euskal diaspora eta kultura
2009/03/09
Euskal Herrian bizi eta lan egiten duen jende multzo batek 8H/Zortzigarren Herrialdea izeneko elkarte berria osatzeko dei irekia zabaldu datorren larunbaterako, talde eratzailearen aurkezpenaren ondoren sagardotegi batean bazkaldu eta ideia bultzatzeko interesa izan dezaketen pertsonek elkar ezagutu eta urrats berriak emateko moduan egon daitezen. Aurkezpena Herria Kultur Etxean izango da datorren larunbatean, eguerdiko hamabietan, eta bazkaria, berriz, ordu bietan Goiko-Lastola sagardotegian.
2009/03/06
Zu zeu euskaraduna bazara eta Estatu Batuetan bizi bazara, jakin ezazu AEBetako euskara koordinatzailea, Izaskun Kortazar, zeu bezalako pertsonen bila ari dela euskara irakasle bilakatzeko. Ez da gauza konplikatua eta oso lan ona egin dezakezu Estatu Batuetako euskal kulturaren alde. Formakuntza euren kontu. Ikasleek beti zuk baino gutxiago jakingo dute eta urtean dirulaguntza bat izan dezakezu klaseak emateko. Zu zeu egoera horretan bazaude, edota Estatu Batuetan inor ezagutzen baduzu ezaugarri horiekin, idatz iezaiozu e-maila Izaskun Kortazarri. Hasteko, haurrekin aritzeko irakasle bat falta da San Frantziskon. Baina aukerak askoz ere gehiago dira. Eskatu mesedez xehetasunak Izaskun Kortazarri.
2009/03/06
Gogo handiz ekin dio General Rodriguez herriko Eusko Aterpea Euskal Etxeak, Argentinako Buenos Aires probintzian, 10 urte beteko dituen urteari. Batetik, bere egoitzako eraikuntza lanei eutsi die eta ipar alderdiko pareta ari da goititzen. 12 metro falta zaizkio amaitzeko eta onartzen ditu lagungarri izango zaizkion doaitzak. Honi loturik, EEak 'ekarpen bono' batzuk ere atera ditu, apirilaren 11ean zozketatuko direnak. Elkarteko Ohiko Biltzar Nagusia hil honen 21ean egingo duen Eusko Aterpea ekitaldi proposamen zabala iragarriz sartu da bere urteurren urtean, tartean euskal dantza eskola eta taldea, 'Hitz Nagusiak' hitzaldi sorta, euskara tailerrak, Eguzkilore zine-kluba edo 'Nikomedes Iguain Azurza' liburutegia, 6.129 liburuki dituena.
2009/03/05
Duela ia hilabete, aurtengoan 16. edizioa beteko duen Korrikaren aurkezpena egin genuen orriotan. Aipatzen genuen, nola ez, martxoaren 26an Tuteratik abiatu eta Gasteizko helmugara apirilaren 5ean iritsiko den lasterketa euskaltzaleak, berriz ere, Euskal Herri geografikoko euskaldunak ezezik, kanpoko euskal herrietako euskaldunak ere bildu behar zituela bere baitan. Geroztik argitaratu ditugun zenbait artikuluetan, aipatu dugu besteak beste Korrikak Txinan, Mexikon, Ingalaterran, Madrilen, Argentinan... ere mugiaraziko duela jendea, herrialde horietako zenbait euskaltzale eta euskal etxeen eskutik. Horixe bera gertatuko da Katalunian ere, Bartzelonako Euskal Etxea medio hilabete osoko kultura jardunak egingo baitituzte. Hona egitarau bartzelonarraren xehetasun.
2009/03/05
Asmoa azaldu eta aurreneko urratsak prestatzeko lehenengo bilera, Estatu Batuetako hegoekialdeko profesional eta enpresariei zuzendua, datorren asteazkenean egingo da Miamin, bertako Euskal Etxearen eskutik. Elkarte berriak AEBetako euskal jatorriko eta Euskal Herriarekin loturarik daukaten profesional, exekutibo eta enpresariak bildu nahi ditu, kezka eta arazo (aman)komunak elkarrekin planteatu eta indarrak metatuko dituen enpresari sare euskal estatubatuarra sortzeko. Miamiko datorren asteko bileraren ondotik, beste bi deitu dira apirilerako, Kaliforniako San Frantziskon bata, AEB Mendebaldeko bazkidegaiak biltzeko, eta Salt Lake Cityn bestea, proiektua NABOren aurrean aurkezteko.
