euskal diaspora eta kultura
2009/02/04
Deustuko Unibertsitateak 'Euskal Herriko liburutegirik handiena' du joan den astearteaz geroztik, Rafael Moneo arkitektuak diseinatu duen eraikin berriaren inaugurazioan ikastetxeko arduradunek azaldu zutenez. Eraikin berrian 'ia milioi bat ale, irakurgelatan 1000 eserleku, datu base digitalak eta on line zerbitzuak' daude, besteak beste. Inaugurazio ekitaldian Ibarretxe lehendakaria eta beste agintari eta ordezkari publiko ugari izan ziren. Liburutegi berria ikaskuntza eta ikerkuntzarako zentro bat izateko helburuarekin sortua da, unibertsitateko eta kultura munduko topagune bihurtzeko asmoz.
2009/02/03
Kimuak 2008 Katalogoko film-laburrak sektoreko 50 profesionalen aurrean proiektatu zituzten atzo goizean Clermont Ferrand hiri frantsesean. Genero honen Nazioarteko Lehiaketarik eta Azokarik ospetsuena da bertakoa, aurten joan den ostiralean hasi eta otsailaren 7ra arte luzatuko dena. Jakina denez, Eusko Jaurlaritzaren Kultura Saileko Kimuak programaren helburua Euskadiko Filmategiak kudeatzen dituen euskal film laburrak Euskal Herrian bertan eta kanpoan ahalik eta gehien aurkeztu eta erakustea da. Gurutz Larrañaga Kultura, Gazteria eta Kirol sailburuordea Clermont-Ferrand-en izango da atzo eta gaur, Zinemaldia eta paraleloki egiten den Azoka bisitatzen, Jaurlaritzatik adierazi denez.2009/02/03
Euskarak eta euskal kulturak euren lekua nahi dute sarean. Kataluniarrek '.cat' domeinuarekin egin zutenari jarraiki, Euskal Herriko hainbat erakunde eta elkartek '.eus' izeneko domeinua sortzearen aldeko kanpaina jarri dute abian. Domeinu honek sarean euskal kultura eta hizkuntzari buruzko webguneak edo Euskal Herrian sortutako web orriak identifikatzeko balioko luke, euskarari sarean presentzia indartsuagoa emanez. Domeinu berriaren aldeko kanpainak 'PuntuEus' izena du eta asko dira dagoeneko berarekin bat egin dutenak. Interneten, kanpainaren aldeko sinadura bilketa hasi da.
2009/02/03
2009/02/02
Joan den ostiralean, urtarrilaren 30ean, Chascomuseko Euskal Etxearen egoitzan eginiko bilera ekitaldian sinatu zen Lankidetza Hitzarmena, sinatzaile bi elkarteotako presidenteak, hala nola Zingirako Euskaldunak-eko Maria Laura Eguren eta Chascomuseko Pilota Klubeko Tomas Murias. Euskal Etxetik adierazi zaigunez, bi erakundeok elkarrekin garatzen ari diren lana sendotu eta aitzinarazteko bidean ipini da, beti ere Euskal Pilota Eskola indartuz eta pilotazaletasuna sustatuz Chascomus inguruan.
2009/02/02
Eusko Ikaskuntza euskal kulturaren arlo desberdinetan sakontzeko aukera eskaintzen die munduko ikerlariei Angel Apraiz eta Agustin Zumalabe beken bidez. Bi beka hauek jorratzen dituzten gaiak honakoak dira: Hizkuntza eta Literatura, Historia-Geografia, Historiaurrea-Arkeologia, Arte Plastikoak eta Monumentalak, Zinematografia eta Musika, batetik, eta Antropologia-Etnografia, Gizarte Zientziak eta Ekonomia, Zuzenbidea, Komunikabideak, Zientzia Fisiko-Kimikoak, Matematikak eta Teknologia, Osasun Zientziak, Natur Zientziak, Hezkuntza eta Folklorea, bestetik. Bakoitzak 6.000 eurotako zuzkidura eta urte beteko epea du. Eskabideak aurkezteko epea otsailaren 28an bukatzen da.
2009/02/02
Australia ipar-ekialdean, Queensland-en, dagoen Townsville hiria herrialde honetako pilotazaleen topagune bihurtu da azken asteetan, bertan ari baita Ibon Garate getxoztarra euskal pilota ikastaroa ematen. Garate orain dela aste batzuk heldu zen, Euskal Pilotaren Mundu Batzarrak eta Australiako Euskal Pilota Federazioak gonbidatuta, gazte australiarrei pilotan erakusteko helburuarekin. Baliteke trebezia gehien erakusten duten hiru edo lau lagunek Euskal Herrian irailean egingo den mundu txapelketan parte hartzea.
2009/01/30
Bere gurasoak pertsona ezagunak dira Argentinako euskalgintzan. Ama, Marina Aranguren, euskal argentinarra da eta heldua izanik ikasi eta hobetu du bere euskara. Gaur egun euskara irakaslea da Buenos Airesko Euskaltzaleak elkartean. Aita, berriz, Aitor Alava du, duela bost bat urte Buenos Airesen bizi den Zuhatzako (Araba) euskalduna eta euskal dantza irakasle ari dena Argentina eta Uruguaiko zenbait euskal etxetan. Horiek gurasoak. Alaba, berriz, Maialen tipia, urtarril honen 10ean jaio zen Buenos Airesen, lagun andanaz inguratuta. Ongi etorri, Maialeni, eta zorionak aita-ama-alaba eta ingurukoei.
2009/01/30
AEBetako euskal etxeetan euskara irakasleak trebatzeko programak --'Euskara AEBetan'-- bere urteroko bilkura egin zuen joan den urtarrilaren 16tik 18ra Utah-ko Salt Lake City hirian. HABE institutuak eta NABOk (AEBetako euskal etxeen federazioak) sustatzen duten programan inoiz baino irakasle gehiago ari dira aurten, Izaskun Kortazar, NABOko euskara sustatzailea egiten ari den lan bikainaren seinale. Bilkuran Idaho, Colorado, Wyoming, Nevada, Kalifornia eta Utahko irakasleak izan ziren, besteak beste.
2009/01/30
Chaco probintziako Resistencia hiri argentinarra izan zen joan den urtarrilaren 10ean Mariangeles Rosciani Grandes Igarategui eta Mauro Matheu gazte euskal argentinarren ezkontzaren agertokia. Mariangeles Chacoko Euskal Etxeko dantzaria da eta Mauro Arrecifeseko Euskal Etxeko dantza taldeko kidea eta euskara irakaslea. Bi gazteen maitasunak 1.500 kilometrotara dauden elkarteak batu zituen eta elizkizunaren ostean bi euskal etxeetako dantzariek aurreskua dantzatu eta ohorezkoa arkua egin zieten. Zorionak ezkonberriei!
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
