euskal diaspora eta kultura
2009/05/13
Aukeratu berria dute Cecilia Cenoz Argentinako Tandil herriko 'Gure Etxea' Euskal Etxeko lehendakari. Ez zuen Euskal Herritik etorritako aitatxi ezagutu, soilik aitak kontatzen zizkion pasadizoen bidez, baina horiek aski izan ziren denborarekin euskara ikasi, euskal sentimentua bereganatu, eta Tandilgo Euskal Etxea bere etxetzat hartzeko. Badaki berak euskal elkarteak une latzak bizi dituela, gazte gutxi biltzen baitu, eta gazterik gabe, gero gutxi. Hala ere eutsi dio EEko lehendakari izateko erronkari. Bere lana, 'arduraz eta koherentziaz' betetzea espero du, 'baina gehienbat maitasun handiz'. Helburua, Tandilgo euskal eraikin ederrari haur eta gazteen zarata eta bizitasuna ekartzea. Elkarrizketa Alma Vascako Jorge Gilabert-i dagokio.
2009/05/13
Belaunaldi aldaketa bat eman da, presidentetzari dagokionez behintzat, Argentinako 'Gure Etxea' Euskal Etxean. Aire berriak ekarri eta gazteek erakundean ardura handiagoak hartzeko erraztasunak izan ditzaten izango dira bere erronketako batzuk. Euskara irakasle den Cenozekin batera Zuzendaritza Batzordekide dira Juan Beguiristain, lehendakariorde lehena; Isidro Legarreta, lehendakariorde bigarrena; Miguel Herrera, idazkaria; Jorge Gilabert, diruzaina; eta Maria del Carmen Dindart, agiri idazkaria, besteak beste.
2009/05/13
Famatuena, eta jatorrizkoa, Nafarroako Iruñea baldin bada ere, munduan Pamplona izena duten beste hainbat hiri daude: 19 zehazki. Gehienak mendeetan zehar munduaz bestaldera aberastasun edo bizitza hobeago baten bila joanak ziren nafar konkistatzaile edo inmigranteek sortuak izan ziren. Diario de Noticias de Navarra egunkariak hiri hauen errepaso txikia egiten du, 2001ean Iruñeakin senidetu zen Kolonbiako Pamplonatik hasi eta Mexikoko Veracruzeko Pamplona nimiñoraino, jarraian laburtu eta itzuli dugun artikulu honetan.
2009/05/12
Joan den larunbatean iritsi zen Chascomus herrira, Buenos Aires probintzia argentinarrean, Bixente Arozena Udalbide/Udalbiltzako Zuzendaritza Batzordeko kidea, erakunde horretako kide gisa Argentina eta Uruguaira Ramuntxo Camblong-ekin batera egin duen itzuliaren barnean. Autobusez heldu zen, Mar del Platatik. Camblong-ek, berriz, bidaia segitu zuen Buenos Aireseraino, hitza emana baitzien hiriburuko Iparraldeko Euskal Etxeko kideei bertako Herri Urratseko ekitaldian parte hartzeko. Arozena, Chascomuseko Udaletxean errezibitu zuten Liliana Denot alkateak eta beste zenbait goi ordezkarik; eta Chascomuseko Euskal Etxean, aurreskua dantzatu zioten.
2009/05/12
Datorren larunbatean, maiatzaren 16an, Txileko Santiagoko Eusko Abesbatzako kideak Bilbora helduko dira, elkartearen 70. urteurrena ospatzeko Euskal Herrira egingo duten lehendabiziko biran. Maiatzaren 24a arte izango dira Euskal Herrian eta zenbait emanaldi egingo dituzte, hala nola Plentzian, Donibane Lohizunen eta Bermeon, azken honetan herriko Habanera Jaialdian. Koraleko zuzendaria Patricio Aburto da eta presidentea Andoni Torrontegui.
