euskal diaspora eta kultura
2009/06/24
Iparraldeko Euskal Etxeak Sorgin Afaria antolatu zuen joan den asteburuan, Buenos Airesen San Juan sua ospatzeko. Bateko eta besteko osagaiak bilduz, edabe magikoa bailitzen, akerra eta sorginak solstizioaren festara etorri zituen, umorea eta giro on eta koloretsua baldintza eta ezaugarri izan zituen hitzordu gautxorian. Ohi baino jende gehiago bertaratu ziren, antolatzaileen esaten. Euskal Etxea leizezulo edo harpe baten modura, oihal ilun, puxika beltz eta paperezko sagu zaharrekin mozorroturik, partaideak azti eta sorginak izan ziren gehienbat.
2009/06/23
Emprebask-USA --Estatu Batuetako euskal jatorriko enpresari, exekutibo eta profesionalak bildu nahi dituen elkarteak-- bilera batera deitu du datorren ostegunerako Boisen, elkartekide izateko interesa izan dezaketen guztiei zabalik. Ekimen berriak, aurretik Txile eta Mexiko bezalako beste herrialde batzuetan egin den bezala, euskal jatorriko pertsona eta eragileak bildu eta harremanetan jarri nahi ditu, euren kezkak, ahaleginak, arazoak, soluzioak eta informazioa partekatzeko, ekonomia alorreko AEBetako euskal sare bat sortuz. Boiseko bilera datorren ostegunean, ekainaren 25ean, izango da, arratsaldeko zazpietan Euskal Etxean, eta aurretik Miamin, San Frantziskon eta Salt Laken eginikoen ondotik dator.
2009/06/23
Hernan Luis Sorhuet uruguaitarra da, Hazparne herri lapurtarrean jatorria duen familia batean sortua. Euskal kulturarekiko harremanari eutsi dio eta Montevideoko 'Euskal Erria' Euskal Etxeko kide da, eta urtetan aritu izan da bertako zuzendaritzako kide. Biologia irakasle eta El País Montevideoko egunkariko kazetari, haurrentzako liburuen egile ere bada Sorhuet. 2007. urtean bere familiari buruzko 'Sorhouet' liburua argitaratu zuen, bertan azaltzen zuela bere familiak Hazparnetik Uruguairaino ibilitako bidea. Orain, 'El clima cambió. ¿Hacia dónde vamos?' liburua aurkeztu du, klima aldaketari buruz haurrentzat egindako lana.
2009/06/23
Aurten ehun urte betetzen ari den erakunde honen estatutuek diotenari segituz, Buenos Aires probintzia argentinarreko Bahia Blancako 'Unión Vasca' Euskal Etxeak bere Zuzendaritza Batzordeko kideak berritu ditu, Ohiko Batzar Nagusian bildurik. Euskal Etxeak berak plazaratu duen idazki batean azaltzen duenez, Mikel Xabier Irazustak eutsiko dio lehendakaritzari eta berarekin izango dira Batzordeko partaide Miren Lore Markiegi, lehendakariorde; Maria Amelia Irastorza, idazkari; eta Jose Manuel Lopetegui, diruzain, beste zenbait karguren artean.
2009/06/22
Euskal dantza eta musika ikuskizun batez eta 'Florencio de Basaldua, euskal argentinarra' liburuaren aurkezpena ekitaldia eginez ospatuko du Eusketxe Buenos Airesko Eusko Kultur Etxeak aurtengo San Juan eguna. Ekitaldia etzi, arratsaldeko zazpietan hasiko da Mexiko 1880ko euskal egoitzan, Ekin Dantza Taldearen eskutik. Euskal abestiek ere euren lekua izango dute Euskaltzaleak-eko Abesbatza eta Alkartasunaren Otxoteari esker. Liburuaren aurkezpena, berriz, Juan José Guarestiren (iloba) etorriko da. Eusketxetik gogora arazten dute, bestalde, salgai daudela honez gero Euskal Herrira bidaiatzeko elkarteko 2009ko zozketa bonoak.
