz [izan ere herensuge bat izan baitzen festako logoa], euskal kulturako zenbait gai bertako Euskal Etxearekin lotuz".

[Eta ta-txaaaan: Lautaro magoak ere lan bikaina egin zuen]

Izan ere, Beti Alai dantza taldeko txiki eta ertainek elkarrekin lan egin zuten erakusketa bat prestatuz. Ertain bakoitzak lan bat aurkeztu zuen banaka, 'Zer esan nahi du euskal kulturak zuretzat' gaitzat harturik. Lan hau librea izan zen eta sinboloak erabiliz azaldu zuten, Azoka gisa egituratuta: honela aurkeztu ziren, besteak beste, euskal mitologia eta magia, pilota eta bere modalitateak, ikastolei buruz prestatutako power-point bat, eta beste batzuk."

[Haur, gaztetxo, irakasle, guraso eta guztiek arratsalde ederra pasatu zuten, jolasean euskara eta euskal kulturaren inguruan]

Euskal giroko jolas eta jokoak

Afixa bat ere ipini zen, ekitaldiko partaide ziren helduek ere 'Zer esan nahi du zuretzat euskal kulturak' galderari erantzun ziezaioten, horri buruzko euren gogoeta eta sentipenak azalduz.

Geroago taldeak eratu ziren, adinaren arabera, eta herri kirolak antolatu (sokatira, txingak...) eta kantuak kantatu (Gora-behera, Pintto-Pintto...), beste zenbat ekimen didaktikorekin batera, "bukatuz txiki eta ertainek elkarrekin egin zuten aktibitate plastiko batekin, esan nahi baita festako logo erraldoi bat koloreztatuz".

Elkarrekin partekatutako askari batekin amaitzeko

Arratsaldeko seiak aldera, Mar del Platako lehenengo ikastolen festak askari parteari eman zion bidea, Euskal Etxeak eskainita.  Partaide bakoitzak joko didaktiko bat jaso zuen, bereziki aukera honetarako euskal kulturari buruzko jakingarriez hornituta, eta festako logoaren marrazki batekin, hala nahi izanez gero etxean margotzeko.

Festa eta arratsaldepasa osoa auzolan izpirituz ideiatu bazen ere --haur, gaztetxo eta helduetako bakoitza partaide eta protagonista-- azpimarratzekoa da irakasleek garatutako lana. Maite Ariznabarreta, Nerea Balzola Aguilera eta Milagros Pandolfo behar dira aipatu hor, Graxi Bakker, Adriana Hernandorena eta Monica Usubiaga lankide. Euren ahaleginak, Denak Bateko eta bertako gizataldeko gainerako kideenekin batera arrakastatsu bilakatu zuten lehenengo 'Harri koskorra' hau. Bigarren edizioa hurbilago dago orain. Zorionak!