Bakersfield, AEB. Pandemiagatik bi urtez bertan behera geratu ondoren, abian da berriz ere NABO Udaleku, Ipar Amerikako Euskal Etxeen Federazioak 10-15 urte arteko bere haur eta gaztetxoentzat antolatzen duen udako euskal kultura egonaldia. Kaliforniako Bakersfield-eko Kern County Basque Club euskal etxea arduratzen ari da tokiko antolaketaz. Aurten astebetekoa izango da, ekainaren 17tik 25era, eta erregistroa Martxoaren 1ean 18:00etan egingo da online, Kaliforniako ordua.
Erne behar da egon, epea zabaldu eta oso minutu gutxira agortzen baitira lekuak.
Partaidetza 450 dolarrekoa da haur bakoitzeko, eta ehuneko hamarreko beherapen bat aplikatzen zaio bigarren partaideari haur bat baino gehiago diren familien kasuan. Ekonomia arazo izan ez dadin, NABOk berak bekak ematen ditu, 'Aita Tillous' izenpean eta bat baino gehiago dira parte hartzeko laguntzak ematen dituzten euskal etxeak ere. Urtero gai edo probintzia bat hartzen da edizio horretako langai berezi, eta aurten Nafarroa da.
Izen-ematea hemendik behar da egin Martxoaren 1ean, Kaliforniako 18:00etan.
Lagun bati bidali
Komentarioa gehitu
