euskalkultura.eus

Aiko Taldea Euskal Herriko dantza tradizionalaren hedapena bultzatzen duen musikari eta dantza maisu taldea da. Hil honetan Nafarroako, Gipuzkoako eta Bizkaiko zenbait herritan ibiliko dira, erromeriak eta dantza tailerrak eskaintzen. Sei herri bisitatuko dituzte: Iruñea, Berastegi, Errenteria, Markina-Xemein, Arrigorriaga eta Ispaster.

Donostia-San Sebastián. Aiko Taldeak San Fermin jaietan abiatuko du Euskal Herriko bira hau, Iruñean egingo duen Dantzaldi Erromeria batekin. Taconera-Vistabellako euskara jardueren gunean (Oinez Txokoa) izango da eta bertan dantza herrikoien koreografia tradizionalaren oinarriak irakatsiko dituzte, beti ere, gozamen eta dibertsio giroan.
 
Ostiralean, uztailaren 17an, Berastegin doako dantza tailerra egingo dute Udaletxeko Erabilera anitzeko Aretoan. Herri honetan erromeria egingo da abuztuaren 9an, beraz, horretarako ikasteko une egokia izango da. Tailerrean erromerian egingo diren dantzak ikasiko dira, Irune Arrizubieta irakasleak gidatuta.   Tailer horretan parte hartzeko interesa duten pertsonek informazio gehiago eska dezakete
bulegoa@aikotaldea.eus helbide elektronikoaren bitartez edo 634 423 539 telefono zenbakira deituz.
 
Hurrengo egunean, uztailaren 18an, Errenteriaren txanda izango da, beste Dantzaldi batekin. Ekimen horren bitartez Aiko Taldeak bat egin du Ereintza Dantza Taldeak 14 urtetatik hona Gipuzkoako herri horretan antolatzen duen Erromeri Egunarekin.
 
Azken hiru dantzaldiak Bizkaian egingo dira. Lehena, Markina-Xemeinen (uztailaren 19an), bigarrena  Arrigorriagan (uztailaren 20an9 eta azkena Ispasterren (uztailaren 25ean).  
 
EGITARAUA

-Uztaila 13 astelehena: Dantzaldi Erromeria (23:30)
Txoko Oinez, Taconera Parkea, Iruñea
 
-Uztaila 17 ostirala: Dantza Tailerra (19:00)
Erabilera Anitzeko Aretoa, Berastegi
 
-Uztaila 18 larunbata: Dantzaldi Erromeria (18:00)
Alameda, Errenteria
 
-Uztaila 19 igandea: Dantzaldi Erromeria (19:30)
Plazan, Markina-Xemein
 
-Uztaila 20 astelehena: Dantzaldi Erromeria (21:00)
Herriko Plaza, Arrigorriaga
 
-Uztaila 25 larunbata: Dantzaldi Erromeria (13:00)
Santiago baseliza, Ispaster