euskal diaspora eta kultura
2009/09/15
Hala da, Joseba Sarrionandia, 1985etik erbestean ezkutuan bizi den euskal poeta, non dagoen zehatz-mehatz galdera-ikur izaten segitzen duen euskal sortzailea Kolonbian egon da, Manizales-ko Nazioarteko Antzerki Jaialdiko XXXI. edizioan. Ez zen fisikoki bertaratu, baina bai bestela, euskaraz, gaztelaniaz eta portugesez zuzendutako bere poema zorrotz eta aztoratzaileen bidez. Poesia baita, izan ere, 'Hnuy Illa' obra honen ardatza, esan nahi baita Kukai-Tanttaka dantza eta antzerki konpainia gipuzkoarrak saio bakarrean eskainirik --jaialdia inauguratzeko hain zuzen-- joan den asteko astelehenean, irailak 7, hiri kolonbiar honetako Los Fundadores antzokian ikusteko parada izan genuen taularatze lan txundigarri honen ardatza [Antioquiako Euskal Ikasketa Etxeko kide den Jose Migel Ramirezen kronika, propio EuskalKultura.com-entzat idatzia].
2009/09/15
Urriaren 5etik 8ra bitartean, Donostian eta Bilbon egingo dira Erbesteari buruzko Nazioarteko X. Kongresuko hitzaldiak. Hamaika Bide elkarteak eta Deustuko Unibertsitateak antolatuta, aurtengoan 'Erbestean bizitakoen testigantzak' izango dira mintegiaren ardatz. Hitzaldiak Bilboko eta Donostiako Deustuko Unibertsitatearen egoitzetan eta Donostiako Koldo Mitxelena liburutegian izango dira. Hauetan, besteak beste, Baroja, Orixe edota Agirre lehendakariaren bizitzaren zenbait alderdi orain arte ezezagunen inguruan solastuko da.
2009/09/14
Datozen hilabeteotan euskal literatura lan berri ugari izango dugu Euskal Herriko liburudendetan. Besteak beste, Joan Mari Irigoien, Unai Elorriaga eta Karmele Jaioren azken eleberriak. Horietaz gain, Asun Garikano itzultzaileak 'Far-west-eko Euskal Herria' lana aurkeztuko du, Renon euskal emigrazioaren inguruan jasotako testuen bilduma. Miel Anjel Elustondok, bere aldetik, William A. Douglass antropologoaren bizitza biltzen du 'Mr. Basque' lanera. Douglass-ek Renoko Unibertsitateko Center for Basque Studies sortu zuen. Deia egunkarian A. Garmendiak argitaratutako informazioa erabili dugu artikulu honetarako.
2009/09/14
Euskal Herriko Unibertsitateko ADN Bankuak abian du euskal ADNari buruzko ikerketa eta urrian Argentinan izango dira bi ikerlari bertako euskal komunitateko kideei laginak hartzeko. Honekin jakin nahi dute euskaldunek genetikoki, zein mailatan joera gehiago duten zenbait gaixotasun harrapatzeko. Marian Martinez de Parcorbo ikerketa zuzendariak EuskalKultura.com-i azaldu dionez, asko dira kontutan hartu beharreko faktoreak, pertsonaren bizimodua, dieta, giroa eta abar. 'Horregatik hain da garrantzitsua Diasporan bizi direnak aztertzea. Euskal jatorrikoak izanda, beste herrialde batean bizi dira baldintza klimatikoak edo dieta guztiz ezberdinekin eta honek ADNan duen eragina jakin nahi dugu'. Iaz AEBtako euskaldunen artean hartu ziren laginak.
2009/09/14
Azken hilabete hauetan eta aurtengo egitarauari jarraituz, FEVAko (Euskal Argentinar Erakundeen Federazioa) Zuzendaritza Batzordeko kideak barnealdeko euskal etxeak ari dira bisitatzen, bertako lagunekin elkartu, harremanak indartu eta Euskal Herriari buruzko material didaktikoa eskuratzeko. Bidaiok euskal etxeen arteko loturak sendotzeko xedea daukate, elkarteen ekintzak bultzatuz. Etorkizunari begira, FEVAko ordezkariek jarraituko dute euskal etxerik euskal etxeko euren ibilbidea, Patagoniako Viedma, Comodoro Rivadavia, Trelew eta Río Colorado hiriak bisitatuz.
