euskal diaspora eta kultura
2017/05/24
Buenos Aires probintziako hainbat euskal etxe bisitatu ditu azken boladan Eusko Jaurlaritzaren Argentina eta Mercosurrerako ordezkari Sara Pagolak. Trenque Lauquen hirian, Euskal Sustraiak Euskal Etxeko kideekin elkartzeaz gain prentsaurreko bat eskaini zuen hiriko hedabideen aurrean. Pagolaren bisitaren ostean Euskal Etxearen 19. urtebetetzea ospatu zuen euskal gizataldeak, instituzioa sortzen lagundu zutenak gogoan.
2017/05/24
Elkarteko barne araudiak agintzen duen moduan, bere Batzar Nagusia bildu du Montevideon hiriburu uruguaitarreko Euskaro Etxeak (Centro Euskaro), besteak beste bere Zuzendaritza Batzordea berritzeko. Hauteskundeak eginik, Silvia Ortone Enderizek segitzen du Montevideoko euskal etxe zaharreneko buru.
2017/05/23
Urkullu lehendakariak bidaia egingo du Kolonbiara datorren astelehenetik aurrera,Tapia sailburu ekonomikoarekin batera eta euskal enpresa ordezkaritza baten buru. Izaera zinez ekonomiko eta enpresariala duen ostera honetan lekua egingo dio, dena den, bertako euskal komunitatearekin biltzeari eta, Jaurlaritzatik jakinarazi duetenez, bisita luzatuko die Bogotako Euskal Etxeari eta honen ondoan kokatzen den hiriko Gernika parkeari.
2017/05/23
Bere historiako uholde handienak pairatu zituen martxo erdialdean Comodoro Rivadaviak, eta oraindik erraz antzematen dira kaleetan hondamenaren ondorioak, pixkanaka eta oso poliki ari baita hiria bere onetara bueltatzen. Lehenbailehen normaltasuna berreskuratzea lehentasun ikusten da, baita ere poza, alaitasuna eta libertimendu momentu goxoak pasatzeko paradak eskaintzea. Euskal Echea elkartearen kasuan ere, zenbait astez aktibitaterik gabe egon ondoren, bere 94. urteurrena ospatzeko elkarretaratzea antolatu zuen joan den asteburuan Comodoroko Euskal Etxeak.
2017/05/22
Bere azken astera iritsi da Bartzelonan, bertako Euskal Etxea antolatzaile garatzen ari den Literaldia. Gaur bertan "Hitz egin al du euskal literaturak euskal gatazkari buruz?" gaia jorratuko da Sant Gervasi liburutegian, eta bihar Kirmen Uriberen "Mentrestant agafa'm la má" eleberria aztertuko dute, azkeneko bi ekitaldietan "Euskara kolokiala, euskara koloniala" titulu sujerentea izango duen hitzorduari ekiteko, euskaldunak komikigintzatik begiratzeko gaur zortzi, hondarreko bi saio hauetan Asisko Urmeneta tarteko.
2017/05/22
Aurten zazpigarrenez, Etxepare Euskal Institutuak, Euskal Herriko Unibertsitatearekin lankidetzan, "Excellence in Basque Studies" bi eguneko ikastaroa eskainiko du atzerrian euskara eta euskal kultura irakatsi nahi dutenei zuzenduta, EHUko Udako Ikastaroen eskaintzaren baitan. Uztailaren 10 eta 11 bitartean Donostiako Miramar Jauregian gauzatuko da ikastaroa, eta izen ematea zabalik dago jada, maiatzaren 31era arte prezio murriztuan.
2017/05/22
Orain arteko kudeaketari oniritzia eman eta jarraipena eskaintzea erabaki zuten tandildarrek euren Euskal Etxearen azkeneko Batzar Nagusian eta ondorioz, hala bozkatuta, Marily Harguindeguyk segituko du lehendakaritzan bi urte gehiago. Euskal Etxean egiten dituzten aktibitateek ere ber gisan jarraituko dute, erritmo bizian gainera. Dantza, euskara, pilota eta sukaldaritza arloetako proposamenez gain, ‘Mujeres en Concierto’ (Emakumeak Kontzertuan) ikuskizunaren agertoki izango da Gure Etxea datozen asteetan. Honekin batera, ostiralean jokatutako Mus Txapelketaren emaitzak jakinarazi dizkigu Gure Etxeak.
2017/05/19
Proposamen interesgarria, maiatzaren 24, 25 eta 26rako --datorren asteko asteazken, ostegun eta ostiralerako-- Iruñea eta Lesakatik datorkiguna. Interesgarria, bertaratzeko aukera daukatenentzat, baina baita ere ekitaldia zuzenean internet bidez segitu nahi dutenentzat, Diasporatik esaterako. Jarduerak "Engraxitik Garazira, Izenen misterioa Nafarroan" du izena eta Nafarroako Unibertsitatetik datorkigu, Nafarroako Gobernuaren eta Iruñeko Udalaren babes eta lankidetzarekin, dohanik.
2017/05/19
Ospakizun erraldoia antolatu zuen, Andeak zelatari, Rio Negro probintziako Bariloche hiriko Udalak, bere urtebetetze berria ospatzeko. Hiriaren eguneroko jarduna osatzen duten ehun bat erakundek hartu zuen parte ekitaldietan, tartean, eskolak, elkarte zibilak, gizataldeak, klubak eta indar biziak oro har. Kolektibitate kanpotarren kasuan, hiriko "Mendiko Eusko Etxea" Euskal Etxeak bermatu zuen euskal jatorrizkoen presentzia udal mailan ospakizun nagusia den urteurren festan.
2017/05/18
Joan den asteartean, aurrenekoz, elkarrekin bildu ziren Nafarroako Gobernuko eta Eusko Jaurlaritzako Diaspora arloko arduradunak. Nafarroako Gobernutik, parte hartu zuten Herritarrekiko eta Erakundeekiko Harremanetarako kontseilari Ana Ollok eta Komunikazio eta Erakunde Harremanetarako zuzendari nagusi Pello Pellejerok; Jaurlaritzatik, Kanpo Harremanetarako idazkari nagusi Marian Elorzak eta Kanpoan den Euskal Komunitatearentzako zuzendari Gorka Alvarez Aranburuk.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