2009/06/22
Euskal Herri osoko laurehun lagunek irakurri zuten txandakatuz joan den ostegunean Juan Antonio Mogel idazle bizkaitarraren 'Peru Abarka' (1802) eleberria. Jendaurreko irakurketa Bilboko Arriaga antzokian gauzatu zen, bertara bildu zirelarik, bideo eta pantailen bidez, munduko hainbait euskal etxetako euskara ikasleak, besteak beste Frankfurt, New York, Boise, Erroma, Londres, Buenos Aires, Valparaiso, Montevideo, Montreal, Valladolid eta Bartzelonatik. Honekin bigarren edizioa izan du Bilbo Zaharra euskaltegiak antolatutako 'Klasikoen Irakurraldia' ekimenak. Iaz Pedro Axular nafarraren 'Gero' (1643) irakurri zen.
2009/06/22
Laudorioak jaso ditu Santiagoko Euskal Etxeko jatetxeak egiten duen sukaldaritza tradizionalak, joan den igandeko La Nacion egunkariko Magazineak argitara eman duen gastronomia artikulu batean. Cesar Feres kritikariaren aburuz, Eusko Etxean goraipa daitezke "duintasunez, kokotxak baratxuriekin, bakailaoa bizkaitar erara, giltzurrunak xerezez, arrain mota ugaria (meroa, berrugeta, itsas aingira) eta aspaldian hartu ditudan tripakirik onenak, urdai-azpiko, piper eta txorizo askoduna". Kazetariaren esanetan, nazionalitate jakin bati lotutako klub eta elkarteetako jatekoa beheiti doan testuinguru batean, Eusko Etxeak eutsi egiten dio, prezioetan zuhur eta oro har ongi egindako sukaldaritza batez.
2009/06/19
"Sergio Recarte euskal jatorria duen argentinarra da. Euskal kultura Argentinan zehar zabaltzen ematen du bere denboraren zati handi bat. General Villegaseko (Argentina) Euskal Etxearen bazkide eta sortzaileetako bat da, baita euskal kulturari buruzko Beti Aurrera buletinaren sortzailea eta Euskonewseko Kosmopolita ataleko ohiko kolaboratzailea ere". Honela hasten da Maider Sillero kazetariak Sergio Recartez egiten duen aurkezpena, ondoren elkarrekin izandako elkarrizketa argitaratzeko, guztia Euskonews astekari elektronikoko azkeneko zenbakian.
2009/06/19
Kristoaurreko festa erlijio arropez jantzia. San Juan bezperan --udako edo neguko solstizioan-- Ipar Hemisferioko egunik luzeena ospatzen da eta Hego Hemisferioan, berriz, laburrena. Ohiturak markatzen duenez, San Juan bezperan suak piztuko dira Euskal Herriko hamaika txoko eta plazetan. Munduko euskaldunek ere, tradizio honi eusten diote eta hau dela eta gaur gauetik aurrera datorren asteburuko larunbat-igandera arte, munduko zenbait euskal etxek suaren erritoa errepikatuko dute, hala nola, besteak beste, Argentina, Mexiko, Katalunia, Uruguai, Espainia, Estatu Batuak eta Venezuelako bazterretan.
2009/06/19
Hamabost emakumek osatzen dute datorren igandean St. Patrick katedralean eta New Yorkeko Eusko Etxean kontzertu bana eskaini duen Goruntz abesbatza eibartarra. Maria Jesus Agirre zuzendari, taldeak euskal errepertorioko kantu arras ezagunak kantatuko ditu, tartean Maitia nun zira, Xalbadorren heriotzean, Nerea izango zen edo Ixil ixilik dago bezalako kantuekin. Arratsaldeko lauetan katedralean arituko dira eta bi ordu beranduago, berriz, Eusko Etxean, bertan afaldu eta emanaldia eskaintzeko. Astebete eskaseko bidaia, Harlem-eko godspel saioak dastatu eta zenbait musika kontzertutara joateko baliatuko dute Goruntz-ekoek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
