euskal diaspora eta kultura
2009/09/21
Mar del Platako Denak Bat Euskal Etxeak abiarazi du dagoeneko aurtengo Aralarko San Migel jaiak eta elkartearen 66. urteurrena (1943-2009) ospatzeko ekitaldia egitaraua. Ekitaldiak joan den asteko asteazkenean hasi ziren 66. Urteurreneko Pilota Txapelketaren sari banaketarekin eta urriaren 17an amaituko dira, izan ere elkartearen egoitzan egingo den euskal erromeria batekin, gastronomiak eta familientzako ekimen batez eta gazteriarentzako dantzaldiaz.
2009/09/21
Gainerako herritarrak lagun ospatu zuten Jose C. Paz herri argentinarreko 'Toki Eder' Euskal Etxeko bazkideek euren elkartearen hamahirugarren urtemugaren jaia, irailaren 13an. Bertako Altube Klubean izan da aurten ere hitzordua. Areto erraldoi honetan, eta eguerdi aldera, EEko bazkide talde batek prestatutako paella prest zegoen gonbidatuek dasta zezaten. Bazkariaren ondoren, dantzen eta musikaren txanda heldu zen. Maria Angeles Oñederra Euskal Etxeko lehendakariak erakundearen historia kontatu zion bildutako jendeari eta albiste bat ere eman zuen: datorren urtean Oñati eta Jose C. Pazen arteko Senidetzearen Plaza inauguratuko dela.
2009/09/21
Aurrera segitzen du Cordoba hiri argentinarrean bertako Baietz euskal folk musika taldeak euskal musika eta instrumentuez antolatutako kontzertu zikloak. Joan den ostiralean, irailak 18, Bizkaiko musika nolde eta tresnei eskaini zioten Cordobako 'Gure Txokoa' Euskal Etxearen egoitzan emandakoa. Besteak beste, euren moldaketa berezi bat daraman Gernikako Arbola kantatu zuten, bertaratutakoak hunkituz.
2009/09/20
Laugarren urtez antolatzen den artzain amerikanoen bestak Auritz izango du gaur biltoki, bertako pilotalekura bostehundik gora jende bilduko dituelarik Udalbide, Artzain Mundua, Auritz-ko Udala eta Nafarroako Gobernuaren eskutik eratua den egun osoko ekitaldian. 'Ibañetako artzain irrintzia' lelopean, egunari goizeko hamarretan emango zaio hasiera, harrera eta mezarekin. Luzaideko Bolanteak eta bertsolariak izanen dira segidan, eta erakusketa bat zabalik goiz osoan. Seguruenik berritasunik aipagarriena, antzerki baten plazaratzea izanen da, 'Nevadara joan nintzen emakumeak bakarrik utzita' izenburuz artzain baten istorioa kontatuko baita, bertan gibelean etxearen eta familiaren ardurarekin utzitako emazte edo emakumeen lan gogorra aipatzen eta nabarmentzen delarik.
2009/09/18
Buenos Aires probintziako Necochea herriko 'Osasuna' otxotea bihar larunbata arituko da kantari Chivilcoy-ko 'Beti Aurrera' Euskal Etxeak antolatu duen afari-show-ean. Ekitaldia euskal etxe honen egoitzako areto nagusian gauzatuko da, urtean zehar daraman egitarau aberatseko parte, eta ehundaka pertsonen partaidetza espero da, afariaz gozatzearekin batera otxoteak eskaintzen duen errepertorioko kantuak entzun eta kantatzeko. Osasuna otxotea 1990eko hamarkada hasieran jaio zen Necocheako Euzko Etxea-ko Txoko Txikiren gerizpean, festa giroan sartu eta bazterrak gisa herrikoian alaitzeko.
