euskal diaspora eta kultura
2009/01/30
Bere gurasoak pertsona ezagunak dira Argentinako euskalgintzan. Ama, Marina Aranguren, euskal argentinarra da eta heldua izanik ikasi eta hobetu du bere euskara. Gaur egun euskara irakaslea da Buenos Airesko Euskaltzaleak elkartean. Aita, berriz, Aitor Alava du, duela bost bat urte Buenos Airesen bizi den Zuhatzako (Araba) euskalduna eta euskal dantza irakasle ari dena Argentina eta Uruguaiko zenbait euskal etxetan. Horiek gurasoak. Alaba, berriz, Maialen tipia, urtarril honen 10ean jaio zen Buenos Airesen, lagun andanaz inguratuta. Ongi etorri, Maialeni, eta zorionak aita-ama-alaba eta ingurukoei.
2009/01/30
AEBetako euskal etxeetan euskara irakasleak trebatzeko programak --'Euskara AEBetan'-- bere urteroko bilkura egin zuen joan den urtarrilaren 16tik 18ra Utah-ko Salt Lake City hirian. HABE institutuak eta NABOk (AEBetako euskal etxeen federazioak) sustatzen duten programan inoiz baino irakasle gehiago ari dira aurten, Izaskun Kortazar, NABOko euskara sustatzailea egiten ari den lan bikainaren seinale. Bilkuran Idaho, Colorado, Wyoming, Nevada, Kalifornia eta Utahko irakasleak izan ziren, besteak beste.
2009/01/30
Chaco probintziako Resistencia hiri argentinarra izan zen joan den urtarrilaren 10ean Mariangeles Rosciani Grandes Igarategui eta Mauro Matheu gazte euskal argentinarren ezkontzaren agertokia. Mariangeles Chacoko Euskal Etxeko dantzaria da eta Mauro Arrecifeseko Euskal Etxeko dantza taldeko kidea eta euskara irakaslea. Bi gazteen maitasunak 1.500 kilometrotara dauden elkarteak batu zituen eta elizkizunaren ostean bi euskal etxeetako dantzariek aurreskua dantzatu eta ohorezkoa arkua egin zieten. Zorionak ezkonberriei!
2009/01/29
2009/01/29
Mexiko DFko Euskal Etxeak bere Zuzendaritza Batzordea berritu du joan den asteburuan, Miguel Larregui presidente berri aukeratuz. Larregui Tolucan jaioa da eta arbaso baztandarrak eta bizkaitarrak ditu. Bera izango da Gotzon Uribek zuzendu zuen batzordearen ondorengoaren buru. Euskal Etxeak garai latzak igaro berri ditu arlo ekonomikoan, finantza-hersturak markatuta, eta orain presidente berriak adin guztietako euskal-mexikarrak euskal etxearen partaide egin eta sentiarazteko erronka hartu du bere gain. EuskalKultura.com-ek berarekin hitzegin du.
2009/01/29
Urtarrilaren 9tik 11ra bitartean Mar del Platan, Argentinan, egin zen Euskal Federazioen Nazioarteko I Topaketak NABO eta FEVAren arteko hainbat hitzarmen eta ekimen abian jartzea ekarri du. Ekimen berrien artean azpimarragarriak dira trukeak: aurten AEBetako gazteak Bahia Blancan egingo den Argentinako Euskal Astean izango dira, eta Argentinako haur eta irakasleek NABOren Udalekun parte hartuko dute (Kaliforniako Chino herrian).
2009/01/28
Leandro Etchichury antropologo euskal argentinarrak izenburu osoa 'Patria vasca y libertad. Política, identidad y violencia en el occidente europeo' (Euskadi eta askatasuna. Politika, identitatea eta bortxa europar mendebaldean) duen liburua plazaratu du Buenos Airesen, Eudeba argitaletxearen eskutik. Lanak "argitaletxeari 2005 urte hondarrean eginiko proposamen bat dauka atzean, 'euskal gatazka' delakoari buruzko materiala sortzeko, adieraziz zer den eta ze jokabidea izan duen bere baitan Euskal Nazio Askapenerako Mugimenduak (ENAM, MLNV)". Egilearen esanetan, honela sortu zen obra, eta gaiarekiko "sarbide gisako ikerlana bada ere", bera "pixka bat haratago joaten" saiatu da.
2009/01/28
Eusko Jaurlaritzak sustatzen duen Diasporako gazteentzako trebakuntza programak, Gaztemunduk, munduko euskal kolektibitateen argazki artxiboen kudeaketa eta EuskalEtxeak.net webgunearen bidez euren hedapena izango ditu ardatz aurten, ekimenaren arduradunek jakinarazi dutenez. Aurten gainera, 50 gaztek parte hartu ahal izango dute Gaztemundun, aurreko edizioetako 30 lagunen kopurua nabarmen gaindituz. Ekimen honetan parte hartzen duten gazteek uztaila edo abuztua aldean bi aste igaroko dituzte Euskal Herrian trebatzen. Parte hartzeko gazte bakoitzak 150 argazkiren ekarpena egin beharko du, material horrekin lan egin ahal izateko.
2009/01/28
Euskal Herria Mugaz Gaindi VI. Nazioarteko Mintegiak data eta lekua du jada: irailaren 29tik urriaren 2ra bitartean izango da, Deba Goienan (Arrasate, Aretxabaleta, Eskoriatza eta Aramaio). Oraingo honetan nazioarteko topaketaren asmoa ikuspegi anitzetatik jorratuz, euskal migrazioen garrantzi historikoa eta gaur egungo euskal diasporaren egoera aztertzea da. Parte hartu nahi dutenek lanak bidaltzeko epea martxoaren 31a bitartean dute irekita.
2009/01/27
Corpus Christi Euskal Etxeak, Argentinako Misiones probintzian, hiru urte bete zituen iazko abuztuan eta 2009ko ekitaldia hasi aurretik elkarteak iazko ekimenen balioespen oso baikorra egin du. Elkarteak gauzatu dituen proposamenen artean, hitzaldiak eta inguruetako euskal historia eta kulturaren zabalkuntza aipagarriak dira, besteak beste. Olga Leiciagak, elkarteko presidenteak, iazkoan egin dituzten hainbat ekimenen argazkiak bidali dizkigu, urteko une azpimarragarrienetako batzuk gogora ekarriz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
