euskal diaspora eta kultura
2009/01/20
Miguel Sanz Nafarroako presidentea AEBtan da gaur bertan hasiko den Nafarroaren Astearen bostgarren edizioan parte hartzeko. Misio komertzial honen bidez Nafarroako 21 enpresek herrialde honetako kultura, ardoa eta produktuak sustatu ahal izango dituzte. Aurten gainera, energia berriztagarri eta nanoteknologia bezalako alorretan ere Nafarroaren ekarpena ezagutzera emango da. Honekin batera aste gastronomikoak egingo dira New Yorken eta Bostonen, datorren astelehena bitartean.
2009/01/20
Argentinatik ere euskaldunek bat egin dute Billabonako Agiñalde Kultur Elkarteak abian jarri duen mundu mailako kanpainarekin: sinadurak bildu nahi dira UNESCOri euskara Gizateriaren Ondare Inmateriala izendatu dezan eskatuz. Kanpainak Chascomuseko Zingirako Euskaldunak Euskal Etxeko gazteen artean izan du oihartzuna. Izan ere, joan den asteburuan herriko kaleetara atera eta sinadurak biltzen aritu ziren. Horrez gain, euskal elkarteak, joan den urtarrilaren 7an Ana de Otazua zinegotzi eta elkarteko kideak Zingirako Euskaldunak-i eginiko dohaintza biziki eskertzen du.
2009/01/19
Necocheako Euskal Etxearen San Sebastian jaiak gero eta jende gehiago erakartzen du Argentinako hiri honetara, izan ere, elkarteak antolatzen duen egitaraua urtetik urtera zabalagoa da. Necocheako euskaldunen danborrada jendetsuari Gargantua bat ere biltzen du eta jaiak gainera ia astebeteko iraupena izango du. Proposamenen artean euskarazko zine emanaldi bat --'Kutxidazu Bidea, Ixabel', jendeak hala eskatuta--, paella erraldoia eta joan den uztailean Euskal Herrira bidaia egin zuten Gazte Alai dantza taldeko gazteen solasaldia, besteak beste, ahaztu gabe asteburuan egingo den ohiko danborrada handia. Kultura, jaia eta gozatzeko gogo bizia, euskal ohituren ildotik, Argentinan, udan, Euskal Herria bertakotuz.
2009/01/19
Ordu gutxi falta dira San Sebastian jaiaren hasierarako eta Donostia eta Azpeitiko kaleak danborra etengabe jotzen ari diren lagunekin bete daitezen. Alta, jaiak aspaldi gainditu zituen Euskal Herriko mugak eta egunotan herrimina sufritzen zuten euskaldunen eskutik Diasporako bazterretara ere heldua da. Jaia klasikoa bihurtu da Bartzelona, Madril, Murtzia, Mexiko, Caracas, Necochea (Argentina) edo New York bezalako tokietan. Iaz danborrada estrainekoz atera zuten Seattle-en (AEBtan) eta aurten, nola ez, berriz ere egingo dute. Gero eta gehiago dira, tradizioei eutsi eta ondo pasatzeko gogoarekin, Sarriegiren piezekin disfrutatzera animatzen diren euskal etxeak.
2009/01/19
Argentina barnealdeko San Luis probintziako bi euskal etxe --Merlo herriko Kometxingon Euskal Etxea eta Villa Mercedeseko Euskal Etxea-- babesle dituen kontzertua eskaini zuen joan den larunbatean, urtarrilak 17, Villa Mercedeseko Camerata de La Luna abesbatzak, bere errepertorioko parte eskainiz, azkenaldian ohi duen moduan, euskal koru ondareko zenbait pieza, Villa Mercedeseko Euskal Etxearekin daukan tratua medio.
2009/01/19
Hego Ameriketan 'Euskara Munduan' programaren baitan euskara eskolak ematen eta aldi berean hartzen dihardutenen nazioarteko taldeak gaur hasiko du Montevideon bere lehenengo barnetegi uruguaiarra. Eskolak urtarrilaren 30era arte luzatuko dira hiriburuko hotel batean, FIVU (Uruguaiko Euskal Erakundeen Federazioa) eta FEVAren (Argentinako Euskal Elkarteen Federazioa) babesean, HABE euskalduntze erakundea antolatzaile, eta bertara, Uruguai, Argentina, Brasil, Txile, Peru eta Kolonbiako ikasle/irakasleak bilduko dira.
2009/01/19
Euskara partaide izan da beste urte batez Pariseko Expolangues Azokan, aurten urtarrilaren 14tik 17ra garatu den hizkuntzen nazioarteko elkargune eta trukagune garrantzitsu den hitzordu honen 27. edizioan. Eusko Jaurlaritzatik, Patxi Baztarrika Hizkuntza Politikarako sailburuordea, HABEko buru Joseba Erkizia eta Lorea Bilbao aholkularia bertaratu dira, euskal stand-a bisitatu eta, aldi berean, Pariseko Euskal Etxearekin euskara eskolak manera arautuan emateko indarrean dagoen hitzarmenari segida emateko. Urtarrilaren 7an bizitza ofiziala hasi berria duen Etxepare Institutua izango da Expolangues-eko datorren ediziotik aurrera euskal stand-a antolatzeaz arduratuko den erakundea.
2009/01/19
Joan den urteko azken ekitaldietako oihartzunak datozkigu oraindik hainbat euskal etxeetatik. Argentinako Las Flores herriko Euskal Etxeak, esaterako, kultura eta elkartasun ekitaldiekin itxi zuen 2008 urtea, beti ere Las Flores herriko komunitateari begira. Urtero ohi bezala elkarteko dantza taldeak emanaldi berezia eskaini zuen jaiak Zahar Etxean igaro behar dituzten nagusientzako. Emanaldia oso hunkigarria izan zen eta nagusiek eta dantzari gazteek elkarrekin eman zuten arratsaldea. Bestalde, Euskal Etxeak 'Las Flores Canta' jaialdiaren 9. edizioan parte hartu zuen eta Gisela Pellejero izan zen euskaldunen ordezkari.
2008/12/31
Azkeneko bi urteotan egin dugun bezalaxe, buletina ez da plazaratuko eta webgunearen eguneroko edukiak ez dira berrituko datozen bi asteotan, urtarrilaren 19ra arte, astelehena eta San Sebastian egunaren bezpera. Hego Kono amerikarreko herrialdeetan oporren usaina nabaria bada ere, uda bete-betean baitabiltza, gure kasuan ez dugu oporrik hartuko, barnera begirako lanetan ibiliko baikara. Gurekin mintzatu nahi duenak, ohiko bideetatik egin ahal izango du, beraz. Urte Berri on, irakurle.
2008/12/31
Egun hauetan zorion mezuak bidali dizkiguten lagunen berri ematen jarraituko dugu. Joan den 24-25ean argitara eman genuen lehenengo lagun zerrendari, bigarren zatia gehituko diogu gaurkoan, ordutik hona iritsi diren mezuak zuritzen. Mila esker guraz oroitu zaren guztioi. Mezuren bat bidean gelditu edo artikulu hau idatzi orduko iritsi ez bada, jakin dezala dena den eskertzen diogula. Segi bizkor, lagun irakurle, urte berrian ere. Gure agiantza onenekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