2009/03/04
Martxa onean jarraitzen dute Madrileko Euskal Etxearen kultur ekitaldiak. Joan den otsailaren 19an, adibidez, Hasier Larretxea baztandarreren 'Azken bala/Ultima bala' poema liburuaren aurkezpena egin zen. Liburua elebitan, euskaraz eta gazteleraz, argitaratu du Sevillako Pointdelunettes argitaletxeak. Aurkezpenean Zuriñe Muñoz artistak antzezlan labur bat eskaini zuen. Hileko beste ekitaldietako bat joan den otsailaren 26ean egin zen Euskaraokea izan zen: bertan Euskaltegiko ikasleek euskal kantak abestu eta bidez batez euskara praktikatzeko aukera polita izan zuten.
2009/03/04
Topagunea Euskara Elkarteen Federazioak antolatzen duen Film Laburren Zirkuituak Euskal Herriko kultur-etxe eta elkarteetara eramaten du urtero euskarazko laburmetraien selekzio bat. Aurten, lehen aldiz, zirkuituak nazioartera jauzi egingo du, Erroma, Paris, Bartzelona, Shanghai eta Londreseko euskal etxeei esker. 'Iaz Erromako Euskal Etxetik parte hartzea eskatu ziguten, baina egitaraua itxita zegoen jada', azaltzen du Topaguneko Manuel Morenok. Aurten bost euskal etxe hauek ahalegin handia egin dute eta Txinan, adibidez, filmak lau hizkuntzatan azpititulatu dituzte ikuslego zabal batengana hel daitezen.
2009/03/03
Halaxe galdetu dute joan den igandetik aurrera gure erredakziora deitu edota e-mailak bidali dituzten zenbait jendek. Patxi Lopezek ordezkatuko du Ibarretxe? Hala bada, euskal etxeek segituko dute? Zein aldaketa etorriko da lehendakari berri bat sartzen bada, horrek aldaketarik ekarri behar badu? Aurten izango al da Gaztemundu? Laguntza deialdiek segituko dute? Hauek dira Diasporako lagunen buruetan bueltaka dabiltzan galderetako batzuk, edo guri behintzat egin zaizkigunak. Katedrarik ezarri nahi izan gabe, hona geure iritzia, momentu honetan ditugun datuen gainean eraikia, inorentzat argigarri izan daitekeelakoan.
2009/03/03
Asier Polo biolontxelo jole bilbotarrak Montereyko Orkestra Sinfonikoarekin bat egingo du aurten ere eta bost kontzertuko bira laburra egingo du Kalifornian hilaren 21, 22 eta 23an. Emanaldiak Salinas eta Carmel hirietan izango dira eta bertan Polok Dvorak-en Biolontxelo Kontzertua joko du bere instrumentuarekin, 1689an Italian Francisco Ruggieri maixuak egin zuen biolontxeloarekin. Asier Polo Musikene, Euskal Herriko Goi Mailako Musika Ikastegiko irakaslea da.
2009/03/03
Shanghaiko Euskal Etxeak, Asiako lehen eta momentuz euskal etxe bakarrak, jarduera egitarau mardula prestatu du hilabete honetarako. Hasteko, datorren igandean Emakumeen Eguna ospatuko dute eta martxoaren 14ean III. Squash Txapelketa egingo dute. Zineak ere lekua izango du, martxoaren 21ean egingo den laburmetrai emanaldiarekin. Eta egitarauari bukaera borobila emateko Korrika aurten ere Txinaraino helduko da, Shanghaiko euskaldunei esker: 27tik 29ra bitarteko asteburuan 'Korrika Txikia' egingo da Hong Kong-en.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
