euskal diaspora eta kultura
2009/06/01
Urteko Ohiko Batzar Orokorra egin du Necocheako Euzko Etxea-k eta, espero zitekeenez, bildutakoek euskal elkarteko buruzagitzan urte asko daraman Felipe Muguerza hautatu dute berriz lehendakari. FEVAko presidente ere izana den Mugerzarekin batera honako hauek arituko dira agintealdi berrian Zuzendaritza Batzordekide: Jose Antonio Alustiza, lehendakariorde; Ricardo Esnaola, idazkari; Mirta Garrido, idazkariorde; Horacio Yacomini, diruzain; eta Jose Luis Picardi diruzainorde, besteak beste.
2009/06/01
Zazpigarren urtea bete du Argentinako Rosarion, bertako Zazpirak Bat Euskal Etxeak sustatu eta gauzatuta bertako uhinetara astero jalgitzen den 'Euskaldunaren Hitza' irratsioak. Emankizuna Zazpirak Bat-en iritzi eta pentsamoldeen adierazle da eta asteazkenero entzun daiteke eguerdiko ordu batetik ordu biak arte LRA5 Radio Nacional Rosario irratiaren bidez AM 1300 eta FM 104,5 maiztasunetan, zuzenean, baina baita ondotik ere errepikatua astebetez Zazpirak Bat-en webgunean.
2009/05/29
1875ean Euskal Herria utzi eta Argentinara emigratu zuen Alza-Elosegi familiako lehenengo kideak, Pedrok, ez zuen batere pentsatuko 134 urte geroago bere eta bere senideen ondoko argentinarrek familia izpirituari eutsi eta urtero biltzeari ekingo ziotenik. Joan den maiatzaren 10ean, Irungo baserri batean jatorria duen familia honetako adar argentinarrak bere III. bilkura egin zuen, 170 bat pertsona bilduz. Guztiak, Pedro, Juan Mari, Francisco, Gabriela Josefa eta Manuel Alza Elosegiren ondokoak ziren, hiru lehenak Ameriketara etorriak, eta bi azkenak Irunen gelditua, nahiz eta euren seme-alabetako batzuk geroago Argentinara etorriko ziren.
2009/05/29
'Euskaldunen ordua' da astero Nekane Olazar-ek Buenos Aires probintzia argentinarreko General Villegas herritik aireratzen duen ordubeteko euskal irratsaioaren izena. Ostiral arratsaldero, lauetatik bostetara, euskal argentinar gizataldeko kide dinamiko honek mikroa hartu eta inguruko euskaldun eta ez euskaldunei zuzentzen zaie Euskal Herriaz, euskal kulturaz eta euskal errealitateko hainbat alderdi aipatuz. Joan den astean, esaterako, egungotasunak agintzen zuen, eta 'Villegasko Euskaldunak' Euskal Etxean egun batzuk lehenago izaniko hauteskundeez mintzatu zitzaien, programara ekarri zuelarik Diego Tellechea, elkarteko lehendakari hautatu berria.
2009/05/28
Joan den igandean, maiatzaren 24an, hil da Arrecifes-en Elsa 'Mimí' Moisello Zabaleta, Euskaldunak Denak Bat Euskal Etxeko engaiamendu handiko kide eta azken urtean bertako idazkaria izan dena. "Mimik, txikitan, ez zuen Euskal Etxeko ekimenetan parte hartzeko aukerarik izan", azaldu diote bere lagunek EuskalKultura.com-i. Horregatik, "duela hamar bat urte Euskal Etxera hurbildu zen eta gogo handiz hasi zen lanean Zuzendaritza Batzordean. 'Txiki Zaharrak' izeneko helduen dantza taldean sartu zen, eta baita euskara klaseetan ere." Lagun ugari zeuzkan pertsona, Euskal Etxeko kideek azken agur hunkigarria eman diote herriko kanposantuan joan den astelehenean hain lagun maitagarria izandakoari.
2009/05/28
Zuzendaritza Batzordea berritu du La Platako Euzko Etxeak. Barne araudiek diotenaren arabera eginiko Ohiko Biltzar Orokorrak, elkartearen baitan eginiko hauteskundeen ondotik, orain arte lehendakari izan den Javier Clua hautatu du berriz ere lehendakari. Berarekin batera arituko dira besteak beste Zuzendaritza Batzordean Jorge Batiz, lehendakariorde; Jose Orbaiceta, idazkari; Maria Fernanda Astigarraga, idazkariorde; Miren Torre, diruzain; eta P. Pulido, diruzainorde.
2009/05/28
Nevada-Renoko Unibertsitateko (UNR) Liburutegiaren Euskal Adarrak, euskal liburu eskaintza bat egin nahi die munduko Euskal Etxeetako liburutegiei, euskal liburu sortak dohainik jaso ditzaten, lekuz aldatu berria den liburutegi renotarrak gehiago espezialdu baitu bere fondoa, eta orrazketa bat egin ondoren oso baldintza onetan daukan liburu andana geldituko baitzaio, tokirik gabe egungo leku berrian. Eskaintza, Euskal Etxeetako liburutegiei dago egina. Liburuak euskaraz --gehienbat-- eta gaztelaniaz dira, bereziki haur eta gazte literaturakoak. Interesa izango bazenu, ikus segidan nola sartu zeure euskal liburutegia, oso gutxitan ikusten den honelako eskaintza batean.
2009/05/27
Las Floresko 'Loretako Euskaldunak' Euskal Etxe argentinarrak Urteko Ohiko Biltzarra egin du joan den ostiralean, maiatzaren 22an, eta iazko kontu ekonomiko eta orokorrak onestearekin batera, FEVAk nazio osoko euskal etxeentzat eginiko bazkide txartelak banatu zituen eta, besteak beste, bertako Euskal Etxearen 13 urteak iruditan azaltzen dituen DVD bat exteratuko diela agindu die bazkide guztiei. Agintariak berritzeko hauteskundeetan, Graciana Goicoechandia berrautatu zuten bildutakoek lehendakari eta Zuzendaritza Batzordeko buru.
2009/05/27
Jantoki berri bat inauguratu zuen joan den otsailean Tandilgo Euskal Etxeak. Hiru bazkidek --Jorge Cavigliak, Javier Legarretak eta Eneko Elejaldek-- daramate proiektua aurrera, eta “poz-pozik daude, ireki dutenetik jendea oso gustura ateratzen delako”, adierazi diote euskal etxekoek Euskalkultura.com-i. Jatetxe berria euskal etxeko egoitzaren barruan dago, Sarmiento kaleko 1079.an, eta asteazkenetik iganderako ordutegian ematen ditu Euskal Herriko plater tipikoak. Gisa honetara, beste proposamen gastronomiko bat sortzen da Tandil hirian eta euskal komunitatean: Sukalde.
2009/05/26
Patxi Lopez lehendakaria buru izan duen Eusko Jaurlaritzako Gobernu Kontseiluak gaur astearteko bileran hartutako erabakien artean, Lehendakaritza arloko zenbait kargutik kentze edo zese onetsi ditu. Prebisioen arabera aste honetako ostiralean Aldizkari Ofizialak argitara emango dituen kentze hauek Kanpo Harremanetarako Idazkaritza Orokorrari dagozkio, eta duela gutxi arte Kanpo Harremanetarako Idazkari Orokorra zen Iñaki Agirreren kentzearen jarraian datoz, hura bezala Ibarretxeren Administraziopean eginiko izendapenei dagozkielarik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
