euskal diaspora eta kultura
2009/02/18
Shanghaiko Euskal Etxeak joan den igandean eman zuen Urrezko Abakoa saria, euskal kultura Txinan eta ekialdean zabaltzen lagundu duten pertsonei omenaldia egiteko sortua. Aurten saria Juanito Sarasola elkarteko kidearentzat izan da: Txinara 2002an heldu zenetik Sarasolak herrialdean lanean ari diren euskaldunak bildu eta Euskal Etxea sortzeko asmoa agertu zuen, eta lortu ere! Sari banatze ekitaldian Sarasolaren omenez Amets Arzallus bertsolariak idatziriko bertso batzuk kantatu zituzten aho batez euskal etxeko lagunek.
2009/02/17
Eusko Jaurlaritzak, Kultura Sailaren bitartez, 'Euskal Herria ezagutzea' liburua argitaratu du, Diasporako euskaldunei eta Euskal Herrian bizi diren etorkinei euskal kulturara leiho bat emateko asmoz. Liburua zazpi hizkuntzetara itzulia izan da (euskara, gaztelera, ingelesa, frantsesa, txinera, arabiera eta errumaniarra) eta kultura, hizkuntza, ohiturak, gizartea, erakundeak, ekonomia, sistema politikoa eta gobernua bezalako gaiak jorratzen ditu. Hasteko 12.000 ale argitaratu dira, eta gainera, besteak beste Diasporako euskaldunengana errazago heltzeko, liburu osoa internetetik deskargatu daiteke.
2009/02/17
Bertsolari aldizkariaren azken aleak atzerritik heldu eta Euskal Herrian bertsolaritzaren zirrara deskubritu duten gazteen esperientzia dakarkigu. Dzenana Usanovich bosniarra, Elyem eta Nemma Chej saharauiarrak eta Rocío Luces euskal-uruguaiarra dira horietako batzuk. Jarraian Rociori eginiko elkarrizketa laburtzen dugu, bere esperientzia Diasporako gazte askorentzat ezaguna edo interesgarria delakoan.
2009/02/16
Berlingo Nazioarteko Zine Jaialdian ikusgai izan den euskarazko lehen filmea izan da, eta harrera bikaina izateaz gain (sarrera guztiak agortuta lehen emanaldia baino lehen) saria ere eskuratu du: CICAE-k (Confederación Internacional de Cines de Arte y Ensayo) ematen duen Arte eta Entsegu saria. Roberto Castón zuzendariaren filmeak heldutasunean eta bere baserrian lanean hasten den inmigrante baten lagun egitean homosexualitatea deskubritzen duen gizon baten istorioa kontatzen du.
2009/02/16
Jai eta opor giroan eta eguraldi aparta lagun, berrogeita hamar bat haur eta gaztek hartu dute parte otsail honen hasieran urtero bezala FIVUk (Uruguaiko Euskal Erakundeen Federazioak) bere euskal etxeetako bazkideentzat antolatu duen Udaleku (sic) izeneko kanpamentu edo udalekuan. Ideia euskal etxeetako gaztetxoek elkar ezagutu eta laguntxo berriak egitea izanik, euskal giroko kanpaldia egiten duten bitartean, aurtengoan ere parte hartzaileek besteak beste honakoak egin ahal izan dituzte: dantza tailerra, kultura solasaldiak, igeri eta kirolaldiak, jolasak hondartzan, kantuak eta jardunaldiak su baten inguruan... Ongi pasa, lagunak egin eta kultura jakingarriak eskuratu, guztia natura erdian eta uda giroan.
2009/02/14
Shanghaiko Euskal Etxeak bere 'Urrezko Abakoa' saria emango dio bihar igandea, otsailak 15, Juanito Sarasola bazkideari, besteak beste Txinako Errepublikako euskal etxe bakarra den honetako fundatzaileetakoa izateagatik eta, ororen buru, azken urteotan Euskal Herria eta euskal kultura Txinan ezagutarazten eta sustatzen egin duen eta egiten ari den lanagatik. Sarasola ohoratzeko erabakia joan den abenduan eginiko batzarrean hartu zuen elkarte euskal-txinatarrak. Sari emate ekitaldia bihar goizean egingo da Shanghain, Euskal Etxearen egoitzan, eguerdiko hamabietan.
2009/02/13
Joan den igandean, otsailaren 9an, Bartzelonako Euskal Etxeak jai eguna bizi izan zuen, bere jatetxearen inaugurazioa zela eta. Hilabete eta erdiz berritze lanengatik itxita egon ostean, jatetxeak jai batekin egin zien ongi etorria aldaketak ikusi nahi izan zituzten elkarteko bazkide eta jatetxeko lagunei. Ez hori bakarrik, jatetxeko kutixiak dastatzeko aukera ere izan zuten bertaratu zirenek, trikitixa, txistulari, txalaparta eta aurresku artean.
2009/02/13
Eusko Ikaskuntzak eta Institut d’Estudis Catalans elkarteek ikerketarako beka bana ematen dute urtero, katalan zein euskal kulturaren alderdi jakin batean interesaturiko ikertzaile gazteentzat. Beka horien zuzkidura 4.680 eurotakoa da eta iraupena hiru hilabetekoa. Eskabideak aurkezteko epea martxoaren 15ean itxiko da. Bestalde, Eusko Ikaskuntzak Asmoz Fundazioa eta UNED-Bergara zentroaren bidez Euskal Etnografia ikastaro bat jarri du abian, sarean egiteko. Ikastaroaren prezioa 650 eurotakoa da eta izena emateko epea martxoaren 2an itxiko da.
2009/02/13
Dantza Erakustaldi batek ipiniko dio bihar, larunbata, azkena, Buenos Airesen, hiriburu argentinarreko Nafar Etxean hondarreko astebetean garatu den Dantza Nafarren VIII. Ikastaroari. Tuterako Udal Dantza Taldeak Nafarroako Gobernuaren babespean gidatuta, Argentina eta Txileko nafar etxeetako dantzariak hartu dute parte bertan. Biharko ikuskizunak, ikasitakoa erakusteko balioko du, sarrera libre eta musutruke.
2009/02/13
Jakina da musean jokatzea euskal Diasporaren pasioetako bat dela eta Big Horn Basque Club elkartea, Wyomingeko Buffalon (AEB), horren adibide da. Joan den igandean elkarteko mus txapelketa jokatu zen eta egun osoan zehar zortzi bikote lehiatu ziren txapela nork lortuko. Askok gurasoekin mendian ardiak zaintzen ari zirela ikasi zuten jokoa. Beste batzuk herrian. Orain, musarekiko grina gazteei pasa nahi diete eta lortzen ari dira emeki. 'Ausarta izatean oinarritzen den jokoa da eta azken unea arte, nahiz eta karta txarrak izan, irabaz dezakezu', azaldu diote bertako Buffalo Bulletin kazetari.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
