euskal diaspora eta kultura
2009/05/21
Aste honetako Argentinako kirol prentsak euskal protagonista duen efemeridea jasotzen du: 1939ko maiatzaren 21ean Isidro Langara gipuzkoarrak debuta egiten zuen San Lorenzo taldearekin eta lau gol sartu zizkion River Plate-i. Langara Euskadiko futbol selekzioko jokalaria izana zen eta altxamendu frankistaren ostean euskal konbinatuak Kuba eta Mexikora egin zuen biran parte hartu zuen. Mexikotik San Lorenzora joan zen eta Argentinako futbolean hasi zen. 121 partidatan 110 gol sartu zituen eta San Lorenzoko goleatzaile historikoetako bat bihurtu zen. Jarraian Yahoo-Argentinatik jaso dugun Telam agentziako nota itzuli eta jasotzen dugu. Juan Carlos Larrartek sinatzen du.
2009/05/21
Buenos Airesen elkarrizketatu du EuskalKultura.com-ek Jose Angel Irigaray, Pamiela argitaletxearen eskutik 'Siete poetas vascos' (Zazpi poeta euskaldun) liburua aurkezteko lehenengoz Argentina eta Uruguaira ekarri duen bisitaldiaren hondarrean. Euskal Herrian baino lehen aurkeztu du poeta nafarrak, berak koordinatu duen titulu hau hiriburu argentinarreko Liburu Azokan eta bi herrialdeotako zenbait euskal etxetan. Diasporaz eta bidaia honetan bizi izan dituen eskarmentu eta ikaspenez aritu da Argentinako geure korrespontsalarekin. “Euskal Herria herri aske bat izanen balitz seguraski ez litzateke hain garrantzizkoa izanen diasporaren afera. Baina ez da kasua” esan dio, besteak beste.
2009/05/21
Ez da emakume ospetsua eta ez da orain arte inoiz egunkarietan atera. Ezagutzen dutenek dute famatzen eta pertsona langilea, ondradua eta hurkoei laguntzen diena izatea dira --eta izan dira bere bizitza osoan-- bere aurkezpen txartela. Dituen 79 urtetan, Tres Arroyos bere herriko Euskal Etxeak ohoratu eta komunitateari eskaini dion lana eskertu dio, beste bost herritarrekin batera, 'Patrimonio Tresarroyense' izeneko sarien seigarren edizioan, maiatzaren 9an, zegokionean EuskalKultura.com-ek iragarri zuen bezala. Candida Dominguez du izena eta herri argentinar horretako La Voz del Pueblo egunkariak elkarrizketatu du jarraian bildu eta laburtzen dugun artikuluan.
2009/05/20
Elhuyar zientzia aldizkariak berrikuntzak dakartza bere azken alean eta sarean jarri dute jada nahi duenak ikus dezan. Aldizkariak diseinu eta formatu berriak ditu eta edukietan irakurleentzako ulerterrazagoa izatea da bere helburua. Atal berriak sortu dira: Mundu ikusgarria, Mundu digitala, Istorioak, Liburutegia, Gogoetan… eta irakurleen partaidetza sustatzen da. Aldizkariak harpidedunentzako kanpaina abian jarri du: 49,5 euroren truke urtean 11 ale eta ordenagailu eramangarriarentzako motxila bat opari.
2009/05/20
Christine Echeverria Bender idazlea eta Boiseko euskal komunitateko kidea da. Bere hirugarren eleberria 'The Whaler's forge' (Baleazaleen sutegia), 1364an Ipar Ameriketara heltzen den baleontzi batekin hasten da. Itzultzerakoan baleontziko gizon bat, Kepa de Mendieta, ahaztuta atzean gelditzen da. Liburuak lurralde ezezagun horretan biziraun behar duen Mendietaren istorioa dakar. Ekainaren 1ean izango da salgai AEBetako liburudendetan eta interneten.
2009/05/19
Arrakastaz egina du bere Urteko Biltzarra, usaian bezala Donibane Garaziko Herriko Etxean, Euskal Argentina elkarteak, esan nahi baita gehienbat Euskal Herrian eta Argentinan ahaideak dituzten presuna eta familiek osaturik bi herrion arteko lokarriak eta harremanak sakondu eta azkartzeko lan egiten duen Ipar Euskal Herriko elkarte honek. Elgarretaratzea martxoko ondarreko larunbatean egin zen, eta ondotik ahaidetasun bazkari bati ekin zitzaion Donapaleuko Mendy ostatuan. Monika Legartoren kronika Herria astekarian.
2009/05/19
Mende erdia darama Los Castores kooperatibak euskal kultura eta batez ere euskal pelota zabaltzen Venezuelan, 1959an sortu zenez geroztik. Kooperatibak, gainera, 1970an sortu zuen Euskal Pilota Kluba eta horren bitartez Venezuelako pilotari harrobia lantzen berebiziko lana egin du. Mende erdia ospatzeko kooperatibak hainbat ekitaldi egingo ditu urtean zehar; lehena larunbat honetan bertan hasiko da, Pedro Oliva bazkide eta sustatzailearen omenezko Pilota Txapelketa batekin.
2009/05/19
Joan den apirilaren 20ean euskal Diasporako komunitateak kide berri bat jaso zuen, Jon Abasolo txikiaren jaiotzarekin. Jonen gurasoak Juan Abasolo, Almagroko euskal argentinarra, eta Itziar Sarralde bertako euskalduna dira. Jaiotzerakoan 3050 kilogramo pisatu zituen eta ia metro erdiko dauka. Gurasoak harro-harro daude eta egunotan aita Bizkaiko Munitibar-ko andra nagusiak erotzen ari omen da seaska kanta zaharrak erakusteko eskatuz. Batzuk 'Almagro' blogean jarri ditu jada.
2009/05/18
6. edizioa daramate Tres Arroyoseko 'Hiru Erreka' Euskal Etxeak sortutako 'Ondare Tresarroyostarra' (Patrimonio Tresarroyense) sariek, beti ere bizitza oso batean, zalaparta handirik gabe, baina lagun hurkoarekiko eta komunitatearen ongizatearekiko ekarpen apal bezain baliotsua eginez eta etsenplu isila emanez bizi izan direnen ibilbidea errekonozitzen. "Herritar eta erakundeetan saritu nahi ditugun baloreak --azaltzen dio EuskalKultura.com-i Jose Luis Artuch, Euskal Etxeko lehendakariak-- berberak dira urtero: ardura, ahalegin pertsonala, langilea izatea eta komunitatearen alde elkartasunez jokatzea". Hauek dira aurtengo izenak: Alcides Ruperto Taboada, Beatriz Olga Guridi, Cándida Domínguez, Rafael Elizalde, Francisco Rodera eta Eskola Bereziko 501. zentrua.
2009/05/18
Euskal Herriko liburutegi askok bezala Donostiako Koldo Mitxelena (KM) sarean da eta bere webgunearen bitartez hainbat edukin kontsultatu eta irakurtzeko aukera ematen du. Alta, sarri gertatzen den bezala, gerta daiteke hainbeste eduki egonda erabiltzaileek ez asmatzea nondik hasi. Guk katalogoaren barrenak ederki ezagutzen dituen KM-ko zuzendari Frantxis Lopez de Landatxe gidari dugula webgunean ikusmira praktikoa egitera gonbidatea egiten diegu irakurleei. Barruan badago zer ikusi: liburu digitalizatuak, eskuizkribuak, gai desberdinei buruzko mikrowebguneak... Sartu eta saltseatu gurekin!
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
