euskalkultura.eus

Belfast, Irlanda Iparraldea. Aurten ere ari dira Belfasteko euskaldunak Bertso Dinner-a (bertso-afaria euskal-irlandar estiloan) antolatzen. Hitzordua apirilaren 30ean izango da eta Amets Arzalluz eta Andoni Egaña ariko dira bertsotan. Laugarren edizioa izango da aurtengoa eta gero eta lagun gehiago ari da biltzen: lehen urtean, 2008an, Fredi Paia eta Arkaitz Estiballes aritu ziren eta 50 bat lagunek hartu zuten parte. Iaz, Maialen Lujanbio eta Jon Maia izan ziren kantari, eta 114 lagun bildu ziren afarira.

Bertso Dinner-eko antolatzaileek bertan parte hartu nahi dutenei afarian izen-emateko epea irekita dagoela jakinarazi nahi izan diete. Urtero leku guztiak bete egiten omen dira eta, EuskalKultura.com-i azaldu diotenez, interesa duenak hobe du lehenbailehen lekua hartzea. Dagoeneko 54 lagunek eman dute izena.

Erreserba egiteko idatzi e-maila bertsodinner@gmail.com helbidera, bertan aipatuz etorriko direnen izen-abizenak, telefono zenbakia eta helbide elektronikoa bidali.

Antolatzaileek Facebooken orria egin dute, eta bertan jarraitu ahal izango dira afariaren berriak: www.facebook.com/bertsodinner

-Low cost hegaldi bilatzailea Biarritzetik eta Bilbotik.
-Iazko Bertso Dinner-eko saioa Hitzetik Hortzera programan.