euskalkultura.eus

Ongi etorria eman eta lehenengo hitzak kendu dizkiogu. Etxepare Euskal Institutuak bultzatzen duen proiektuari jarraipena emanez, aurreko taldeekin segitu eta berri bat ere hasiko du, neguko oporraldia bukatu eta gero. Ane Arandia Morgaetxebarria bizkaitarra da, eta Argentinaratu aurretik AEKn aritu da irakasle. Hau ez du, ordea, lehenengo kontaktua euskal argentinar diasporarekin; izan ere Bahia Blancako ‘Hurbildu’ programan parte hartu zuen 2015ean.

Sabrina Otegi / Buenos Aires, Argentina. Hamar urte beteko ditu aurten, Eusko Jaurlaritzako Etxepare Euskal Institutuak eta La Platako Unibertsitate Nazionalak sinatutako lankidetza hitzarmenaren baitan sortutako Euskara eta Euskal Kultura Irakurletzak. Proiektua bizi bizirik dago eta oso aukera ona da arlo akademikoan euskara eta euskal kulturari buruzko eskolak hartzeko.

Ekainetik, eta Dani Oiarbide aurreko irakurleari lekukoa hartu eta gero, Ane Arandia Morgaetxebarria da eskolen arduraduna. Ane getxoztarra da baina txiki-txikitatik Arrankudiagan bizi da. Gasteizen Euskal Ikasketa gradua ikasi ondoren Euskal Hizkuntzalaritza eta Filologia Masterra egin zuen Euskal Herriko Unibertsitatean. Orain, eta bigarren seihilekoko programa hasi aurretik, EuskalKultura.com-ekin solastu da bere lehenengo inpresio eta gogoetez.

-Zein zen zure asmoa Argentinara etortzea erabaki zenuenean?
Etxepare Institutuak zabaldutako deialdia ikusi nuenean ez nuen zalantzarik izan eta izena eman nuen. Euskal diaspora barrutik, hurbildik, ezagutu nahi nuen, hainbeste kilometrora Euskal Herriarekiko sentimendu eta jakin-mina zein eratara bizi den ezagutu, eta euskara irakatsiz nire ekarpen txikitxoa egin nahi nion euskal diasporari.

-Ezagutzen al zenuen Argentina? Zer zenekien Argentinako Euskal diasporaz?
Duela hiru urte Argentinara etortzeko aukera izan nuen, Bahia Blancako Euskal Etxean antolatu zuten "Hurbildu" proiektuan parte hartzera. Bertan lehenengo aldiz izan nuen euskal diasporaren berri. Esperientzia harek asko harritu-hunkitu ninduen. Euskal Herritik hain urrun egonagatik sentimenduen bizitasuna suma daiteke. Euskaldunok mendeetan zehar, arrazoiak anitzak tarteko, gure herriak utzi eta urruneko lurraldeetara joan behar izan dugu. Euskal Herritik urruti gure kulturak bizirik dirauela, gordetzeko ahalegin handiak egiten dituztela ikustea... zirraragarria da, ez dago hitzik azaltzeko. Esperientzia horretatik aurrera diasporaz informazioa heltzen hasi zitzaidan, Bahia Blancako lagunen bidez, sare sozialei esker...

-Zer aurkitu zenuen hemen, lehen eta orain?
Alde batetik harritu egin ninduen euskal kulturak zer nolako presentzia duen Argentinan. Hunkigarria da etxetik hain urrun egonda ere, batzuetan nola dirudien Euskal Herrian gaudela. Beste alde batetik, heldu nintzenean txunditu egin ninduen jaso nuen harrerak. Jende askok laguntza eskaini dit eta oso eskertuta nago. Laguntzeko prestutasuna asko eskertzen da. Alde horretatik Dani Oiarbidek asko lagundu zidan bai klaseen dinamikarekin lotutako aholkuak emanez bai eguneroko bizitzarako baliagarriak diren gauzak esanez.

-Zein da irakurletzako gaurko egoera eta zeintzuk dira asmoak urte osorako?
Irakurletzaren klaseak ekainaren 7an hasi ziren eta orotara 30 bat ikasle daude.

Aurtengo helburua euskara eta euskal kultura hedatzea izango da. Klaseetan euskara landuko da batez ere, baina euskal kulturari eginiko erreferentziak etengabeak izango dira, bi kulturen arteko konparazioak uneoro egingo dira, eta euskal kulturako zutabe nagusien berri ere emango dugu. Taldeen antolaketari dagokionez, orain arte hiru talde egon dira eta abuztuan talde berri bat hasiko da, zerotik hasiko direnena.

Ordutegiak hauek dira: lehen urratsa, asteartetan, 16tik 18etara; tarteko maila, ostegunetan 17etatik 19etara; eta maila aurreratua ostiraletan 18:30etatik 20:30etara. Talde berriaren ordutegia abuztuan jakinaraziko dugu.

-Noiz arte geratzeko asmoa duzu?
Momentuz abendura arte egongo naiz. Postua hiru urterako da, baina urtez urte berritu beharra dago. Horregatik aurrerago, berritzeko garaian, erabakiko dugu jarraitu ala ez. Ni gustura eta oso eroso nago, baina goizegi da zer erabakia hartuko dudan esateko.

-Ezagutua duzu La Platako Euskal Etxea?
La Platara heldu nintzenean ezagutu nuen lehenengo lekua Euskal Etxea izan zen. Dani Oiarbideren agurra eta nire ongi etorria ospatzeko “errekia” prestatu zuten ni heldu eta ondorengo egunean. Ordutik aurrera hainbatetan hurbildu naiz Euskal Etxera, jai giroan batez ere (paella lehiaketan, San Fermin egunean...) baina bertan euskal ekitzak aurrera eramateko asmoa dut. Pasa den uztailaren 8an, esaterako, Mintzodromoa burutu genuen Euskal Etxeko irakasleen eta irakurletzakoen artean. La Platako Euskal Etxeko bazkidea naiz era harreman polit eta oparoa izatea espero dut.