euskal diaspora eta kultura
2009/03/05
Duela ia hilabete, aurtengoan 16. edizioa beteko duen Korrikaren aurkezpena egin genuen orriotan. Aipatzen genuen, nola ez, martxoaren 26an Tuteratik abiatu eta Gasteizko helmugara apirilaren 5ean iritsiko den lasterketa euskaltzaleak, berriz ere, Euskal Herri geografikoko euskaldunak ezezik, kanpoko euskal herrietako euskaldunak ere bildu behar zituela bere baitan. Geroztik argitaratu ditugun zenbait artikuluetan, aipatu dugu besteak beste Korrikak Txinan, Mexikon, Ingalaterran, Madrilen, Argentinan... ere mugiaraziko duela jendea, herrialde horietako zenbait euskaltzale eta euskal etxeen eskutik. Horixe bera gertatuko da Katalunian ere, Bartzelonako Euskal Etxea medio hilabete osoko kultura jardunak egingo baitituzte. Hona egitarau bartzelonarraren xehetasun.
2009/03/05
Asmoa azaldu eta aurreneko urratsak prestatzeko lehenengo bilera, Estatu Batuetako hegoekialdeko profesional eta enpresariei zuzendua, datorren asteazkenean egingo da Miamin, bertako Euskal Etxearen eskutik. Elkarte berriak AEBetako euskal jatorriko eta Euskal Herriarekin loturarik daukaten profesional, exekutibo eta enpresariak bildu nahi ditu, kezka eta arazo (aman)komunak elkarrekin planteatu eta indarrak metatuko dituen enpresari sare euskal estatubatuarra sortzeko. Miamiko datorren asteko bileraren ondotik, beste bi deitu dira apirilerako, Kaliforniako San Frantziskon bata, AEB Mendebaldeko bazkidegaiak biltzeko, eta Salt Lake Cityn bestea, proiektua NABOren aurrean aurkezteko.
2009/03/04
Martxa onean jarraitzen dute Madrileko Euskal Etxearen kultur ekitaldiak. Joan den otsailaren 19an, adibidez, Hasier Larretxea baztandarreren 'Azken bala/Ultima bala' poema liburuaren aurkezpena egin zen. Liburua elebitan, euskaraz eta gazteleraz, argitaratu du Sevillako Pointdelunettes argitaletxeak. Aurkezpenean Zuriñe Muñoz artistak antzezlan labur bat eskaini zuen. Hileko beste ekitaldietako bat joan den otsailaren 26ean egin zen Euskaraokea izan zen: bertan Euskaltegiko ikasleek euskal kantak abestu eta bidez batez euskara praktikatzeko aukera polita izan zuten.
2009/03/04
Topagunea Euskara Elkarteen Federazioak antolatzen duen Film Laburren Zirkuituak Euskal Herriko kultur-etxe eta elkarteetara eramaten du urtero euskarazko laburmetraien selekzio bat. Aurten, lehen aldiz, zirkuituak nazioartera jauzi egingo du, Erroma, Paris, Bartzelona, Shanghai eta Londreseko euskal etxeei esker. 'Iaz Erromako Euskal Etxetik parte hartzea eskatu ziguten, baina egitaraua itxita zegoen jada', azaltzen du Topaguneko Manuel Morenok. Aurten bost euskal etxe hauek ahalegin handia egin dute eta Txinan, adibidez, filmak lau hizkuntzatan azpititulatu dituzte ikuslego zabal batengana hel daitezen.
2009/03/03
Halaxe galdetu dute joan den igandetik aurrera gure erredakziora deitu edota e-mailak bidali dituzten zenbait jendek. Patxi Lopezek ordezkatuko du Ibarretxe? Hala bada, euskal etxeek segituko dute? Zein aldaketa etorriko da lehendakari berri bat sartzen bada, horrek aldaketarik ekarri behar badu? Aurten izango al da Gaztemundu? Laguntza deialdiek segituko dute? Hauek dira Diasporako lagunen buruetan bueltaka dabiltzan galderetako batzuk, edo guri behintzat egin zaizkigunak. Katedrarik ezarri nahi izan gabe, hona geure iritzia, momentu honetan ditugun datuen gainean eraikia, inorentzat argigarri izan daitekeelakoan.
