euskal diaspora eta kultura
2009/07/01
'Etxe hau, maitasunez eta errespetuz, euskaldun guztien aterpe izango da, inongo bereizkeriarik gabe'. Elkarte antolatzailearen ezaugarriei buruzko adierazpen honekin ekin zion María Elena Etcheverry Eusko Kultur Etxearen lehendakariak, joan den asteko asteazkenean, ekainaren 24ean egin zen euskal kultur ekitaldiari. Eusketxeren egoitza txikia geratu zen bertaratutako guztiak biltzeko, baina gonbidatuak zein antolatzaileak asmatu zuten moldatzen ikuskizuna eta oro har programa osoa ondo ikusteko, eta afaltzeko orduan zerbitzatu zen euskal menua dastatzeko. 'Jende berri asko etorri da. Batzuk lehenengoz zetozen gure egoitzara eta zeharo harritu dira bizi dugun giroa ikustean. Hori guretzat ezin da pozgarriagoa izan', aitortu dio Etcheverryk EuskalKultura.com-i.
2009/07/01
Plazaratu berria da '50 años de Misión Diocesana de Navarra 1958-2008. Una iglesia comprometida con los más pobres', izenburuak dioen moduan misiolari nafarrek azken berrogeita hamar urteotan munduko hainbat herrialdetan bertako behartsu eta txiroekin egin duten lanaren isla ematen duen liburua. Valentin Eguilaz eta Pilar Ripak koordinaturik, liburuak istorio eta bizimodu horren zuzeneko lekukotasuna dakar, hitza ematen baitie misiolari ari diren berrogeita hamar gizon-emakume nafarreri, bakoitza bere ezaugarri eta pentsamoldeekin, eta lan horren alderdi desberdin baten lekukotasun emaile. Nafarroak segitzen du izaten gaur egun ere Euskal Herriko eta estatuko misiolari gehien daukan lurraldea.
2009/07/01
Elkarteko barne araudiak dioenari jarraiki, Zuzendaritza Batzordea berritu du Argentinan Buenos Aires Hiri Autonomoko Eusko Kultur Etxea-Casa de la Cultura Vasca erakundeak, Eusketxe izenaz ezagunagoa. Agintealdi berrian Maria Elena Etcheverry izango da lehendakari, Roberto Aguirre lehendakariorde, Maria Echevarne idazkari, Maria Luisa beheran idazkariorde, Silvya Saenz diruzain, eta Ernesto Ortiz de Guinea diruzainorde, beste zenbait karguren artean.
2009/07/01
Bere atzoko edizioan argitara emaniko ohar batean, Saladilloko ABC-Saladillo egunkariak 'Itxaropen' Euskal Etxeak herriko Zaharren Egoitzari eginiko dohaintza aipatzen du. Berez, Euskal Herritik, Oñatiko herritik datorren laguntza bat da, oñatiarrei hala eskatua, aurtengo negua biziki hotza izaten ari baita Argentinan eta Zaharren Etxean ohe-gain egokien faltan baitzeuden. Saladilloko Euskal Etxea bitartekari, posible izan da oihalok lortzea eta ohe-gainak egitea, dagoeneko euren funtzioa betetzen ari baitira egoitzako egoiliarren oheetan.
2009/07/01
Informazioak Diasporako geure irakurleen artean interesa sor dezakeelakoan, Iruñea-Tuterako Artzapezpikutzaren barrutiko [urteak dira Iruñeko artzapezpiku kargua eta Tuterako apezpikutza, bi karguak, Iruñeko artzapezpikuak daramatzala] misiolari edo misionisten zerrenda ekarri dugu hona, pertsona bakoitzaren izen-deitura, jatorri, jaiotze-urte eta lanean ari den herrialdea, eta eliz-taldea zehaztuz.
2009/06/30
Elkarteko barne agintzaritza eta Zuzendaritza Batzordea berritu ditu Coronel Dorregoko 'Denak Elkarrekin' Euskal Etxeak, Argentinako Buenos Aires probintzian. Ohiko Batzar Nagusiak erabakitakoaren arabera, Ernesto Martin Errazquin da 2009-2010 eperako lehendakaria, eta berarekin batera arituko dira, besteak beste: Juana Isabel Errazquin, lehendakariorde; Velia Olabarria, idazkari; eta Ana Maria Claverie, diruzain.
2009/06/30
Bordeleko Euskal Etxeak ospatu berri du ekainaren 21ean, seigarren urtez, 'Fête de la Musique' jaialdia. Ekimen berezia da, euskaldunen musika eta dantza karrikaratzen baitira Bordeleko Eskualduna plazan. Aurtengo berrikuntzen artean, orain hiru hilabete Euskal Etxean sortua den Xitoak taldearen dantza ikuskizuna. Euskal Etxeko gaztetxoenek osatzen dute talde hau, tailer gisa antolaturik. Euren helburua, euskal dantza, musika, hizkuntza eta kultura jolas giro alai ederrean ikastea.
2009/06/30
Argentinako hainbat euskal etxetan helduei eskaintzen zaizkie batez ere euskara eskolak. Beste leku batzuetan, euskal etxeen hazia eta etorkizuna umeak direla pentsaturik, nahiago dute umeekin aritu eta haiekin urratzen dituzte euskararen bideak. Bi jarrerak, kontrajarriak ezezik, osagarriak ere badira. Haurrei dagokienez, gaur egun gero eta txiki gehiago hurbiltzen dira euskal etxeetara bai euskara bai dantzak eta kantak ikastera. Halaxe gertatzen da Río Coloradoko eta Carmen de Patagones-Viedmako kasuetan. Apirilean hasi zituzten klaseak Rocio Basterra euskara irakaslearen ardurapean.
2009/06/29
Badirudi aste honetan zeozer mugituko dela Eusko Jaurlaritzan Kanpo Harremanetarako gauzei dagokienean. Guillermo Echenique sozialista gipuzkoarra, egun 'Bidasoa Activa', Irun Hondarribiako garapen ekonomikorako elkarte publikoko kontseilari delegatua dena, izendatuko du bihar Eusko Jaurlaritzako Gobernu Kontseiluak Kanpo Harremanetarako Idazkari Nagusi, aurreko exektiboan Iñaki Agirrek zeraman lanpostuaz arduratzeko, alegia.
2009/06/29
Datorren ostiral arratsaldez hasiko du Buenos Airesko Nafar Etxeak aurtengo sanferminetarako jai programa. Ekitaldi nagusiak uztailaren 7an, San Fermin parrokia egingo den meza batez, eta uztailaren 9an egun osoz --Independentziaren eguna baita, jai eguna Argentina osoan-- ospatuko dira, tartean dantza-ikuskizuna, musika eta festa giroko Oturuntza Handi bat. Rosarion, bestalde, Carmita Batlek duela 39 urtedanik Nafar Etxeari loturik zuzentzen duen 'Horizonte Español' irratsaioak txupinazoa emango du zuzenean eta Barcina alkate iruindarra eta Sanz presidente nafarra elkarrizketatuko ditu, igorri digun ohar batean esaten duenez.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
