euskal diaspora eta kultura
2008/11/25
Urtebetetzea, berez, azaroaren 3an zen, baina Buenos Aireseko Nafar Etxeak bere 113. urteurrenaren jaia joan den 9an, igandez, ospatzea erabaki zuen. Etxeko kide eta lagunak hartu zuten parte goizetik hasi zen ospakizunean. Egunari ekiteko, Santa Amelia Parrokian meza, hildako bazkideen alde; ondoren, Nafar Etxearen egoitzara aldaturik, emanaldia eskaini zuten dantzari txiki eta helduek; eguerdiko ordu batean, bakarri ederra, eta zozketak, 'Nafar Etxearen Urtemuga Kopa' Mus Txapelketako sarien banaketarekin batera.
2008/11/25
Gaurtik hasi eta azaroaren 30a bitartean lau euskal ikuskizun izango dira ikusgai Mexiko hiriburuan, Arte Eszenikoen III. Erakustaldiaren barruan: 'Latidos' (Kukai-Logela taldearena), 'Hnuy Illa' (Kukai-Tanttaka); 'El florido pensil' antzezlana (Tanttaka) eta Kepa Junkeraren azken musika ikuskizuna. Euskal enbaxada hau Euskal Plataforma Eszenikoa deritzon ekimenarekin dator Mexikora eta euskal arte industriarentzat merkatu berriak irekitzea du helburu. Eusko Jaurlaritzaren Mexikoko Ordezkaritzak sarrera kopuru mugatu bat ipini du eskuragai debalde, bertaratzeko interesa daukatenentzat.
2008/11/24
Alemaniara lau eguneko bidaia egin ostean Arantxa Urretabizkaia eta Edorta Jimenez euskal idazleek hango irakurleek alemanieraz argitaraturiko 'Kuaderno gorria' eta 'Kilkerren hotsa' lanen irakurraldietan egin zieten harrera ona azpimarratu dute. Bi idazleak Alemanian lan hauek ezagutzera ematen dituzten bigarren aldia da, eta iaz bezala, bidaia honetik berriak etorriko direnaren itsaropena agertu duta. 'Iaz Frankfurtera egin genuen bidaiari esker, 'Kuaderno gorria' italierara itzultzeko aukera izan nuen', gogoratzen du Urretabizkaiak.
2008/11/24
Argentinan, barnealdeko San Luis probintziako Villa Mercedes-en eta Merlo hirietan joan den urrian Aretxabaletako Akordeoi Orkestrak eskainitako kontzertuen oihartzunak bizirik dirau, Villa Mercedeseko Euskal Etxeko kideek jakinarazi digutenez. Euskal elkarteak probintziako musikari ezaguna den Pastor E. Rouan-en gutuna jaso du, euskal komunitateari talde gipuzkoarraren kontzertua antolatzeagatik eskerrak emanez eta taldearen maila goraipatuz.
2008/11/24
Bihar asteartez hasi eta ostirala bitartean, lau egunetan zehar, Mexiko, Portugal, Filipinas, Japonia eta Espainiatik etorritako hainbat adituk Ordizian jaiotako Andres Urdaneta itsasgizonaren inguruko 'Andres Urdaneta: Gizon modernoa' Nazioarteko Kongresuan bilduko dira. Lauegunetan zehar hitzaldiak eta eztabaidak burutuko dira eta amaiera gisa Donostiako Orfeoiak kontzertua emango du. Elkarretaratzea Andres Urdaneta jaio zeneko V. mendeurreneko ospakizunen barruan kokatzen da, eta Ordiziako Udalak eta Kultura Ministerioko Ospakizun Kulturaletako Estatu Elkarteak antolatu dute, Urdanetaren balore zientifiko eta diplomatikoen birbalorazioa eta errekonozimendua bultzatzearren.
2008/11/21
Jose Miguel Santamaria Ordiziako alkatea itzuli berria da Peru eta Mexikora egin duen bidaiatik, Andres de Urdaneta itsagizonaren 5. mendeurreneko ekitaldien karira. Urdanetak Asia eta Amerika arteko itsasbidea aurkitu zuen XVI. mendean, eta horri esker bi kontinenteen arteko merkataritza indartu egin zen nabarmen. Orain, Urdanetak lotu zituen hiri eta herrialde hauen eta Ordizia eta Euskal Herriaren arteko harremanak estutzeko urratsak eman ditu Santamariak. Bidaia Peruko El Callaon hasi zuen alkateak, hiri honen eta Ordiziaren arteko senidetzearekin.
2008/11/21
Ordiziako alkate Jose Miguel Santamaria Felipe Calderon Mexikoko presidentearekin elkartu berri da joan den astean, hautetsi gipuzkoarrak Ameriketara egin zuen bidaiaren barruan. Santamaria SPRIko (Industriaren Sustapen eta Birmoldaketarako Elkartea) ordezkari Ramon Peñagarikanorekin bidaiatu da Ameriketara, Andres de Urdaneta itsasgizon ordiziarraren oroimenean egindako ospakizunetan parte hartzeko. Urdanetak 'Itzulera Bidea' deritzon itsas bidea aurkitu zuen XVI. mendean eta horri esker Mexikoko Acapulco hiriak berebiziko garapena eta merkatal jarduera izan zuen.
2008/11/21
Euskal Herrira ari diren lehenengo aldia dute eta Europara abiatzeko aste bete pasexe falta bazaie ere, Gasteizen Euskararen Nazioarteko Egunaren ospakizunetan kantatzeko, ezin dute ezkutatu honek guztiak dakarkien emozioa eta baita urduritasun punttua ere. Argentinan jotzen duenean bere errepertorioa euskarazko piezez edertzen duen Arrecifes-eko talde honek hiru emanaldi eskainiko ditu abenduan Euskal Herrian: 3an Gasteizen, Oiartzunen 6an, eta Durangon 8an, azken hau Durangoko Azokaren baitan.
2008/11/20
Madrilgo Beti-Jai frontoia salbatu nahi duen herri mugimenduak pauso berri bat eman du, sarean sinadurak biltzeko kanpaina abian jarriz. Frontoia 1893an diseinatu zuen Joaquin Rucoba arkitektoak eta munduan dagoen neomudejar estiloko frontoi bakarra da. 1977an eta 1991an Kultura Ondasun izendatu zuten eraikin hau. Sinadura bilketa egiten ari den taldeak dioenez egungo egoeraren erruaren bila erakunde publikoen arduragabekeriari espekulazioa gehitu behar zaio, izan ere frontoia Madril erdialdean dago eta zoru horretan etxeak egiteko eraikuntza proiektuak daude. Herri plataformak, aldiz, ondasun historiko hau berreskuratu eta kirol eta kultur ekimenetarako erabiltzea proposatzen du.
2008/11/20
Kubatik pasatu zen Ike hurakanarengatik iraileko bere jatorrizko egunetatik azarora ekarri ondoren, joan den igandean hasi zen La Habanan, datorren igandean bukatzeko, munduko IV. Trinkete Txapelketa, Kubako Euskal Pilota Federazioak antolaturik Nazioarteko Federazioaren (FIPV) babespean. Sei selekzio ari dira elkarren aurka, Espainia, Frantzia, Kuba, Mexiko, Uruguai eta Argentina ordezkatuz. Azpimarratzekoa, Espainia eta Frantziako ekipo gehienak pilotari euskaldunak dauzkatela partaide, eta Argentina eta Uruguairen kasuan ere pilotarietako zenbait euskal jatorrizkoa direla baita ere.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
