euskal diaspora eta kultura
2009/09/10
Gaur iluntzean aurkeztuko da Concordia herri argentinarrean, Entre Rios probintzian, 'Reseña histórica de la Colectividad Vasca de Concordia' (Concordiako Euskal Gizataldearen aipu historikoa) izeneko liburua, Fermin Elizaincin idazle, olerkari eta bertako Euskal Etxeko kideak egina. Aurkezpena 'Julio Serebrinsky' Liburutegian egingo da, Immigrantearen XVI. Erregio Festaren eta VI. Probintzi Festaren egitarauaren barruan. Ekitaldira Euskal Gizataldeko Erregina bilduko da, Nerea Gonzalez Ovcharenko, eta berarekin batera gainerako gizataldeetako erreginak.
2009/09/10
Rosarioko Nafar Etxeak urtero antolatzen dituen sanfermin festen kasuan ere normaltasuna inguratzen ari da pixkanaka, eta elkarte nafarrak aste honetan, bihartik igandea bitartean ospatuko dituela iragarri du, bere momentuan A gripearen larritasun egoerak behartuta bertan behera utzi behar izan baitzituen. Kultur ekitaldi batek, Nafar Etxeko 'Manuel Turrillas' fanfarrea partaide eta bideoak eta irudiak proiektatuz, emanen die hasiera igande goizean meza batez Katedralean eta musika eta dantza jaialdi batez arratsaldean amaituko diren ekimenei.
2009/09/09
Kepa Junkera AEBtan da bere lan berria prestatzen. Bilbotarrak 2010ko uztaila arte bertan egoteko asmoa du. 'Etxea' lanaren ildotik jarraituz, ameriketako artistekin euskal kantak grabatzea da egonaldi honen helburua. Hala ere, tarteka kontzertuak eskainiko ditu bertako musikarien laguntzarekin. Datorren larunbatean, esaterako, San Frantzisko ondoko Redwood Cityn arituko da, eta 17 eta 19an, Wisconsin-en, 'Madison World Music Festival' jaialdian.
2009/09/09
A gripea dela eta uztailean bertan behera utzi behar izan ondoren, La Platako Euzko Etxeak San Fermin festa ospatu zuen joan den asteburuan, Euskal Etxeko bazkide, lagun eta udal agintariak partaide. Egitarauko parte, Graciano Mendilaharzu margolariaren inguruko hitzaldia eman zen, omenaldia eskaini zitzaion Gernikako Arbolari eta beste zenbait ekitaldi burutu ziren. Iruñeko ohiturari jarraiki txupinazoak eman zien hasiera ofiziala asteburuko San Fermin jaiei.
2009/09/09
Eusko Jaurlaritzak eta Argentinako Euskal Erakundeen Federazioak (FEVA) 'Euskal Herriko Baserriak' eta 'Soinu-tresnak Euskal Herri Musikan' erakusketak ekarri dituzte Argentinara bertako publikoaren eskueran jartzeko. Herri askotan euskal etxeetako aretoetan egon dira argazki-bildumok ikusgai. Rosarion, berriz, erakusketak Udaleko Erdigune Barrutian aurkeztu eta bertan egon dira abuztuko bigarren hamabostaldian. Irailaren 1etik aurrera hiriko zenbait kultur etxeetarainoko jauzia ari dira egiten, erakusketa ibiltari gisa. Irekiera ekitaldiak anitz jende bildu zuen eta Barrutiko Kultur Koordinatzaileak biziki eskertu zion Zazpirak Bat Euskal Etxeari 'hain garrantzitsuak diren erakusketa hauen aurkezpena Udaleko aretoan egitea'.
