euskal diaspora eta kultura
2009/05/05
Zurrumurruek ziotenez Radio Euzkadi, frankismo garaietan Venezuelako euskal gazte batzuek gidatzen zuten irrati emisora klandestinoa, munduan zehar zebilen itsasontzi batetik emititzen zen. Frankoren aliatuek irratia aurkitu eta ixtera behar ez zitzaten asmatutako gezurra zen, noski. Pello Irujok, irratiko sustatzaile eta esatariak, asmatu zuen txaluparen kontua eta txalupa imajinarioa horretatik munduko berri ematen zieten Euskal Herrian errepresiopean bizi zirenei. Orain, Pello Irujo hil eta sei hilebetera, Arantzazu Ametzaga emazteak garai haietako testigantza dakar gogora, 'La txalupa de Radio Euzkadi. Una semblanza de Pello Irujo Elizalde' lanean. 'Aurkezpenean lagun asko etorri zen niregana, 'Ni ere txaluparia naiz' esanez', azaltzen du hunkituta. Euskal-venezuelar gazte haien abenturak Euskal Herrian eta Diasporan izan zuen oihartzunaren seinale.
2009/05/04
Nafarroako Gobernua 72.000 eurotako laguntza deialdia egiten ari da, 2009an zehar Argentinan eta Txilen egiten diren gizarte ekimenetarako. Laguntza hauek, ohi bezala, herrialde hauetan dauden nafar etxeen bitartez bideratuko dituzte. Lehentasuna izango dute, besteak beste, medio ekonomiko gutxi dituzten haur, nagusi, ezindu eta gaixoei eta behar larria duten nafar jatorridun pertsonei zuzenduriko proiektuak. Foru Komunitatea 2002an hasi zen laguntza hauek eskaintzen, urte horretan eman zen krisi ekonomikoak sortu zituen behar larriei aurre egiteko. Eskabideak aurkezteko epea ostiral honetan, maiatzaren 8an, itxiko da.
2009/05/04
Sunbillako Ulibeltzak elkartea izan da maiatzaren lehenean, Ameriketan artzain ibili ziren herritarren biltokia. Hogeita hamar 'amerikano' bildu dira urtero bezala maiatzaren lehenean Estatu Batuetako mendebaldean pasa zituzten urteetako pasadizo eta bizipenen kontu kontari. Eguna elkartean bertan eginiko 'amerikar' moduko gosari batekin hasi zen, mendiko ibilbideak eta bazkaria eta afaria ere bildu zituen egun osoko egitarauan. Aurtengoan, Jesus Goldaraz apezaren hutsunea nabaritu zen, azkeneko urte luzeetan urtero parte hartutakoa baitzen Sunbillako ospakizun honetan. Aurtengoan hogeita hirugarren urtea bete du.
2009/05/04
Posadasko Euskal Jatorri Euskal Etxeak, Misiones probintzia argentinarrean, Zuzendaritza berritu du Ohiko Biltzar Orokorrean. Agintealdi berria hasiko duen Zuzendaritza Batzordeak Marta Sarasola berrautatu du lehendakari, eta berarekin batera arituko dira batzordekide Edgard Urrutia, lehendakariorde; Horacio Ochoa, idazkari; René Bergara, idazkariorde; Gabriel Alzarria, diruzain; eta Hilda Lazcoz, diruzainorde, besteak beste.
2009/05/02
Cañuelas herriko Denak Bat Euskal Etxeak, Argentinako Buenos Aires probintzian, Ohiko Biltzar Orokorra egin eta Zuzendaritza Batzordea berritu du, lehendakari berria Francisco Daniel Sancholuz atera delarik. Berarekin batera buruzagi berri dira Roberto Horacio Etchevers, lehendakariorde; Veronica Lucia Zulaica, idazkari; eta Migel Angel Landa, diruzain, beste zenbaiten karguren artean.
2009/05/01
2009/04/30
Udalbide/Udalbiltzako Zuzendaritza Batzordeko kide den Ramuntxo Camblong euskaltzale ezaguna asteartean iritsi da Argentinara eta egunean bertan errezibitu dute Buenos Airesko Iparraldeko Euskal Etxekoek. Segidan, bertako ordezkaritza batekin, Eusketxe eta Laurak Bat ere bisitatu ditu, euskal udal erakunde nazionaleko kideak egunotan Argentina eta Uruguaira egiten ari diren bidaia eta kontaktu-programaren barnean. Bitartean, Bixente Arozena Udalbide/Udalbiltzako hautetsi nafarrak, Argentina-Uruguain joan den astetik dagoenak, hastapenean iragarritako aurkezpen egitarauari segitu dio, Ruper Ordorika, Xamar, Jose Angel Irigarai eta Pamielako arduradunekin batera. Atzo eguerdiz bildu ziren guztiak Buenos Airesen, berehala Bahia Blanca aldera abiatu, eta bertan atzo eta gaur aurkezpen saioak burutzeko. [argazkiak]
2009/04/30
Chascomuseko Zingirako Euskaldunak elkarteak joan den apirilaren 25ean Gernikako bonbardaketaren biktimen omenezko ekitaldia egin zuen, gertaera latz honen 72. urteurrena zela eta. Ekitaldia Buenos Aires probintziako hiri honetan dagoen Gernikako Arbolaren Kimuaren aurrean egin zen eta elkarteko neska-mutilak izan ziren protagonista. Gazteak gogotsu aritu ziren gaiari buruzko marrazkiak egiten, horrela bakearen aldeko eta guden aurkako mezua zabaldu nahian.
2009/04/30
Diaspora argentinarreko euskal etxe batzuk Aberri Eguneko ospakizunak Aste Santuarekin batera egiten badituzte ere, ez dira gutxi opor garaian geratzen ez den hileko beste astebururen batera pasatzen dutenak. Hala egiten du Rosarioko Euskal Etxeak, esaterako. Rosarion Aberri Eguna muntatu dutenek argiro diote 'abertzaleen egutegiko urteko datarik garrantzitsuena' dela. Aurtengoan, programa apirilaren 17 eta 18an garatu zen, hitzaldi eta afari batez, helburu batekin: 'Aberri Egunaren mamia eta esangura azaltzea, askatasunaren aldarrikatzaile eta gizakion duintasunaren defendatzaile denez gero', esplikatu dute.
2009/04/29
Euren araudiei jarraiki, Argentinako eta munduko hainbat euskal etxe zuzendaritza batzordeak berritzen aritu dira azkeneko asteetan. Aldaketa horien berri eman digutenen artean ekimenetan arras aktiboak diren honako bi euskal etxe argentinarrak daude: Buenos Aires probintziako José C. Paz herriko Toki Eder Euskal Etxea, Maria Angeles Oñederra eper berrirako ere lehendakari, eta Santa Fe probintziako Rosarioko Zazpirak Bat EEko lehendakari berri Claudio Esnal. Zorionak biei.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