2009/05/12
Buenos Airesko euskaldunek urtero ospatzen dute Herri Urratsen euren bertsioa, hiriko Iparraldeko Euskal Etxearen eskutik. Aurtengoan, Udalbide/Udalbiltzako Zuzendaritza Batzordeko kide Ramuntxo Camblong, eta Xamar eta Jose Angel Irigarai idazleak bertan. Argentinara egin duten itzuliaren azkeneko egunean zeuden eta Diasporako jendearekin egoteko aukera dezente izan ondoren, Diasporako festa euskaltzale bat bizitzeko aukera izan zuten. Baita loriatu ere. Etxeko kideak eta, oro har, euskara eta euskal kulturaren inguruan mugitzen den jende multzoa gerturatu zen hiriburuko Moreno kalera, euskarazko jokoetan, dantzetan eta afari batean parte hartzeko. [IKUS ARGAZKI ERREPORTAJEA]
2009/05/12
Ehun urtek hamaika esperientzia eta gehiago bizitzeko parada ematen dute, eta Maria Etxeberria Mendiluze altsasuarraren kasuan bi kontinenteen arteko bidea egiteko adina ere izan dira. Maria Argentinar Pampako Lonkimai herrian jaio zen orain dela mende bat, hara joandako guraso altsasuarren alaba. 'Estancia' edo arrantxu batean hazi zen, behi basatiak zaintzen eta gaztea zelarik familia Altsasura bueltatu zen. Ehungarren urtebetetzean Sakanako Guaixe aldizkariak guk jarraian laburbiltzen dugun elkarrizketa egin dio Mariaren seme Jesus Gallardori.
2009/05/11
La Plata Buenos Aires probintzia argentinarretik datorkigu iragarpena, datorren ostegunean, bertako Euzko Etxeak eta Herrialde Katalanetako Etxeak elkarrekin antolatuta, hitzaldi eta ekitaldi bateratu baterako deia eginez, 'bi errealitate politiko eta historikoetako berri emanez, historikoki, gaur egungo uneraino heldu arte' mintzatuko baitira Gustavo Capdevila abokatua, La Platako Casal-eko presidenteordea, eta Leandro Etchichury, UBAko Antropologia doktoregaia eta euskal gizataldeko kide ezaguna. Ostegunean, arratsaldeko zazpi t'erdietan izango da, La Platako Unibertsitate Nazionaleko Kazetaritza Fakultatean.
2009/05/11
Atzerriko Athletic-en lagun taldeak eta Diasporako euskaldun asko eta asko irrikaz daude asteazkenean Athletic eta Bartzelonak jokatuko duten Koparen Finala ikusteko. Londresen, New Yorken, Buenos Airesen, Madrilen eta Bartzelonan euskal etxeek partida telebistan zuzenean ikusteko hitzorduak antolatu dituzte euren egoitzatan edota inguruko tabernetan. Gutxi batzuk, Italiako Lehoi Italiarrak peñako lagunak, kasu, Valentziara bidaia egingo dute giroaz zuzenean gozatzeko. Partida telebistan (ETB, TV-3 eta TVE) izango da ikusgai eta interneteko irrati eta online kontakizunen bitartez ere jarraitu ahal izango da.
2009/05/11
Argentinara joandako euskaldunen bilobak dira Diana Huarte eta Daniel Gorostegui, eta Buenos Airesko pop elektronikoaren aitzindariak dira SHH taldearekin. Argentinan musika elektronikoa jorratzen duen talde bakanetakoa da SHH bikotea. Aitona nafarra duen Diana Huartek (Buenos Aires, 1979) egiten ditu SHHren kanten hitzak, eta Daniel Gorosteguiren doinuak abesten ditu. Gorosteguiren aitona Miarritzekoa zen. Lehen aldiz izan dira Euskal Herrian jotzen. Atzo eman zuten azken kontzertua, Elorrioko Parra tabernan (Bizkaia). Berria egunkariak eginiko elkarrizketa.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
