euskal diaspora eta kultura
2017/06/14
Hogeita bi mila kilometrotik gora egin zituen oinez, eskorga bati bultzaka, Guillermo Larregui nafarrak (1885-1964). Iruñean jaioa, Puerto Iguazu-n hil zen, izan ere auzo zeuzkan Iguazuko urjauzien ondoan. Bere heriotzaren urteurreneko hilabetean omenaldi bat egingo dio bizileku izan zuen herriak ‘Eskorgako Euskalduna’ ezizenaz ezaguna egin zen Larreguiri, eta bere eskultura bat desestaliko dute Puerto Iguazuko ‘El Salvador’ hilerrian dagoen bere hilobian.
2017/06/14
Eusko Jaurlaritzaren Gobernu Kontseiluak atzo eginiko bileran, Euskal Etxeentzako 2017rako dirulaguntza deialdi nagusia onartu zuen, aurtengoan 902.307 euroko kopurua banatuko dituena, iaz baino 40.000 euro gehiago. Atzoko pausoaren ondotik, deialdia EHAA buletinean argitaratzen denean --ekainaren 21ean seguruenik-- sartuko da indarrean. Erne, beraz, euskal etxe eta federazioak, egun horren biharamunetik aurrera hilabeteko epea izango baitute euren proposamen eta eskabideak aurkezteko.
2017/06/13
Seigarren edizioa bete du, eta Buenos Airesko Euskaltzaleak euskaltegiak antolatzen duen Triki-Poteoa, publikoak gehien eskatzen duen aktibitatea da, batez ere publiko gazteak eta ez euskal etxekoek soilik. Argentinan bizi diren Euskal Herrikoek ere eskatzen dute. Aurreko edizioetan bezala, aurtengoan ere beste hiri batzuetako euskal etxeetako kide eta lagunek ere hartu dute parte. Eta musikarien artean, Laurak Batekoek ere, EEko trikitilariak eta albokariak hain zuzen.
2017/06/13
Maiatzeko azken asteburua eta ekaineko lehenengo asteburu arteko egunak ospakizun --eta lan-- garaia izan ditu Bordeleko Euskal Etxeak, Garona ondoko euskal etxe akitaniarrak bere 70. urtebetetzea ospatu baitu, horretarako bazkide eta lagunak deiturik. Ekaineko lehenengo asteburuan, izan ere, Bordeleko euskal lagunekin bat egitera bertaratu ziren, besteak beste, Pariseko Euskal Etxeko lehendakari Sebastien Dagerre eta Gorka Alvarez Aranburu Jaurlaritzako Kanpoan den Euskal Komunitatearentzako zuzendaria. Zorionak zuri kantatu eta opariak trukatu zituzten elkarrekin. BEEak, bestalde, ia prest dauka bere historia biltzen duen liburua.
2017/06/12
Ekimena asteazken honetan aurkeztuko da Donostiako Kursaal-en Munduari Begira Biltzarraren bigarren edizioan. Elkarretaratzera 300dik gora euskal enpresek baieztatu dute dagoeneko partaidetza. Eusko Jaurlaritzak, EAEko hiru Foru Aldundiek eta Araba, Bizkaia eta Gipuzkoako hiru merkataritza ganberek partzuergo hau helburu jakin batekin sortu dute: bakoitzak enpresen nazioartekotzea sustatzeko dauzkan politikak batzea, euskal konpainiek errazago izan dezaten kanpoan jardutea eta kanpo aktibtate hori abiatu, garatu edo areagotzea.
2017/06/12
Urtero legez, Hego Hemisferioko neguko eta Ipar Hemisferioko udako solstizioa ospatuko dute Iparraldeko Euskal Etxeko lagunek ekainaren 24an euren ohiko 'Sorgin Afaria'rekin. Buenos Airesen bihotzean, benetako 'akelarre' bat egingo dute, sorgin eta guzti, ongi jan-edan, dantzatu eta kantatuz. Gonbite honekin batera, euren Herri Urrats jaiaren argazkiak helarazi dizkigute Iparraldeko Etxeko Kultur Azpibatzordeko kideek, eta galeria batera bildu ditugu.
2017/06/09
Corpuseko Eusko Etxeak uztailaren 22 eta 23an ospatuko du aurten seigarren ediziora iritsiko den bere Jai Kulturala. Bi egunetan zehar mota askotako ekintzak egingo dira Eusko Etxearen egoitzan eta herrian, tartean euskal zine emanaldiak, hitzaldiak eta ikuskizunak. ‘Kontaketa Harrigarriak’ Literatur Lehiaketaren sariak ere banatuko dira Jaialdian. Berri honekin bateraEuso Etxeak igande honetarako antolatu duen Bingora gonbidatu ditu corpustarrak, etekinak jarduerak gauzatzeko.
2017/06/08
Gaur egun osoan Bilboko Arriaga Antzokitik egingo den Klasikoen Irakurketa Jarraituak Itxaro Borda baxenabartarraren %100 Basque eleberria hautatu du ehundaka jendeek zatika eta atalka ozen irakurri beharreko testu gisa. Aurtengoarekin hamargarren ediziora iritsi den ekimen honetatik makina bat euskal herritar pasatuko da fisikoki Arriagatik bere zatia irakurtzera. Urtero legez, baina, Diasporako euskaldunak ere partaide izango dira pantailen bidez, munduko 34 euskal etxe eta lekuetatik irakurle.
2017/06/08
La Platako Euzko Etxeak bere azken proposamen eta mugimenduen berri pasatu digu, tartean bere inguruko zenbait erakunderekin sinatutako akordioak, hala nola Herrialde Katalaneko Etxearekin sinatutakoa, UNLP eta UE unibertsitateekin edota bere auzo bereko haur eskolekin. Bihar bertan Paella Lehiaketa bat egingo du eta ekainean baita ere, Euskal Herriko musika tradizionala jotzen ikasteko tailerra jarriko da martxan. Euskal Etxeak Javier Clua berrautatu berria du lehendakari.
2017/06/07
2017ko San Juan eguna bi ekitaldi medio ospatuko du aurten Uruguaiko hiriburuko Haize Hegoa euskal etxeak. Joan den ostiralean San Juan jaiari buruzko hitzaldi bat eskaini zuen Enrique Poittevinek elkartearen egoitzan; ekainaren 23a, berriz, San Juan bezpera, kalean ospatuko dute gauez montevideotarrek, ohiko sua piztuz. Sua Haize Hegoaren egoitzaren aurrean piztuko dute, urtero bezala, eta komunitate osoari luzatu diote gonbitea gaiztakeria eta gauza txarrak erre eta uxatzeko zeremonian. Gogoratu, azkenik, Montevideok Euskal Sukaldaritza jaialdi batekin bukatu zuela maiatza, hiriko Cottage hotelean, oraingoan ere Haize Hegoa partaide.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
