euskalkultura.eus

Artigas Kanpamentua, Colonia, Uruguai. Eguraldi bikaina lagun izan zen Uruguaiko Euskal Erakundeek Federazioak, FIVUk, otsailaren bigarren aste honetako lau egunetan zehar egin zuen haur eta gazteentzako topaketan.

Otsailaren 5ean, ostegunean, hasi eta otsailaren 8a, igandera arte, luzatu zen topaketa. Bertan 50 bat neska-mutilek joko, dantza, kirol eta hondartzaz gozatu ahal izan zuten euskal etxeetako bazkide eta zuzendariekin batera. Aurtengoan Carmeloko Ibai Ondoko Etxea euskal elkartea izan zen udalekuaren antolatzailea. Egitasmoaren helburua gazteen arteko harremanak estutzea zen, aldi berean euskal kultura ezagutzeko edo kultura honen barruan aisialdiaz gozatzeko aukera emanez.

[Jokoak hondartzan]

[Giro bikaina]

Bi hitzaldi egin ziren aurtengo Udalekuan. Batean Aitor Alava dantza irakasleak 'Euskal Dantzaren historia' gaia izan zuen hizpide. Besteak 'Euskal Herriari buruzko orokortasun batzuk' zuen izenburua eta Enrique Poittevin, Montevideoko Haize Hegoa Euskal Etxeko zuzendari eta bolondresa, izan zen hizlari.

Dantza lantegiak gauean egin ziren, afalostean, eta goizaldeko ordu txikiak arte iraun zuten, dantzari sutsuenen ekinari esker. Gazteek udalekuko ibaian arraunean ibiltzeko aukera izan zuten eta ausartu zirenak ibaiaren gainetik 'tirolinatan' igaro ziren. 'Ia denek hasierako beldurra gainditu eta animatu egin ziren azkenean', azaltzen diote EuskalKultura.com-i FIVU arduradunek.

[Ikasi eta jolastu: Euskal Herriari buruzko mintzaldi orokorra  Enrique Poittevinek emana]

[Dantza lantegian polka, fandango eta arin-arin dantzatu zituzten]

[Musika zuzenean, uruguaiar trikitilari eta panderojoleekin: Marcos eta Edgardo]

Neska-mutilek futbol eta volley partidak jokatu zituzten eta 'Altxorraren bila' izeneko jokoa ere egin zuten, udalekuko zuzendariek antolatuta. Jokoak 'arrastoen bila jarri zituen denak eta jakinminak airean izan ziren altxorra aurkitu zuten arte'. Hala ere, aipatu beharra dago ikasle zein irakaslek gehien disfrutatu duten unea 'hondartzan egin ziren jokoak eta Río de la Plata-n hartu  zituzten bainuak izan zirela'.

[Abentura eta guzti]

[Adiskide berriak su ondoan]

Azken gauean sutzarra egin zen eta haren inguruan dantzan eta jolasean aritu ziren gazteak, horrelako topaketetarako aparta den Gazte Kristauen Elkarteko Campamento Artigas-en, Colonia Departamentuan. Parte hartzaileen gogoa eta ekimenaren arrakasta argi gelditu ziren azken egunean agur esateko unean izan ziren negar malkoekin.

FIVUren Udalekua posible egin dute beste behin ere FIVUk eta bertara atxikitako euskal etxeek, eta baita ere parte hartu zuten gazteek eta euren familiek. Ekimenean zuzenean parte hartu zuten begirale, irakasle eta arduradunak honakoak izan ziren: Montevideoko Haize Hegoako kideak, Carmeloko Ibai Ondoko Etxea elkartekoak eta Uruguaiko Rosarioko Gure Etxea elkartekoak; Andrea Bella García, Mariel Fernández Antasánchez, Karina Fernández Artasánchez irakasleak eta Marcos Tiscornia laguntzaileak (larunbatetako ikastolako arduradunak), Viviane Adduino dantza irakaslea (Maite Bengoa kideak ezin izan zuen parte hartu bere ama, Alex Tejería, operatu egin behar izan zutelako, Montevideon osatzen ari da), Daniel Inthamoussu; Julian Ariztia, FIVUko idazkaria; Aitor Alava, dantza irakaslea, Adrián Cis Leiza eta Martha, Dinora Bonilla eta Gimena Corales [inor ahaztu baldin badugu, idatzi hona mesedez].

Argazki erreportai osoa, hemen (lehenengo irudian klik egin eta ondoren beheko zenbaki zerrendan).