euskal diaspora eta kultura
2008/12/11
Joan den abenduaren 3an Buenos Aireseko Eusketxe eta Euskaltzaleak elkarteek omenaldia egin zioten Andrés de Irujo Ollori. Orain dela ehun urte Lizarran jaio zen Irujo, baina erbestera jo behar izan zuen 1940 urtean eta Argentinara iritsi zen Euskal Herrian familia, lagunak eta egoera politiko larria utziz. Buenos Airesen lan eskerga egin zuen bere jaioterriaren eta euskararen alde, Ekin Argitaletxea sortuz. Bertatik Euskal Herriko eta euskaldunen hizkuntza, kultura eta ideiak zabaldu zituen. Orain, bere jaiotzearen mendeurrenean, Eusko Kultur Etxea eta Euskaltzaleak erakundeek omenaldi bat egin diote, Buenos Aireseko Nafar Etxeko dantzariak partaide.
2008/12/10
2008/12/10
“Argentina gara eta Argentina bizi dugu, baina aldi berean Euskal Herria gara eta Euskal Herria ere bizi dugu. Euskal Herriko kulturarekin daukagun harreman etengabeak hurbil mantentzen gaitu, Euskal Herriaren parte egiten gaitu nahiz eta urrun egon. Eta belaunaldiz-belaunaldi jaso dugun ondareak zortzigarren herrialde bihurtzen gaitu”. Honela aurkezten da Argentinan eratzen ari den Euskalduna Irakurle Kluba. Martxotik aurrera, Klubeko kideek euskal gaiko liburu bat jasoko dute hilero etxean, eta hiru hilabetean behin aldizkari bat. Kooperatiba izateko asmoz sortu da, Euskal Herrian eta Argentinan ezagunak diren elkarte, argitaletxe eta diskoetxe batzuen laguntzaz. Euskal Herriko ‘Gure Liburuak’ Irakurle Klubaren ereduari jarraituko dio. Partaide bilakatu nahi dutenak garaiz daude.
2008/12/10
Buenos Aires hiriko Euskal Echea Ikastetxeak abegikor hartu ditu Ikastetxe bertako Gurasoen Abesbatza, Llavallolgo Euskal Echea-ko abesbatza eta hiriburuko Euskaltzaleak-en abesbatza, hiru koralok biltzen dituen lehenengo koru elkarretaratzean. Ongi eraturiko ekitaldian, koru bakoitzak bere errepertorioko pieza hautu batzuk kantatu eta topaketa moduko bat egin dute lehenengo aldiz, arrakastaz, bildutakoak gustura atera baitziren esperientziatik.
2008/12/10
Bukatu berria da Durangoko Liburu eta Disko Azoka, eta antolatzaileek lehen balioespenean krisiak salmentetan uste baino eragin gutxiago izan duela diote. Aurreko edizioetan bezala Azokan izan da Joseba Zulaika, Renoko (Nevada, AEB) Unibertsitateko Euskal Ikasketen Zentroko zuzendarikidea, erakunde honek plazaratzen dituen lanak aurkezteko. Berria aldizkariak egin zion eta jarraian jasotzen dugun elkarrizketan euskal amerikar diasporako ikuspuntuaz aztertzen du azoka eta CBSek euskal kulturaren alde egiten duen lana.
2008/12/09
Tandileko Gure Etxea Euskal Etxeak, Argentinako Buenos Aires probintzian, bat egin zuen joan den asteazkenean Euskararen Nazioarteko Egunarekin (ENE) eta ekitaldi berezia antolatu zuen, batetik, 2008 ikasturteko euskara eskolen amaiera gisa eta, bestetik, urtean zehar euskara ikasle izan eta eskolak ongi baliatu dituztenei euren ziurtagiriak emateko, Cecilia Cenoz eta Beatriz Poumé euren irakasle. Ekitaldiak Euskal Etxeko lehendakari Isidro Legarreta izan zuen buru eta hondarrean mokadu bat eta topa egitea ere izan ziren.
2008/12/09
Urtea amaituz doaz, eta Hego Amerikan, urtearekin batera, ikasturtea. Hori dela eta, euskal etxe guztiak euren jaiak antolatzen eta gauzatzen ari dira. Euskal Astetik bi aste igaro ostean, Argentinako Diasporaren lagunek hitzordu berri bat zuten azaroaren 15ean, oraingo honetan umeei begira FEVAk urtero antolatzen duen jaialdian. Arrecifes, Ayacucho, Buenos Aireseko Acción eta Laurak Bat, Cañuelas, Chacabuco, Chascomús, General Rodríguez, La Plata, Lomas de Zamora, Maipú, Mar del Plata, Rosario eta Llavallol eta Sarandí Euskal Echea Ikastetxeko haurrek jolastu, abestu, dantza eta kirola egiteko aukera izan zuten Llavallolgo Euskal Etxea-ko zelaietan.
2008/12/09
Sarean da abenduaren lehenetik Montevideoko Haize Hegoa Euskal Etxeak zabaldu duen lehenengo webgunea. Urtean zehar makina bat ekitaldi eta ekimen sustatu eta gauzatzen dituen euskal elkarte honek zuzeneko presentzia lortzen du honela interneten, aspaldiko proiektu bat bideratuz eta euskal esaera zahar eta aldi berean egungotasun handikoa denak dioena aintzakotzat hartuz: 'Esanak egin, eta eginak esan'. Nagusiki gaztelaniaz den webguneak, elebitara egiten du bere buruaren aurkezpena eta euskaraz eta gaztelaniaz agertzen ditu baita ere atalen izenburuak. Ongi etorri!
2008/12/09
Life aldizkari estatubatuarrak Utah-ko euskal komunitateaz 1951ean eginiko argazki-sorta bat ikusgai dago interneten, argitalpen garrantzitsu honen artxibo grafikoetan Estatu Batuetako euskal komunitateaz eta euskaldunez dagoen ondare zabalagoaren erakusgarri. Utah-ko euskaldunei kanpoan --mendietan artzain giroan--, eta barnean --Salt Lake City-ko euskal ostatuaren babesean eguneroko bizitza egiten-- eginiko argazkiak dira. Salt Lake-ko Euskal Etxeko Jean Flesher eta Larry Osoro medio eskuratu dugu informazioa, milesker bioi.
2008/12/08
Damian Ibargurenek Algorta eta Arroyo Negro herri uruguaiarretan eginiko bi muralek Nazio Batuen Erakundearen (NBE) Uruguaiko egoitzak antolatutako mural lehiaketan lehenengo bost lanen artean gelditu dira. Giza Eskubideen Gutunaren 60. urteurrenaren karietara gauzatu den ekimen honetan 130 mural aurkeztu ziren eta Ibargurenek bere blog-ean agertzen duenez, bere bi lanen kasuan proiektuen "inpaktu handia" eta "eginak izan ziren komunitateen aldetik jaso zuten partaidetza maila (handia)" azpimarratu zuten epaimahaikoek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
