euskal diaspora eta kultura
2009/04/01
Euskal antzerkiaren historia biltzen duen liburua argitaratu du Patri Urkizu (Lezo, 1946) idazle eta UNED-eko euskal literatura iraskasleak. Lan honen izenburua 'Teatro Vasco. Historia, reseñas y entrevistas, antologia bilingüe, catálogo e ilustraciones' da, UNED-eko argitaletxeak plazaratu du eta bertan ezagutzen ditugun lehendabiziko euskal antzezlanetatik hasi --Nafarroako erregin Katalina 1goaren ezkontzan, 1494an, antzeztu ziren kopla batzuk-- eta egundaino bidaia egiten du. 'Norberaren tradizioa ezagutu gabe ezinezkoa da abangoardia berrietara jauzi egitea', azaldu zuen egileak aurkezpenean. Liburu hau berritze bide horretan bere ekarpena omen da. Urkizu erbesteko euskal antzerkian ere aditua da.
2009/04/01
EuskalKultura.com-ek dagoeneko iragaria duenez, AEBetan, Oinkariko dantzariek urtebete luzeko ospakizunak prestatzen ari dira taldearen 50. urteurrena dela eta. Emanaldiak Boiseko San Ignazio jaiekin hasiko dira (abuztuaren 1a eta 2a) eta 2010eko abenduan egingo den ikuskizunarekin bukatuko. Tartean, 2010eko uztailean egingo den Jaialdin, mende erdi honetan taldetik igaro diren kide guztiak bilduko dira emanaldi erraldoia egiteko. Tartean izango dira taldea sortu zuten zazpi aitzindariak. Idaho Statesman egunkariak beraiekin hitz egin du taldearen historiaren berri galdeginez, jarraian laburtu eta euskaratu dugun artikuluan.
2009/03/31
Gaur arratsaldean, 13:30ak irian hil da Euskal Herrian, Kanboko (Lapurdi) Ania-Enia ospitalean, aita Martxel Tillous, urtebetez minbiziarekin borrokan ibili ondoren. Xiberoko Eskiulan sortua, urte luzeak eman zituen Afrikako Bolikostan misionist eta Pariseko Euskal Etxeko omonier ere izan zen, lau urtez, Estatu Batuetako euskaldunen apez izendatu zuten arte. Estatu Batuetan ia 14 urte eman ditu, 1995etik hona. Bere aldeko elizkizunak ostiralean egingo dira Eskiula bere sorterrian, arratsaldeko 3etan, Baionako apezpikua eta andana bat apez meza-emaile. Goian Bego.
2009/03/31
Eusko Jaurlaritzak gaurko Gobernu Kontseiluan onartu du Etxepare Euskal Institutuak aurtengo jarduera finantziatzeko izango duen aurrekontua, 941.671 euro, erakundea abiatzeko. Joan den astean Institutuan arituko diren hamar langileen postuen soslaiak finkatu ondoren --eta hauek betetzeko deialdia gutxi barru deituko delakoan-- ia dena prest da gobernu berria sartutakoan erakundeko zuzendaria izenda dezan. 'Etxepare Euskal Institutua/Basque Institute' euskal kultura, bere hizkuntza ofizialetako edozeinetan eta zeinahi adierazpen, euskarri, bide eta adierazmoldetan, Euskal Autonomia Erkidegotik kanpo sustatzeko, hedatzeko eta proiektatzeko sortutako erakunde autonomoa da.
2009/03/31
Eusko Jaurlaritzak gaurko Euskal Herriko Agintaritzaren Aldizkarian (EHAA) argitaratu du aurtengo euskal etxe eta atzerriko federazioei zuzenduriko laguntza deialdia. Laguntza hauek eskatu nahi dituzten euskal etxe eta elkarteek bihartik hasi eta maiatzaren 5a bitartean dute epea. Laguntza deialdi honetarako erabiliko den zuzkidura milioi bat bostehun eta hogeitasei mila zazpirehun eta bost eurotako da. Deialdiaren oinarriak eta eskabideak aurkezteko inprimakiak www.euskadi.net webgunean edo EHAAn eskuratu daitezke.
