euskal diaspora eta kultura
2009/02/24
Euskaltzaleak elkartea Buenos Airesen euskara irakasteko helburuarekin sortu zen orain dela 65 urte, 1944an, eta urtez urte ekinean jarraitu dute talde honetako bazkideek, euren ahalegin eta engaiamenduari esker Argentinako hiriburuan nahi duenak euskara ikasteko aukera izan dezan ziurtatuz. Lan horri jarraituz, elkarteak aurtengo ikastaroetarako deialdia egin du eta aurten gainera, oinarrizko Euskara eta Euskal Kultura Lantegi berri bat ere eskainiko du. Ikastaroak martxoaren 9an hasiko dira.
2009/02/23
Zoritxarrez, gerta zitekeen berria, zinez lazgarria izanagatik, gertatu da: Sebastian Moustirats tipia, bi urte ere ez zituen haurño euskal amerikarra, joan den asteburuan zendu da Standford-en, erietxean, ia bizitza honetan sartu gabe, Wiskott-Aldrich sindromea (WAS) zeukala eta egoera horretatik ateratzeko behar zuen hezurmuin bateragarria aurkitu gabe. Hezurmuin transplantea zen bizitzeko bere irtenbide bakarra, baina kanpainak Ameriketan zein Euskal Herrian egin arren, ez da posible izan hezurmuin bateragarri bat garaiz topatzea, eta Sebastian tipia joan den larunbatean hil da, 20 hilabete baizik ez zituela, bere gurasoen besoetan.
2009/02/23
Ayacuchoko Eusko Odola elkartea zorioneko dago: egun hauetan 500 bazkideen kopurua gainditzea lortu du eta, gainera, herriko artistak sustatzeko egiten ari den ekitaldietan erantzun oso egokia jasotzen ari da. Horren adibide ona da joan den otsailaren 15ean Fabian Veloz Ayacuchoko baritonoak eman zuen kontzertuaren arrakasta: euskal etxearen egoitza jendez lepo egon zen eta 50 pertsona inguruk kalean gelditu behar izan zuten lekurik ez zegoelako. Velozekin batera Veronica Julio sopranoa eta Diulio Smiriglia tenorea aritu ziren, maila handiko emanaldian, eta ekitaldiaren arrakasta dela eta datozen hilabeteetan kontzertu berri bat emango dutela iragarri dute.
2009/02/23
Duela urte bete baino gehixeago ireki zituen ateak Hanburgoko Donostia jatetxeak, Vivi Valin donostiarraren eskutik. Valinek euskal gastronomia eta, zergatik ez, euskal izpirituaren zatitxo bat ekarri nahi izan ditu hiri alemaniarrera abentura honekin. 'Jatetxea euskal etxe txiki bat bezala izatea nahi dugu, Hanburgoko euskaldunei eta euskal gastronomia maite duten alemaniarrei biltzeko leku bat emanez', azaltzen du Vivik. Eta alemaniar euskaltzaleak, ez pentsa, ez dira gutxi. 'Adibidez, bada hemen urtero urtero Donostiara danborrada jotzera joaten den alemaniar talde bat', ziurtatzen du Valinek.
2009/02/20
Bartzelonako Euskal Etxeak urtero antolatzen duen Zinemaldiak laugarren edizio honetan euskal zinemaren erakusleiho izatetik zentro sustatzaile izaterainoko pausoa ematea nahi izan du, eta asmo horrekin laburmetrai lehiaketa deitu du. Lehiaketa, baina, berezia da, zinea eta bertsoa uztartzen baititu. Andoni Egañak jarritako lau errimatan oinarrituta egin beharko dituzte partehartzaileek laburmetraiak. Irabazleen lanak euskal etxearen webgunean eta Euskal Herriko eta Kataluniako kultur zirkuitoetan izango dira ikusgai.
2009/02/20
2009ko ikasturtea zabaldu behar duen une honetan, Argentinako hiriburuko Alkartasuna Abesbatzak gonbite berezia luzatu die gizon eta emakume, mutiko eta neskato kantuzaleei, elkarteak datorren astean hasiko dituen entsaio edo errepiketako batera hurbildu eta, bertako dinamika gustukoa badute, elkartera partaidetu daitezen. Ez da kuotarik ordaindu behar, euskal, argentinar eta garai diferentetako musika kantatzen dute, eta entsaioak astelehen eta ostiraletan egiten dira Buenos Aires hiriko Club Vasco Argentino Gure Echea delakoan.
2009/02/20
2009/02/19
Bihar bukatuko da Argentinako Udako Euskal Unibertsitatearen lehen edizioa, joan den otsailaren 9az geroztik Euskal Echea institutuaren Buenos Aireseko egoitzan eman diren doako ikastaro bereziei amaiera emanez. '44 lagunek eman zuten izena ikastaroetara eta horietatik 25 bat etorri dira klase guztietara', azaldu du ikastaroen sustatzaile izan den Enrique Aramburuk. Haren esanetan klaseetako giroa oso jatorra izan da eta ikasleek aintzat hartu dute irakasleek mintzaldiak prestatzeko egin duten lana. Aurtengo edizioaren arrakastak animatuta, arduradunek datorren urtean edizio berri bat egitea dute buruan jada.
2009/02/19
Jeronima “Jeri” Echeverria Amerikar Historian doktorea da eta urte luzez Kaliforniako Estatu Unibertsitateko Fresnoko campuseko errektoreordea eta Gai Akademikoetarako lehendakariordea izan da. Orain bere ibilbide profesionalean beste aurrerapauso bat eman eta joan den otsailaren 1ean Gai Akademikoetarako kantzilerorde elkartu kargua hartu zuen Kaliforniako Estatuko Unibertsitate administrazio zentralean, urte hasieran izendatua izan ondoren. Kaliforniako Estatuko Unibertsitateak AEBetako goi mailako ikaskuntza sistema handiena dira, 23 kanpus eta 450.000 ikasleekin. Echeverria Kalifornian bertan jaioa da, euskal jatorriko familia batean, eta aditua da AEBetako mendebaldeko euskal komunitatearen historian.
2009/02/18
Azken hilabeteetako eginahalarekin jarraituz, Miamiko Txoko Alai Euskal Etxea hiriko euskal gazteen partehartzea eskuratzeko gogor ari da lanean, euskara eta dantza ikastaroak, elkarretaratze eta bazkariak eta webgunearen sorrera bezalako jarduerez baliatuz. Berriki elkarteak afari-bilkura bat egin zuen eta ohorezko gonbidatuak Miami Jai Alai frontoian lan egiten duten Euskal Herriko pilotari gazteak izan ziren.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
