euskal diaspora eta kultura
2016/10/14
2017an 140 urte beteko ditu Buenos Airesko Laurak Bat Euskal Etxeak. Ospakizunak ‘Buenos Airesek Euskal Herria ospagai’ jaiarekin bat hasiko dira, martxoaren 18an, larunbata, eta asteburu berean jarraituko dute, instituzioko instalazioetan, beste hainbat euskal etxe partaide. Gonbite honekin batera, beste bat ere badu Euskal Etxeak baina hau asteburu honetarako: bihar larunbata Agirre lehendakariari buruzko hitzaldi bat antolatu du eta segidan Dantzari Eguna ospatuko da Belgrano etorbideko egoitzan.
2016/10/14
Elias Echegoyen hil da Brasilen, Sao Pauloko Eusko Alkartasuna Euskal Etxea 1959an sortu zutenen artean bizirik geratzen den azketakoa. Duela hilabete batzuk, EuskalKultura.com-eko zuzendari Joseba Etxarri bertan izan zela, bideo labur batean Eliasi hitz batzuk kentzeko aukera izan zuen. Bideo haren pusketa bat ekarri dugu hona, azken omenaldi gisa. Nafarra zen Elias Echegoyen, Xabier-koa. Bere aldeko elizkizunak bihar larunbata egingo dira Sao Paulon.
2016/10/13
Erakusketa antolatu du Bizkaiko Foru Liburutegiak 19. mende amaieratik aurrera erbesteko euskal komunitateetan argitaratutako agerkari sorta hautatuz. Europan eta Hego Ameriketako euskal agerkarietako nabarmenenak biltzen ditu, bere egoitzan eta urriaren 31eraino ikusi ahal izango diren izenburuak erakutsiz. Erakusketako liburuska ere argitaratu du eta hona ekarri dugu pdf formatuan.
2016/10/13
"Origen" saioak Ernesto Ché Guevara argentinarraren euskal sustraiak aurkituko ditu gaur, haren anaia Juan Martin Guevararekin batera Euskal Herriko familiaren sorlekuak bisitatuz. Olga Zabalgogeaskoa kazetariak XX. mendeko pertsonaia historiko garrantzitsuenetako baten euskal jatorria erakutsiko digu, eta historialari eta genealogia adituen ikerketei jarraiki, Ché-ren anai txikiak, Juan Martinek, Euskal Herriko senideak ezagutu ahalko ditu. Saioa gaur 22:25etan estrenatuko da, ETB2 katean, eta internet bidez eta Canal Vasco/ETB Sat kateetan ere izango da ikusgai.
2016/10/13
Hiriko Udalak urtero antolatzen duen Kultur Aniztasunaren Eguneko jaialdia Gral. Belgrano Plazan izan da aurten, kolektibitate italiar, espainiar, irlandar, japoniar eta euskalduna partaide. Etxe Maitea Euskal Etxeak kultur stand bat aurkeztu zuen –"jaialdiko kultur stand bakarra"– eta erakundeen arteko elkartasuna bultzatzeko ALCEC minbiziaren aldeko elkarteari eman zion stand gastronomikoaz arduratzeko aukera.
2016/10/12
Kanadatik iritsita, Plasentia-ko Wayne Power alkatea eta Noella Collins zinegotzia euskal kostaldeko Plentzia bisitatuko dute bihartik hasita urriaren 17ra arte, euskal Plentziaren (historikoki Pasencia de Butron ere deitu izan da) eta duela bost bat mende euskal marinel eta baleazaleek Ternuako kostaldean sortu zutenaren arteko elkar-ezagutza eta senidetzean urratsak emateko. Virginia Urieta argitaratu du hona moldatu dugun artikulua gaurko El Correo egunkarian.
2016/10/12
Iragan larunbatean, urriaren 8an, Kaliforniako euskaldunek hitzordua izan zuten Lincoln herrian, ondoko Rocklin-en egoitza duen Iparreko Ibarra Basque Clubek ospatzen zuen 12. Urteroko Besta eta 2016ko NABO Kantari Egunarekin. Bertara bildu ziren 300dik gora lagunek egun ederraz gozatzeko aukera izan zuten: musika, kantua, dantza, mus txapelketa, herri kirolak saioak eta dantzaldi eta guzti. Ikusi argazki bilduma, jarraian.
2016/10/11
Abentura itzela ari dira bizitzen "Arbasoen ildotik" egitasmoko gaztetxoak. San Frantziskora heldu ostean, datozen egunetan Kalifornian eta Nevadan ibiliko dira, euren senitarteko amerikanoen bila. AEBetan dauden bitartean euskal familiekin biziko dira eta bertako euskaldunei elkarrizketak egingo dizkiete. Zalantzarik gabe, sekula ahaztuko ez duten ikasgaia eta esperientzia izango da. Ondo ibili gazteak!
2016/10/11
Jarduerak iaz lortu zuen arrakastak butzaturik, aurten berriz ere antolatu eta euskara ikasleentzako bigarren Euskal Asteburupasa egin du berriz ere ‘Uruguaiko Euskara Ikasleak’ taldeak. Ekitaldia Santa Lucia del Esteko hondartzan izan zen eta hiru egunetan zehar euskaraz bizitzeko aukera izan zuten FIVU Uruguaiko Euskal Elkarteen Federazioko irakasleek, hogei ikaslek eta lau txikik.
2016/10/11
San Pedro eta Baraderoko bi koruk bat egin zuten Arrecifesekoekin bertako Eusko Kultur Etxearen (EKE) 25. urtemugaren karietara antolatutako kontzertuan. Urteurrenaren baitan Yvyra taldeak egurrez egindako hainbat eskulan erakutsi zituen erakundearen instalazioetan. Erakusketaren inaugurazioan Ricardo Porta pintore arrecifestarrak Euskaldunak Denak Bateko erreferente izan zen Lucio Echaniz abertzalearen omenezko erretratu bat oparitu zion Kultur Etxeari.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
