euskal diaspora eta kultura
2009/01/26
Azkeneko egunak V. Nafarroako Astearen barnean Migel Sanz presidentea nafar ordezkaritza bateko buru Estatu Batuetara egiten ari den bisitaldian. Ostiralean Harvardeko Unibertsitatea bisitatu zuen, Foru Erkidegoak energia garbietan, biomedikuntzan eta hezkuntza bezalako arloetan lortutako emaitzen berri emanez ehun bat irakasle eta ikasleen aurrean. Massachussetseko Institutu Teknikoarekin lankidetza hitzarmena sinatu duen Sanz presidenteak zein Iruñeko alkate Yolanda Barcinak hitzaldi bana eskaini zituzten Nafarroa eta Iruñea eremu iraunkor gisa aurkeztuz.
2009/01/23
Oteizaren 101. urteurrena ospatuko duen 'Oteiza 101' zikloa abiatuko du bihar Bartzelonako Euskal Etxeak. Ekimenak urtean zehar gauzatuko diren hiru aste bilduko ditu, bata neguan, bestea udaberrian eta hirugarrena udazkenean. Honekin batera, 'Konspirazio laborategia' izena hartu duen laborategia ere jaio da. Artea espresatzeko modu gisa erabiltzen duen edozein deitzen du bertan parte hartzera Bartzelonako EEak . Artearen ahalik eta diziplina gehienekin lan egitea du helburu: argazkigintza, eskultura, ilustrazioa, bideoa, dantza, antzerkia… Biharko saioan Ander Lipus & Karabana arituko dira "Hala mintzatu zen Zappatustra" antzeztuz.
2009/01/23
Euskal Herrian elurrak, hotzak eta neguko aroak gogor jo badu ere azken asteotan, munduan euskaldunik eta euskal komunitaterik dagoen beste toki batzuetan ez da gauza bera gertatzen ari. Bai Ipar Ameriketan, ez ordea Hego Ameriketan, hala nola Argentinan, Txilen, Uruguain eta Hego Hemisferioko beste zenbait herrialdetan, uda bizi baitute orain eta bertan urtarrila eta otsaila eguzkipeko opor hilabeteak izan ohi dira urtero. Horixe adierazten digu Argentinatik, Andeen magaleko San Juan probintziako San Juan hiriburuko Euskal Etxetik Carina Oyolak bidali digun gutunak.
2009/01/22
Miguel Sanz Nafarroako Gobernuko presidentea Edward G. Rendell Pennsylvaniako Estatuko gobernadorearekin bildu da energia berriztagarriei buruz hitz egiteko, Estatu Batuetako V. Nafar Astean parte hartzen ari den nafar ordezkaritza ofizialak daraman bisita programaren baitan. Sanzekin batera bere gobernuko zenbait kontseilari eta kide eta, besteak beste, Yolanda Barcina Iruñeko alkatea partaide duen ordezkaritzak nafar ardoen sustapenerako ekitaldi batean ere hartu zuen parte asteazkenean, "zezenekin korrika" lelopean, New Yorkeko jatetxe batean.
2009/01/22
Madrilgo Euskal Etxeak, azkeneko hogeita hamarretik gora urteetan bezala, bere danborrada atera zuen joan den San Sebastian bezperan Espainiako hiriburuan, aurten gomuta eta omenaldi bereziaz joan den urtean hil den Peio Aranburu etxeko lehendakari ohi, euskaltzale fin eta bertan 1974an lehenengo danborrada antolatu zuen lagun gogoangarriari. Bere donostiar eta euskalduntasuna Madrilen duin paseatzen zituen Peioren hutsunea behin baino gehiagotan sentitu zen Sarriegi, umore ona eta Donostiako euskal festa protagonista izan zituen gauean.
2009/01/22
Chascomus-eko Zingirako Euskaldunak Euskal Etxeak, Buenos Aires probintzia argentinarrean, webgunea inauguratuz hasi du urtea. Makina bat ekimen eta antolaketaren arduradun den euskal etxe honek lehio propioz agertzen da, beraz, internetera, bertako euskal berriez gain bederatzi ataletan banaturik informazioa, tartean erakundearen historia, argazki bilduma, ikastaro saila edota bisita liburua. Lerro hauetatik, ongi etorria eman nahi diogu Chascomuseko Euskal Etxekoen webguneari eta bertan ari diren adiskideei.
2009/01/21
Euskadin izpiritu ekintzailea, sormena eta berrikuntza sustatzeko sortutako Innobasque erakundeak agenda trinkoa bizi du egunotan, Kolonbia, Mexiko eta Txileko goi mailako ordezkaritzak bisitari. Pedro Luis Uriarte elkarteko lehendakariaren eta bere zuzendaritza taldeko kideen agendak Kolonbiako presidenteorde Francisco Santosen bisita bildu zuen atzo, biharko San Luis de Potosi hiri mexikarreko ordezkaritza bati egingo dion harrera dauka aurreikusita eta datorren asterako, berriz, Txileko Ekonomia ministroaren bisita iragartzen du, guztietan innobazioa bultzatzeko hango eta hemen garatzen diren eta koordina daitezkeen ahaleginak aipagai.
2009/01/21
Orotara 107 izan dira Laprida herri argentinarreko 'Lagunen Etxea' Euskal Etxearen baitango 'Eusko Txokoa' Liburutegiak deitutako Euskal Galdera Lehiaketara aurkeztu eta itaunak ongi erantzun dituzten gazte eta helduak. Emaitzak abenduaren 20an atera baziren ere orain astindu ditu liburutegiko Maria Ester Arrondo arduradunak. Saridunak honakoak dira, deitutako hiru kategorietan: Carolina Conti Garay, eskoletako A kategorian; María de las Mercedes Arias, eskolako B kategorian; eta Nadia Serio, helduen kategorian.
2009/01/21
Aguaricoko (Ekuador) Bikariotza Apostolikoak (Kaputxinoen misioa) irabazi du Elkartasunaren Nazioarteko VIII. "Nafarroa" Saria, zortzigarren urtez Nafarroako Gobernuak eta Euskadiko Kutxako Nafarroako Zuzendaritzak sustatutakoa. Ekuadorreko indigenen alde egindako lanarengatik eman diote saria, hain zuzen ere 1953az geroztik herrialde horretako ekialdean egiten ari den lanarengatik. Berrogeita hamar urte baino gehiago igaro dira Aguaricoko Bikariotza oihanean ezarri zenetik, eta harrezkero mugako lana egin izan du; egoera desegokian, muga-mugan, bazterretik, ahulenak babestuz, ahotsik ez dutenen ahotsa izaten saiatuz, azpimarratu du Nafarroako Gobernuak ohar batean. Sariak 31.000 euro, Jorge Oteizaren 'Arri Ernai Zaintzailea' izeneko eskulturaren kopia bat eta diploma dakartza.
2009/01/21
Bigarren urtez Rio Coloradoko Euskal Etxeak Patagoniako Euskara Ikasleen Topaketa antolatu zuen, joan den abenduan. Topaketak 'Patagonian ere bai!' zuen leloa eta oraingoan berrogeitahamar lagun inguru bildu ziren bertara, ekitaldiak duen harrera onaren seinale. Eurekin batera gonbidatu oso bereziak izan ziren: Euskal Herritik etorritako lau neska-mutil, eguneko joko eta jardueratan parte hartzeko prest. Patagoniako euskaldunentzat ezusteko ederra izan zen, askorentzat Euskal Herriko euskaldunak ezagutu eta euren euskera entzuteko lehen aukera zelako.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