2009/09/09
Buenos Airesko Iparraldeko Euskal Etxeak Argentina eta Rio de la Platarako immigrazio bearnesa ardatz hartzen duen 'Lo que me contó abuelito' (Aitatxik kontatu zidana) filma aurkeztu zuen joan den asteko asteartean, hiriburu federaleko Moreno kaleko bere egoitzan. Agnès Lanusse-ren ideia batean oinarritua Dominique Gautier zuzendari, dokumentala egileen eskutik aurkeztua izan da agorriletik aurrera Argentinako Azul, Tres Arroyos, Santa Rosa, Tandil. Buenos Aires eta Cordoban, eta baita Uruguaiko Montevideon ere.
2009/09/08
Hauteskundeak eta lehendakari aldaketa heldu zaio Saladilloko Itxaropen Euskal Etxeari, Argentinako Buenos Aires probintzian, urte batzuetan lehendakari --eta lehendakari arras aktibo-- Silvina Bordenave izan ondoren, hauteskundeek Hector Eduardo Altamirari pasatu baitiote ardura hori. Maria Silvina idazkari izatera pasastu da Zuzendaritza Batzorde berrian. Eurekin batzordekide, besteak beste, Adriana Maria Osen, lehendakariorde; Nora Idoeta, idazkariorde; Alfredo Elizagaray, diruzain; eta Barbara Ugartemendia, diruzainorde.
2009/09/08
Madrilgo bikoteak, Mariano Larrañaga eta Ernesto Recuero, irabazi du joan den astean Bizkaiko Balmaseda herrian jokatu den Munduko Euskal Gizataldeen Mus Txapelketa. Abuztuaren 29tik irailaren 5era egin den txapelketan Euskal Diasporako 11 bikotek hartu dute parte. Bigarrena Frantziako bikotea izan da eta hirugarrena berriz, Balmasedakoa. Antolakuntzatik azaldu dute bai muslariak, baita hauekin etorritako laguntzaile eta ordezkariak ere, oso gustura aritu direla Balmasedan. Musean jokatzeaz gain, turismoa egiteko parada izan dute eta Bilbo, Gasteiz, Urdaibai eta Gaztelugatxen izan dira besteak beste. Datorren urtean, Estatu Batuetan, Kaliforniako Chinon, izango da Munduko Mus Txapelketa.
2009/09/08
Egunotan munduko Euskal Etxe asko ikasturte berria ari dira hasten [Ipar Hemisferiokoez ari gara, izan ere Argentinan eta orohar, Hego Hemisferioan abenduan bukatuko baita 2009 ikasturtea, urte naturalarekin bat]. Bartzelonan, Euskal Etxekoek irailaren 1ean ekin zioten ikasturteari, irailaren 10ean amaituko den euskara ikastaro trinko batekin. Irailaren 11ean, 'Diada' edo Kataluniako Aberri Eguna ospatuko dute txistulari, txalapartari eta dantzariekin. Aldi berean, Euskal Etxeko Txokoa eraberritzeko lanak bukatuta, Guillem Joan kantautore katalanak emanaldia eskainiko du irailaren 18an. 23an, berriz, Rafa Rueda euskalduna izango dute gonbidatu. Eta ahaztu gabe: zabalik da euskara ikastaroetan izena emateko epea ere eta, lerro hauen bitartez, Aitor Arruti lehendakariak jendea animatu nahi du parte hartzera.
2009/09/07
3300/09 ordenantza medio 'Euskal Herria' izena hartuko duen plaza eraikitzeko baimena eman dio Trenque Lauquengo Udalak bertako euskal komunitateari. Proiektua 2008ko urrian aurkeztu zen Kontseilu Deliberantean eta joan den uztailaren 31eko Kontseiluaren bilkuran izan da onartua. Proiektuaren bukltzatzaile nagusia izan den Euskal Sustraiak Euskal Etxeko kideak poz-pozik daude erabakiarekin: 'Batzorde administratiboan zenbait alderdi politikotako ordezkariak daude, baina gure proposamena aho batez onartu dute eta hori azpimarratzekoa da. Laster Euskal Herritik etorritako immigranteak gogoan dituen berdegune bat izango dugu' azaldu diote Euskal Sustraiak-eko arduradunek EuskalKultura.com-i.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
