euskal diaspora eta kultura
2009/10/28
Espainiako Euskal Etxeen 'Euskal Herria' Federazioa osatzen duten zortzi euskal etxeetako ordezkariak Gasteizen bildu dira joan den ostiralean, lan-jardunaldi bat egitearren euren artean eta Julian Celaya Jaurlaritzako Euskal Gizataldeekiko Harremanetarako zuzendariarekin. Bileraren ondotik, euskal etxeetako ordezkariak Santa Mariako Katedraleko obrak bisitatu zituzten, bisita gidatu batean.
2009/10/28
2010eko udan (urtarrila hala da Argentinan) egingo da lehenengo aldiz, gisa honetan bederen, Udaleku bat Argentinan. 'Zingirako Euskaldunak' Euskal Etxeak antolaturik hamabi eta hamasei urte arteko berrogeita hamar bat gazte bilduko dira urtarrilaren 4tik 11ra Buenos Aires hiriburutik 120 kilometrotara dagoen Chascomus herrian. Euskal jatorriko partaideei zuzenduta egon arren, aukera honetan ahalmen bereziko haurrek, baita arrisku egoeretan bizi diren umeek ere parte hartu ahal izango dute. Proiektuari aurre egiteko, antolatzaileek Gipuzkoako Foru Aldundiaren laguntza jasoko dute eta horrekin batera Euskal Herriko 'Eziko Udalekua' erakundeko bost begirale etorriko dira herriko irakasle eta euskal etxeko dantzariekin batera ekintzak antolatzera.
2009/10/27
Euskaltzaindiak Plazaberri, Akademiaren albiste gunea, aurrerantzean paperezko formatuan argitaratuko du. Bestalde, hemendik aurrera baita ere, Euskaltzaindiaren argitalpen guztiak Espainiako Editoreen Elkarteetako Federazioaren 'Dilve' zerbitzuan kontsultagai izango dira.
2009/10/27
Arrakasta handiz amaitu da Bartzelonan, bertako Euskal Etxean antolaturik, oroimen historikoaren inguruko zikloaren lehenengo saioa, 'Ez ahaztu / No oblidem' izenaz ezagutzen dena. Aurtengoan bi astetan banatu da zikloa, horietarik lehenengoa urrian izan delarik eta bigarrena, ostera, abendurako iragarririk.
2009/10/27
Iaz Estatu Batuetan izan ondoren Euskal Diaspora ikertzea xedea duen ikerketa hau Argentinara heldu da Euskal Herriko Unibertsitateko Adrian Odriozola eta Jose Aznar ikerlari gazteen eskutik. Zientzialariek 1000 listu lagin lortzeko asmoa daukate eta horretarako Argentinako hainbat euskal etxe bisitatzen ari dira. Jadanik Buenos Airesen izan dira eta geroztik geldialdi askotako bidaia bat hasiko dute. Gral Rodriguez, Moreno, José C. Paz, Ayacucho, Tandil, Mar del Plata, Necochea, Tres Arroyos, Cnel Dorrego, Bahía Blanca, Cnel. Pringles, Laprida, Azul, Las Flores, Saladillo, Chivilcoy, Chacabuco, Arrecifes, San Nicolas, Rosario, Parana, Concordia, eta Chascomus dira orain arte konfirmatuta dauden hiriak. Gaur Mar del Platan daude. Multzo honetatik kanpo geratzen diren euskal etxeak ere laginak hartzeko aukera izango dute.
2009/10/26
Lau hilabete pasexe daramatza karguan Guillermo Echenique Jaurlaritzako Kanpo Ekintza idazkari nagusiak. Denbora honetan, NABOren Biltzar Nagusian partaide izan eta Estatu Batuetako euskal etxeak bisitatu ditu, eta Lopez Lehendakaria ere lagundu izan du Bruselara egindako bidaian. Urriaren 14an, Echeniquek bere ardurapeko sailaren lerro nagusiak aurkeztu zituen Eusko Legebiltzarrean, eginkizun dituela, besteak beste, munduan dauden Euskadiren Ordezkaritzak eta munduko euskal etxeak. Echenique EuskalKultura.com-ekin solastu zen joan den asteartean, segidan argitaratu dugun elkarrizketa emanez.
2009/10/26
Buenos Airesko Laurak Bat Euskal Etxeko Zuzendaritza Batzordeak lehia pribaturako deialdia egin du, etxeko (Belgrano 1144) buffet eta jangela zerbitzua urtarriletik aurrera eskaini nahi dutenek aurkez daitezen. Xehetasun eta jakingarri gehiago elkarteko Idazkaritzara deituz edo e-maila bidaliz.
2009/10/26
“Hitzak, hitzak, hitzak… besterik ez”, William Shakespeare-ren aipu
famatua eta enigmatikoa erabili du International Pen Club-ak bere 75.
Kongresuan, Austriako Linz hirian --Europako Kultura Hiriburua aurten-- urriaren
19tik 25era bitartean. Nazioarteko mailako idazle erakunde handienaren
ardatzak ez dira hitzetara besterik mugatuko, hitzak profitatuko diren arren:
adierazpen askatasunaren alde erreferentzia bihurtu da mundu mailan PEN
Club 1926 urtean sortu zenez geroztik; jazarpena eta kartzela jasaten dutenen
idazleekiko elkartasuna adierazi du behin eta berriz azken 50 urteotan hitz eta
ekintzen bitartez ('Writters in Prision' Batzordeak 50. urteurrena betetzen du
Manolis Glezios Greziako idazle atxilotuari babesa emateko sortu zenetik).
2009/10/26
Berrehun lagunetik gora partaide ospatu zituen Rio Cuartoko 'Gure Ametza' (sic) Euskal Etxeak, Cordobako probintzia argentinarrean, elkartearen lehenengo 15 urteak. Euskal Etxearen egoitzako areto nagusira bildutakoek afari goxoa dastatu ahal izan zuten, euskal etxearen 15 urteko ibilbidea azaltzen zuen dokumental bat ikustearekin batera. Gauak ondoko Villa Mariako dantzarien emanaldia ere ekarri zuen. Giroa, egokia suertatu zen 'Gure Ametza'ren webgunea aurkezteko, Iñaki Bilbaok egina.
2009/10/23
Iñaki Galdos, Gipuzkoako Foru Aldundiko Kiroletako eta Kanpo Ekintzako diputatua, Argentinara abiatuko da datorren asteartean, asteburuan Bahia Blancan egingo den Euskal Astean parte hartzeko. Bahia Blancan, Foru Aldundiaren eta bertako Union Vasca Euskal Etxearen arteko lankidetza akordioa sinatuko du, 'Semana Vasca'ko erakunde laguntzaile denez gero. Galdosek zenbait kontaktu garatuko ditu Argentinan eta besteak beste, Chascomús bisitatuko du, herri horretan datorren urtarrilean, Zingirako Euskaldunak EEak antolaturik egingo den euskal udalekuko babesle baita.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
