euskalkultura.eus

Elizondo, Nafarroa. Egun zinez ederra pasatu zen iragan igandean Baztango Elizondon, Ameriketan artzain izan zireneri eskainia. Aitzineko urteetan Sunbillan, Lesakan, Aldude eta Gernikan egin bezala, aurten Baztanen egin da amerikanoen ohoretan antolatu besta hau, andana bat jende bildurik eta Ameriketan euskaldunek zeramaten bizimolde eta ohidurak bilduz eta erakutsiz. Eguna goizeko hamarretan meza nagusiarekin hasi zen Elizondoko Santiago elizan, ondotik kabalkada bat egin zelarik, gisa amerikanoko zaldi gaineko bakeroak, sorry, artzainak, buru.

 [Hamaikak jo ondoren arkupea mezatik jalgi zen jendez eta bertzela ere hara bildutakoez betetzen hasi zen]

 [Bildu ere, jende frango bildu zen, partaideak eta baita ere, bidearen bi alboetan, ikusle frango ere. Nork Baztanen ez dauka oseba bat Ameriketan?]

 [Kabalkadako gidari, elizatik artzain kanpamendura, zaldi gainean, Arantzako Jesus Mari Lujanbio, Lesakako Migel Almandoz, Oronoz-Mugairiko Jose Javier Agirre eta Legasako Jose Antonio Andiarena]

"Euskal Sheep Camp" izeneko kanpamendu bat propio eraiki zen Elizondon, eta meza bukaturik, hameka orenetarik goiti ehundaka amerikano eta heien ahaideak bildu ziren hara. Gehientsiak, bistan da, urte batzuk Wyoming, Arizona, Utah, Kalifornia edo Nevadako bazterretan lan egin eta gero, egun Euskal Herrian bizi direnak, baina baziren tartean Ameriketarik helduak ere, hala nola beste anitzen artean Pettan Osinalde lasarra, Jose Luis Urrutia mezkiriztarra, Manuel Villanueva Los Angeles-etik heldua edota, Mexikotik, Juanjo Arrieta eta bere emazte Mari Carmen Arrechea, azken hauek ez artzainak baina bai beste molde bateko euskaldun amerikanoak, Juanjo baztandarra eta Mari Carmen Mexikon sortu baztandarren alaba.

 [Euskal artzainen kanpamentuari itzulia, bideoan]

 [Arizonako euskaldunen berri ematen dauku bideo huntan Jesus Jorajuria sunbildarrak]

[Ezkerrean, Henri Oçafrain bankarra, anitz urtez San Frantziskon bizi izan zena eta egun Donibane Garazin bizi dena; eskuin, Pettan Osinalde lasarra, Kaliforniako Fresnon bizi dena eta aste batzuendako Euskal Herrian dena, bere arreba alboan]

 [Kaliforniatik etorririk baita ere, ezkerrean Jose Luis Urrutia mezkiriztarra, Ventura County Basque Club-eko lehendakaria eta beti lanean ari den gizona; eskuin, Los Angelesen bizi den Manuel Villanueva, muslari aparta, hau ere bisitan Euskal Herrian, Bartzelonako Mundu Mus Txapelketan arizan ondoren]

 [Mexikoko euskaldunen ordain edo ordezkari, Mari Carmen Arrechea Mexikon sortu baztandarren alaba; eta haren senarra Juanjo Arrieta, Euskal Etxeko sukaldean abila dena, eta urte guziz Olentzeroz jantzi eta Euskal Etxeko haurrer opariak ematen diena]

Lehenengo partearen azkena