euskal diaspora eta kultura
2009/01/28
Leandro Etchichury antropologo euskal argentinarrak izenburu osoa 'Patria vasca y libertad. Política, identidad y violencia en el occidente europeo' (Euskadi eta askatasuna. Politika, identitatea eta bortxa europar mendebaldean) duen liburua plazaratu du Buenos Airesen, Eudeba argitaletxearen eskutik. Lanak "argitaletxeari 2005 urte hondarrean eginiko proposamen bat dauka atzean, 'euskal gatazka' delakoari buruzko materiala sortzeko, adieraziz zer den eta ze jokabidea izan duen bere baitan Euskal Nazio Askapenerako Mugimenduak (ENAM, MLNV)". Egilearen esanetan, honela sortu zen obra, eta gaiarekiko "sarbide gisako ikerlana bada ere", bera "pixka bat haratago joaten" saiatu da.
2009/01/28
Eusko Jaurlaritzak sustatzen duen Diasporako gazteentzako trebakuntza programak, Gaztemunduk, munduko euskal kolektibitateen argazki artxiboen kudeaketa eta EuskalEtxeak.net webgunearen bidez euren hedapena izango ditu ardatz aurten, ekimenaren arduradunek jakinarazi dutenez. Aurten gainera, 50 gaztek parte hartu ahal izango dute Gaztemundun, aurreko edizioetako 30 lagunen kopurua nabarmen gaindituz. Ekimen honetan parte hartzen duten gazteek uztaila edo abuztua aldean bi aste igaroko dituzte Euskal Herrian trebatzen. Parte hartzeko gazte bakoitzak 150 argazkiren ekarpena egin beharko du, material horrekin lan egin ahal izateko.
2009/01/28
Euskal Herria Mugaz Gaindi VI. Nazioarteko Mintegiak data eta lekua du jada: irailaren 29tik urriaren 2ra bitartean izango da, Deba Goienan (Arrasate, Aretxabaleta, Eskoriatza eta Aramaio). Oraingo honetan nazioarteko topaketaren asmoa ikuspegi anitzetatik jorratuz, euskal migrazioen garrantzi historikoa eta gaur egungo euskal diasporaren egoera aztertzea da. Parte hartu nahi dutenek lanak bidaltzeko epea martxoaren 31a bitartean dute irekita.
2009/01/27
Corpus Christi Euskal Etxeak, Argentinako Misiones probintzian, hiru urte bete zituen iazko abuztuan eta 2009ko ekitaldia hasi aurretik elkarteak iazko ekimenen balioespen oso baikorra egin du. Elkarteak gauzatu dituen proposamenen artean, hitzaldiak eta inguruetako euskal historia eta kulturaren zabalkuntza aipagarriak dira, besteak beste. Olga Leiciagak, elkarteko presidenteak, iazkoan egin dituzten hainbat ekimenen argazkiak bidali dizkigu, urteko une azpimarragarrienetako batzuk gogora ekarriz.
2009/01/27
Lapridako Arturo Campion Ikasguneak, Argentinan, urteroko bere Bilkura Orokorra datorren martxoaren 14 eta 15an, larunbat-igandea, egingo duela iragarri du, aterpe ematen dion Lapridako Euskal Etxeak bere XX. urteurrena ospatzeko antolatzen ari den egitarauaren barne. XIX. mendean nabarmendu zen euskaltzale eta kulturgile nafarraren izena hartzen duen kultura elkargune honek bere seigarren urtea beteko du aurten 2003an irakasle euskalargentinar talde batek sortu zuenetik.
2009/01/26
Euskararen arloan bide berriak irekitzen ditu gaur Eusko Jaurlaritzako eta Nafarroako Gobernuko Hizkuntza Politika arloetako arduradunek sinatu duten lankidetza hitzarmenak. Hitzarmena euskararen sustapenerako Asmoen Aitorpen bat da eta hizkuntza bi lurraldeen ondare bezala gorde eta biziberritzea du helburu. Hitzarmenak aintzat hartzen ditu eskualdeetako edo eremu urriko hizkuntzen Europako Gutunaren 2005eko jarraipen txostenean egindako gomendioak.
2009/01/26
New Yorkeko neguaren hotzak ez zuen Ainhoa Arteta sopranoaren zirrara epeldu, ezta gutxiago ere. Esker onez eta hunkituta, Artetak 'La vida' diskoarengatik platinozko diskoa jaso zuen Cervantes Institutuaren egoitzan, Eduardo Lago erakundeko zuzendariaren eskutik. Soprano donostiarrak azaldu zuenez Vale diskoetxea (Universal Music konpainiaren parte) bost urte ibili zen bere atzetik lan hau egiteko konbentzitu nahian, eta, emaitzak ikusirik, ez du damu baietz esan izana.
2009/01/26
Azkeneko egunak V. Nafarroako Astearen barnean Migel Sanz presidentea nafar ordezkaritza bateko buru Estatu Batuetara egiten ari den bisitaldian. Ostiralean Harvardeko Unibertsitatea bisitatu zuen, Foru Erkidegoak energia garbietan, biomedikuntzan eta hezkuntza bezalako arloetan lortutako emaitzen berri emanez ehun bat irakasle eta ikasleen aurrean. Massachussetseko Institutu Teknikoarekin lankidetza hitzarmena sinatu duen Sanz presidenteak zein Iruñeko alkate Yolanda Barcinak hitzaldi bana eskaini zituzten Nafarroa eta Iruñea eremu iraunkor gisa aurkeztuz.
2009/01/23
Oteizaren 101. urteurrena ospatuko duen 'Oteiza 101' zikloa abiatuko du bihar Bartzelonako Euskal Etxeak. Ekimenak urtean zehar gauzatuko diren hiru aste bilduko ditu, bata neguan, bestea udaberrian eta hirugarrena udazkenean. Honekin batera, 'Konspirazio laborategia' izena hartu duen laborategia ere jaio da. Artea espresatzeko modu gisa erabiltzen duen edozein deitzen du bertan parte hartzera Bartzelonako EEak . Artearen ahalik eta diziplina gehienekin lan egitea du helburu: argazkigintza, eskultura, ilustrazioa, bideoa, dantza, antzerkia… Biharko saioan Ander Lipus & Karabana arituko dira "Hala mintzatu zen Zappatustra" antzeztuz.
2009/01/23
Euskal Herrian elurrak, hotzak eta neguko aroak gogor jo badu ere azken asteotan, munduan euskaldunik eta euskal komunitaterik dagoen beste toki batzuetan ez da gauza bera gertatzen ari. Bai Ipar Ameriketan, ez ordea Hego Ameriketan, hala nola Argentinan, Txilen, Uruguain eta Hego Hemisferioko beste zenbait herrialdetan, uda bizi baitute orain eta bertan urtarrila eta otsaila eguzkipeko opor hilabeteak izan ohi dira urtero. Horixe adierazten digu Argentinatik, Andeen magaleko San Juan probintziako San Juan hiriburuko Euskal Etxetik Carina Oyolak bidali digun gutunak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