2009/03/30
Hamaika Bidek eta Deustuko Unibertsitateak antolatzen duten Erbesteari buruzko X. Mintegia urriaren 5etik 8ra egingo da Bilbon eta Donostian. Mintegia zuzenduko duen batzorde zientifikoa aukeratu eta aurtengoan edizioan landuko dituzten gaiak aurreratu dituzte jada: erbesteratuen bizitza, beraiek idatziriko testu, gutun eta memorien bitartez. Pertsonai horietako batzuk honakoak izango dira: Orixe, Jose Antonio Agirre, Irujo, Manu de la Sota, Jokin Zaitegi, Andima Ibiñagabeitia eta Aurora Arnaiz, besteak beste. Mintegiak Federico Álvarez filosofo eta literatur aditu euskal-mexikarrari omenaldia egingo dio.
2009/03/30
Fábio Aristimunho idazle eta itzultzaile euskal-brasildarrak 'Poesias de Españha, das origens à guerra civil' izeneko bilduma aurkeztuko du ostiral honetan Sao Paulon. Aristimunho bildumaren editore eta itzultzailea izan da. Bildumak euskal, kataluniar, galiziar eta espainiar poesia aztertzen ditu, lau ale desberdinetan. Aurkezpena Sao Pauloko Casa das Rosas aretoan egingo da eta guda zibilak poesia hauengan izan zuen eraginari buruzko mahainguru batekin hasiko da. Eztabaida honetan Aristimunho bera eta Estebe Ormazabal, euskara irakasle eta Brasilgo Euskal Etxeko kidea, ariko dira, besteak beste. Ondoren bildumako poesien irakurraldia egingo da bost hizkuntzatan: euskeraz, katalanez, galegoz eta gazteleraz, eta bakoitzaren portuges itzulpena.
2009/03/30
Mexikoko Puebla hirian egiten den Kulturaniztasunaren Asteak euskal doinua izan du aurten, Eusko Jaurlaritza eta Mexikoko Euskadiko Ordezkaritzari esker. Astean zehar euskal luzemetrai eta laburmetraiak izan dira ikusgai, Kirmen Uribe poetak irakurraldia eskaini du, euskal taldeen kontzertuak egon dira, kale antzerkia, erakusketak... aukeratzeko frango. Patxi Baztarrika Hizkuntz Politikarako sailburuordea eta Lorea Bilbao aholkularia bertan izan dira eta, besteak beste, Euskara eta Euskal Kultura Lektoregoak eskaintzen dituzten lau unibertsitateetako arduradun akademikoekin bildu dira.
2009/03/27
Hiru mila zenbakia daraman alea plazaratu aste honetan, Baionatik Euskal Herri osorako, Diaspora Barne, plazaratzen den Herria astekariak. Ez da hau xifra makala edozein aldizkarirako, eta are gutxiago euskara hutsean argitaratzen den kazeta batendako. Izan ere, 1944an Pierre Lafitte kalongeak astekaria sortu zuenetik gaurdainoko doazen epean lortu ahal izan da. Janbattit Dirassar zuzendariak azaltzen duenez, berez denbora horretan hiru milatik gora izan dira karrikaratu diren aleak, baina une batean berriz ere zerotik zenbakitzen hastea erabaki zutelarik, aste honetan iritsi da hiru milako zenbaki biribila. Zorionak Herriako lankideei eta oro har, euskarazko prentsari!
2009/03/27
Aste honetan bere hiru milagarren zenbakira iritsi delarik, honako zutabea argitaratu du zenbaki berezi horretan Baionako euskal kazetako zuzendari den Janbattit Dirassar-ek. EuskalKultura.com-etik geure edalontzia bildu nahi dugu Herriako eta euskal prentsa osoko lagunengana eta topa egin elkarrekin urtebetetzearendako, hasteko. Lerro hauek omenaldi izan daitezela 1944tik hona eta lehenagotik --Diasporatik ere-- euskal kazetaritzaren sua bizirik atxiki dutenen ohore. Zorionak Herria-ko Janbattit, Peio, Emile, Maixan, Jean... Eta Emile Larrek aste honetako zenbakian berean esaten duen gisan, "Biba, segur, holako gizonak eta emazteak, lehengoak eta heldu direnak. Iraun dezala bai, holakoak eman eta emaiten dituen HERRIA".
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