2009/09/14
Euskal dantzak munduko leku askotan dantzatzen direla jakina da, batez ere euskal komunitateek eusten diote tradizio honi. Orain, antza denez, badira gure dantzak biziarazten lagunduko digutenak, non eta Japonian. Sustatu.com eta Dantza.com web orrialdeek dantza eta dantzari batzuen bideoaren berri eman digute. Dantzariak japoniarrak dira eta dantza 'Baztan dantza' gisa aurkeztu dute. Dantza.com-ek Baztango mutil-dantza bat dela argitzen du, Billantziko, hain zuzen ere. Hona gure dantzen bertsio japoniarra.
2009/09/11
South San Frantziskoko 'Basque Cultural Center'eko kirol instalazioek bildu dute Kalifornian Abuztuaren 28 eta 29an NABOko Pilota Txapelketaren 34. edizioa. Pilotari gizon zein emakumeak lau lekutatik helduak dira --Idahoko Boisetik, eta Kaliforniako Chino, Bakersfield eta San Frantziskotik-- eta partidak buru-belarri segitu dituzten publiko atxikia lortu dute. Gizonezkoetan, 'Paleta B'n, Urruty/Chiramberro bikotea izan da garaile; 'Esku huskako B'n, Etchebehere/Falxa; Emakumeen paleta goman, Etcharren/Cuburu; Gizonezkoetan esku huska banaka, Javier de Luz; beteranoetan, paleta goman binaka, Javier Andueza/Pierre Irola; Emakumeen paleta goma argentinan, Bushman-Ocafrain/Etcharren; Esku huska binaka, 'A klase'an, De Luz/Petrissans. Azkenik, 'Paleta Goma A'-n, Dalia/Iriartborde izan da NABO bikote txapelduna.
2009/09/11
Estatu Batuetako euskal komunitateak eta Euskal Herritik etorritako zenbait jendek bat egin zuten abuztuaren 28-30eko asteburuan San Frantziskoko 'Basque Cultural Center'en, euskal kultur eta besta elkarretaratzea egiteko, hor barnean Mixel Etxekopar-en 'Euskamerikan artzain' pastorala txalotzeko, pertsularien entzuteko, dantzariak eta kantariak loriatzeko, gostian kantuz eta dantzan arizateko eta, hori guztia, iragan martxoaren 30ean hil zen aita Martxel Tillous xiberotarra gogoan atxikiz, harek ere maite baitzuen euskal kultura biziaraztea, euskara eta euskal moldeei arrunt atxikia baitzen hondarreko 14 urteotan Estatu Batuetako euskaldunen omonier izan zen gizon tipi handi isil langile eskiularra.
2009/09/11
Janire Egaña eta Joxi Gonzalez musikari euskaldunak abuztuaren erdialdera lurreratu ziren Argentinan hogei bat egun pasatzeko asmoz. Heldu bezain pronto Buenos Airesko euskal etxe batzuekin kontaktuan jarri eta berehala sortu zen emanaldi batzutarako parada: Buenos Airesen, San Miguelen eta Chascomusen. Berehala, plangintza handirik gabeko bidaia euskal festa bizia bihurtu zen. Jotako leku guztietan jendeak zutik txalotu zituen, musikariei malkoak eraginez. 'Guretzat kristoren hartu-emana izan da. Zuek agian pentsatuko duzue guk jaso baino eman egiten dugula, baina egiazki alderantziz da', aitortzen dute. 'Hemen gertatu zaiguna ez da edonon automatikoki gertatzen. Musika beti da musika, baina benetan gustura jotzeko giro bat behar da, eta giro hori, hemen, zeuok sortzen duzue'.
2009/09/10
Euskal erbestearen inguruko eduki berriak ikusgai dira Hamaikabide.org eta Kondaira.com webguneetan. Lehenengoan, besteak beste, 'Victorio Vicuña: Así fue la liberación del sur de Francia' liburua aurkezten da; 'Hilabeteko Pertsonaia', Federico Alvarez Arregi irakasle eta idazle donostiarra da, eta 'Hilabeteko artikulua', Parisen 1952an Euzko Deyan argitaratutako 'Moral del exilio' testua daukagu. Kondaira.com-en, ostera, Euskal Diasporaren inguruko lau artikulu daude, euskaraz: 'Erreinuaren bihotzean. Euskaldunek Madrilen osaturiko elkartea (XVIII-XIX. mendeetan)'; 'Aro berria ameriketako nafar emigrazioaren irudiaz: bere buruaren eta bestearen inguruko ikuskera'; 'Ameriketara joandako emigrantearen irudia Euskal Herriko prentsan (1876-1936)'; eta, azkenik, 'Pariseko Eskual Etxea eta euskal nortasuna'.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
