euskal diaspora eta kultura
2009/02/09
Mondragon Unibertsitateak eta Txileko Fundación Minera Los Pelambres eta Choapa Emprende erakundeek Ekintzailetza, Berrikuntza eta Elkarkidetza Ikastaro Aurreratu bat abiatuko dute datorren martxoan Santiagotik 200 kilometro iparraldera dagoen Choapa eskualdean. Ikastaroa hango enpresari txikiei eta lizeoetako irakasle tekniko zein funtzionari publikoei zuzendua da. Zazpi hilabeteko iraupena izango du, eta 20 proiektu onenen egileek hiru astetako egonaldia egingo dute Euskal Herrian. Ikasleek ikastaroa osotasunean ordaintzen duten bekak jasoko dituzte, baina bertan parte hartu nahi dutenek azkar ibili beharko dute, eskabideak aurkezteko epea larunbat honetan, otsailaren 14ean bukatuko delako.
2009/02/09
Kate Camino da Nevadako Reno hiriko (AEB) Euskal Etxeko lehendakari berria. Renoko Zazpiak Bat Euskal Etxeko kideak bertako Louis' Basque Corner jatetxe euskaldunean bildu ziren urtarrilaren 24an, Zuzendaritza Batzorde berria hautatu eta batzorde zahar eta berria agurtuz urte berri bati ekiteko. Aurtengoan gainera, Zazpiak Bat-ek NABOren Biltzar eta Elkarretaratze Nagusia antolatu beharko du uztailean Renon. 14 pertsona dira Zuzendaritza Batzordeko partaide, tartean lehendakaria, lehendakariordea, idazkaria, diruzaina eta klubeko bi NABO ordezkariak, gehi zortzi batzordekide. Bilkura berean, plaka bat eman zitzaion 2002tik hona klubeko presidente izan den Javier Narvarteri.
2009/02/09
Tomas Onnainty, banaka, eta Francisco Saladino eta Cristian Zaccheo, binaka, izan dira txapeldun joan den larunbatean Chascomus herri argentinarrean egin den bertako II. Esku Huskako Haur Pilota Txapelketan. Norgehiagoka Sebastian Errecart-ek zuzentzen duen herriko Pilotako ikasleen artean jokatu da, Chascomus Pilota Klubaren trinketean. Aipatu txapeldunekin batera beste honako haur pilotariak aritu dira: Tomás Menchacabaso, Martín Menchacabaso, Estanislao Alfonsín, Tomás Laborde, Sergio Etchegaray, Javier Goya eta Gian Marrapodi. Zorionak guztiei.
2009/02/06
Necochea euskal etxea Argentinan San Sebastian eguna sutsuen gozatzen duen elkarteetako bat da, ezbairik gabe, eta urtetik urtera gero eta gehiago dira jai honetaz gozatzeko Necocheara biltzen dire lagunak. Elkarteak osatu duen danborradak ere ikuskizun aparta eskaintzen du, Sarriegi maisuaren doinuei jarraiki danborra joaz. Aurten euskal etxeak astebeteko ospakizunak antolatu zituen, urtarrilaren 19tik 24era eta Cristina Zubillaga bazkideak larunbateko ekitaldien argazkiak bidali dizkigu.
2009/02/06
NABO, Ipar Ameriketako Euskal Etxeen Federazioa, izan da hilabete honetan zehar San Franciscon, Boisen, Homedalen eta Chinon emango diren dantza ikastaroen antolatzailea. Klaseen ardura Josema Mendiola dantzari donostiarrak izango du. Mendiola dantzari aditua da; urte askotan Argia taldeko kidea eta ondoren Arkaitz taldeko zuzendaria. Mendiola ostegunean helduko da San Frantziskora eta hiru lantegi eskainiko ditu han, Basque Cultural Center elkartearen 27. urteurrenarekin batera. Boisen, Homedalen eta Chinon berdina egin ostean otsailaren 24ean bukatuko du AEBetako egonaldia.
2009/02/06
Pilota, euskal dantzak eta Bizi Emankorra sariak izango dira San Frantziskoko Basque Cultural Center elkartearen 27. urteurreneko jaiaren ardatza. Elkartea Kaliforniako hiri honetako euskal komunitatearen topagunea da eta kide asko bilduko dira datorren ostegunean --otsailak 12-- hasi eta igandean bukatuko den jaialdira. Ekitaldiak Pala Motzeko Ireki batekin hasiko dira, ostegunean, eta asteburuan zehar dantza lantegiak, erreki-jatea, dantzaldiak eta Bizi Emankorra sarien emanaldia izango dira gozagarri, azken hauek Anita Arduain, Pierro Etcharren eta Mayi Etcheverryri emanik.
2009/02/05
Miamiko Euskal Etxeak bilera ireki baterako deia luzatu du datorren asteazkenerako, otsailaren 11ean, hirian eta inguruan bizi diren euskaldunak elkartera bildu eta euskal etxea eta euskal komunitate antolatua indartu dezaten. Deialdia gizabanakoei zein euren senar/emazte eta familiei zuzendua da. Miamiko Euskal Etxea zenbait pauso ematen ari da elkartearen geroa ahalik eta sendoena izan dadin. Martxo honetarako, Euskara eskolak segituko dituela iragarri du, Boga sistemarekin, berritu berria duen 'KulturToki'an.
2009/02/05
Eusko Jaurlaritzak Euskal Herriko Agintzaritzaren Aldizkariaren bidez jakitera eman du atzerriko gizataldeen eta euskal etxeen eremuan espezializatzeko bekek esleipenaren onuradunen zerrenda. Joan den azaroan egin zen beka hauen deialdia eta oinarrietan iraupena urte betekoa izango zela azaltzen zen. Beken zuzkidura ekonomikoa 15.900 eurotakoa da. Bekak jaso dituzten eskatzaileak Iker Blas Mendoza, Aimar Rubio Llona eta Asier Ortega Murga dira. Euren eginkizunak Kanpo Harremanetarako Idazkaritza Nagusiaren bulegoetan egingo dituzte.
2009/02/05
Bukatu berria da urtero bezala Euskara Munduan egitasmoaren barruan urtarrilaren 2. hamabostaldian egin den Hego Ameriketako barnetegia. Aurtengoa Montevideon, Uruguaien, egin da lehen aldiz --aurreko aldi guztietan Argentinan egin izan da, Argentinan Euskaraz egitasmoaren baitan-- eta hasieran erronka handia bazirudien ere, ikasle, irakasle zein antolatzaileek arrakastatzat jo dute edizioa. Barnetegiaren antolaketaren ardura FIVUk (Uruguaiko Euskal Etxeen Federazioak) hartu du, FEVAren lankidetzarekin.
2009/02/04
Aurten ere Euskal Herrian edo euskaldunek eginiko zinemak erakuslehio ezinhobea izango du kataluniar hiriburuan, Bartzelonako Euskal Etxeak antolatu duen Zinemaldia jaialdiaren edizio berri batekin. Ohi bezala, nagusiek zein gaztetxoek izango dute zer ikusi: ostiralean bertan, haurrek eta neska-mutilek 'Go!azen' musikalaren kantuekin gozatu ahal izango dute, eta geroago nagusiek Helena Taberna zuzendariaren 'La Buena Nueva' filmearekin 36ko gudako gertakizunak gogora ekarri ahal izango dituzte. Tartean 'Oteiza Labirintoa' dokumentala, 'Nevando Voy' filma edo 'Danian Jai Alai', Floridako pilotariei buruzko lana izango dira ikusgai Euskal Etxean, besteak beste.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
