euskal diaspora eta kultura
2017/05/17
Urteroko Ohiko Biltzar Nagusia egin du joan den asteartean, Maiatzaren 16an, Iparraldeko Euskal Etxeak, Moreno kaleko bere egoitzan, Buenos Airesen. Bileraren baitan, Zuzendaritza Batzordea berritzeko hauteskundeak egin dira eta Roberto Plorutti hautatu dute erakundeko lehendakari berri. Lagun izango ditu, besteak beste, Federico Sergio Baldoy, lehendakariorde; Norma Rios, idazkari; eta Alberto Sosa Montepagano, diruzain.
2017/05/17
Asteburu emankorra izan da joan den hau euskal diaspora alorrean, Europa, Asia eta Ozeaniako euskal etxeen hogei bat ordezkari bildu baitira Parisen, bertako Eskual Etxea eta Eusko Jaurlaritza antolatzaile. Jaurlaritzaren izenean, Kanpo Harremanetarako idazkari nagusi Marian Elorza eta Kanpoan den Euskal Komunitatearentzako zuzendari Gorka Alvarez Aranburu izan dira partaide. Ostiraletik igandera hainbat gai jorratu dituzte, amankomuneko arazoak, finantziamendua, gazteak, teknologia berriak eta euskara tarteko.
2017/05/16
Ekimen familiarra da ‘Euskera’ garagardoa, "Made in Argentina", Misiones probintzia argentinarreko Apostoles herriko Urreaga sendiak sortua. Ekoizpen masibokoa ez bezala, etxeko produktuen zapore eta kalitatea aipatzen ditu 'Euskera'k berezko ezaugarri gisa. Aukeratutako izenarekin, jatorriari eta 19. mendean Nafarroa utzi behar izan zuten Urreagatarrak nahi izan dituzte gogoratu eta omenaldia egin Argentinako euren ondorengoek.
2017/05/16
Chacabucoko Guillermo Larregui Euskal Etxea izango da Argentinako Mus Txapelketaren 39. edizioko egoitza, ekainaren 16tik 18ra. Irabazleak Argentinako ordezkari izango dira abuztu amaieran Kalifornian jokatuko den Mundu Txapelketan. Parte hartzeko U$S 700 voucher bat ordaindu behar da (otorduak eta ostatua barne) eta izena emateko epea ekainaren 13an bukatuko da. Txapelketa Nazionalarekin batera, laguntzaileentzako Lehiaketa Paraleloa ere egingo da.
2017/05/15
Puerto Madryngo Etorritakoengatik Euskal Etxearen bultzatzaile nagusia eta sortzaileetako bat izan zen Maria Julia Ercoreca, lehenengo lehendakaria eta pertsona gakoa elkartea zein elkarteko dantza taldea arimaduna eta sustrai sendoduna sortzen. Tupustean eta gazterik joan zen, eta erakundea nola jaio zen gogoratzean, Maritaren alde egin zuten topa Puerto Madryngo Euskal Etxeko lagunek brindis hunkigarri batean.
2017/05/15
Egun osoko txangoa antolatu zuten 2017ko Aberri Eguna ospatzeko ‘Baskos de la Confluencia’ Euskal Etxeko kideek. Ateraldia Limay ibaiaren ertzean dagoen China Muerta parajera izan zen eta bertako baserri batean euskal herritarren eta argentinarren ohitura kutunenak partekatu zituzten bildutakoek, esan nahi baita bazkari eder bat eta bazkalosteko kantaldia.
2017/05/12
Gaur hasiko dira heltzen eta arratsaldeko 6etan egingo zaie ongietorria Pariseko Eskual Etxean, ondoren igande eguerdira arte luzatuko den egitarau bati eusteko. Europa, Asia eta Ozeaniako Euskal Etxeek Eskualde Bilera egingo dute asteburu honetan Parisen, Eusko Jaurlaritza eta Pariseko Euskal Etxea antolatzaile. Gizataldeen Mundu Batzarrak hala erabakita bi urtero, Kongresu arteko bilera hauek egiten dira eskualdeka. Europa, Asia eta Ozeanikoen azkeneko bilera orain lau urte egin zen Bartzelonan.
2017/05/12
Euskal Herritik etorrita, 'Garapen' garapen-agentziako presidente Fernando Nebreda Dias de Espada Argentina iparraldean da bilera-programa batekin, eta azken egunotan Misiones probintziako Obera hirira heldua da. Posadas probintziako hiriburutik, Euskal Jatorri Euskal Etxeko ordezkaritza bat hurbildu zaio bertan emaniko hitzaldira, herriko Udalak deiturik. Posadasko Euskal Etxeak Zuzendaritza Batzordea berritu duela ere adierazi digu.
2017/05/11
Bidaia egin zuen atzo Urkullu lehendakariak Bruselara, europar hiriburuan zenbait instituzioetako ordezkariekin bildu eta, besteak beste, Europar Batzordeko presidente Jean-Claude Juncker, Gai Ekonomiko eta Finantziero, Fiskalitate eta Aduana komisario Pierre Moscovici eta Europar Parlamentuko Brexit negoziazioen koordinatzaile Guy Verhofstadt-ekin solasteko. Hitzordu horien aurretik, eguerdi aldean, harrera-ekitaldi bat eskaini zion Bruselan bizi den euskal komunitateari.
2017/05/11
1954ean inauguratu bazen ere, Rosarioko Zazpirak Bat Euskal Etxearen baitan funtzionatzen duen euskal liburutegiak ez dauka izen berezirik bere lana eta nortasuna identifikatzeko. Horretaz ohartuta, erakundeko Zuzendaritza Batzordeak gonbitea luzatu dio Rosario barne eta kanpoko euskal gizataldeari, Liburutegiari nortasun sendoagoa emango dion izen bat aukeratzeko. Proposamenak bidaltzeko epea maiatzaren 31an bukatuko da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