2009/03/03
Asier Polo biolontxelo jole bilbotarrak Montereyko Orkestra Sinfonikoarekin bat egingo du aurten ere eta bost kontzertuko bira laburra egingo du Kalifornian hilaren 21, 22 eta 23an. Emanaldiak Salinas eta Carmel hirietan izango dira eta bertan Polok Dvorak-en Biolontxelo Kontzertua joko du bere instrumentuarekin, 1689an Italian Francisco Ruggieri maixuak egin zuen biolontxeloarekin. Asier Polo Musikene, Euskal Herriko Goi Mailako Musika Ikastegiko irakaslea da.
2009/03/03
Shanghaiko Euskal Etxeak, Asiako lehen eta momentuz euskal etxe bakarrak, jarduera egitarau mardula prestatu du hilabete honetarako. Hasteko, datorren igandean Emakumeen Eguna ospatuko dute eta martxoaren 14ean III. Squash Txapelketa egingo dute. Zineak ere lekua izango du, martxoaren 21ean egingo den laburmetrai emanaldiarekin. Eta egitarauari bukaera borobila emateko Korrika aurten ere Txinaraino helduko da, Shanghaiko euskaldunei esker: 27tik 29ra bitarteko asteburuan 'Korrika Txikia' egingo da Hong Kong-en.
2009/03/02
Juan Jose Ibarretxe hautagaiak (EAJ) irabazi zituen atzo Araban, Bizkaian eta Gipuzkoan Eusko Legebiltzarra berritzeko egin ziren hauteskundeak, bozka gehien bildu zituen zerrendaburu izan zen heinean 30 eserleku lortu baitzituen orotara 75 eserleku dituen ganbera legegilean. Gainerako alderdietan, PSE-EEk 24 eserleku bereganatu zituen, PPk 13, Aralarrek 4, EAk 2 eta bana Ezker Batuak eta UPyDk. Emaitza hauekin ezin daiteke segurta zein izango den datorren lehendakariaren izena, atzoko behin-betiko emaitzak ezagutu ondoren, Ibarretxek zein Patxi Lopezek esan baitzuten euretako bakoitzari dagokiola Parlamentuaren aurrean ardura hori hartzea. Bakoitzak lot ditzakeen akordioen arabera beharko du izan. Ez da ahaztu behar, ordea, atzoko hauteskundeetan, lehenengoz, indar estatalistek erabateko gehiengoa eskuratu dutela, 38 eserleku, zenbaki hori ateratzen baita PSE, PP eta UPyDren indarrak batuz.2009/03/02
Iragan urtean, Elgarrekin euskal abesbatzak 1983an egin zuen grabaketa 'historikoaren' 25 urteak bete zirela, San Frantziskoko Euskal Etxeak (SFBC) hamaika euskal kanturen bilduma den lan honen edizio berri bat egin eta plazaratu egin zuen. SFBCeko 'Basque Club Aldizkaria'k bere azkeneko alean oroitarazten duenez, grabaketa originalaren masterrak 2007an topatu ziren Basque Cultural Center-en eta hortik abiatuz Robert Iriartbordek digitalizatu eta birmasterreratu egin zituen. Emaitza haren CD bertsio berria eskuratu nahi baduzu, online egin dezakezu orain, edo bestela, ohi bezala, San Frantziskoko Euskal Etxearekin kontaktatuz.
2009/03/02
Argentinako Euskal Erakundeen Federazioak, FEVAk, Pilota Berria programaren arduradun duen Agustin Asensioren bidez, deialdia luzatu die bere baitango euskal etxe guztiei pilotan ari diren neska eta emakumeak aurtengo lehenengo pilota bilkurara bil daitezen datorren asteburuan, martxoaren 7 eta 8an, Villa Mariako Eusko Etxera, Cordoba probintzian. [(*) 2009-03-04KO OHARRA: HITZORDUA BERTAN BEHERA UTZIA, ORAINGOZ DATA BERRIRIK GABE]
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