2009/09/18
Aspaldian Kaliforniako San Diego inguruan bizi bazen ere, Idahoko euskaldunen artean Euskal Herritik euren bigarren apaiz euskalduna izateko propio heldu zen bigarren abadea bezala zen ezaguna. Aita Patxi Aldasoro Iparragirre joan den ostiralean hil zen El Centro, Kalifornian, 87 urte zituela. Azkeneko sei urteetan, tronbosiak jo ondoren, mugimendua murriztua zeukan, baina burua argi mantentzen zuen. Omenaldien lagun ez bazen ere, 1999an, AEBetan euskaldunen apaiz izandako gainerako abadeekin batera, plaka eta ohoratze berezia jaso zuen Renoko Aste Nagusi eta NABO Jaialdian, eta 2000eko Boiseko Jaialdin hartu zuen parte. Bere aldeko elizkizunak atzo egin ziren Kalifornian eta datorren 27an, igandea, egingo dira bere jaioterrian, Gipuzkoako Mutiloan.
2009/09/18
Paraná-ko Urrundik Euskal Elkarteko dantzari eta musikari entrerriostarrak partaide izan ziren joan den irailaren 6an, igandea, euskal gizataldeko ordezkari, euren probintzia bereko San Benito herrian, Immigrantearen Eguna dela-eta antolatutako ekitaldietan. Bosgarren edizioa bizi izan du aurten, Paraná hiriburu probintzialetik 12 bat kilometrotara kokatuta dagoen hiri honetako Gizataldeen festak. Euskal dantzariek kabalkadan parte hartu eta euskal dantzen emanaldi bat eskaini zuten. Elkarte bereko kide diren Juan Carlos Borras-ek eta Oscar Giles-ek, euren aldetik, gitarrak lagundurik folklore argentinarreko zenbait pieza jo zituzten.
2009/09/17
Hamarkada bat pasa ondoren, Euskal Astea Bahia Blancara itzuliko da aurten eta Argentinako euskaldun-argentinar guztiak biltzen dituen jai honen antolakuntza bertako Union Vasca Euskal Etxearen esku egongo da. Urriaren azken asteburuan Buenos Aires probintziako hiri honetara bertaratzen direnek Euskal Herriko kulturaz gozatzeko aukera izango dute, musikan, dantzan, artean eta beste zenbait arlotan ere. Union Vascak eta FEVAK bultzatutako lehiaketak eta jarduerak abian daude jadanik. Artikulu honetan horien berri zehatz ematen dizugu. Gogoan hartzeko gauza garrantzitsu bat epearena da: lehiaketa guztietan irailaren 26an bukatuko da, esan nahi baita datorren asteko larunbatean.
2009/09/17
Irailaren 5ean, Bahia Blancako Union Vasca Euskal Etxeak hamazazpi kolektibitate ezberdineko ordezkariak bildu zituen Gizatalde Liburutegien I. Erakusketan. Aurretik eginiko bilkuretan ez bezala, honetan, liburuzainekin batera, publiko orokorrak ere hartu ahal izan zuen parte. Ekitaldiaren arrakasta liburutegietako arduradunek egindako lanaren ondorioa izan zen. Agian horregatik Bahia Blancako komunitateak saritu du erakunde antolatzailea: alde batetik, eta 311-7677-2009 espedientea medio, Erakusketa 'udal intereseko ekintza' deklaratu zuten; bestetik, herriko 'Asociación de Cultura Inglesa'-k, Historia de la Asociación bahiense de Cultura Inglesa 1942-1992 delako liburua oparitu zion Union Vascari.
2009/09/17
Cesar Arizmendi lehendakari hautatu zuten abuztuan Santa Cruzeko 'Hegoalde Argentinarra' Euskal Etxekoek, Patagonia argentinarrean. Abuztuko azken asteburuan, harrera ekitaldia egin zioten astebete lehenago Biltzar Nagusiak hautatutako zuzendaritzakoei. Egoitza eta lehendakari berriarekin batera, hainbat gauza berri ari dira prestatzen, hala nola Misionesera 'Gora Vasco!' filma ematera bidaiatzea, Euskal Asterako bidaia, euskal laburmetraia ziklo bat, hitzarmena Unibertsitate Teknologikoarekin, Mus txapelketa bat eta, esaterako, omenaldia Alberto Marucco Barragan bazkideari, Santa Cruzeko Giza Eskubideen Estatu Idazkaritza sortzen eta garatzen egindako lanagatik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
