euskal diaspora eta kultura
2009/10/05
EuskalKultura.com-ek argazki lehiaketa baterako deia zabaldu zuen joan den uztailean, Diasporarekin edo euskal kulturarekin zerikusia duten gaiez, tartean Euskal Herrian bertan ateratako argazkiak, baina hobetsiz Euskal Herritik kanpo biziarazten den euskal kulturarekin eta Diasporan euskaldunek garatutako ekimenekin zerikusia daukaten gaiak. Hiru sari banatuko dira, irabazleetako bakoitzari Xamar-en 'Euskara Jendea' liburuaren ale bana; parte hartutako gainerako guztien artean liburu beraren beste hiru ale zozketatuko dira, Pamiela argitaletxearen politesia. Originalak bidaltzeko epea abenduaren 1ean Euskal Herriko gaueko 12etan ipini da.
2009/10/05
Amaitua da joan den ostiralean Bogotan Euskal Kolonbiar Kultur Astearen seigarren edizioa. Euskal Etxean eta Gernika Parkean egin ekitaldiez bukatu dira 2009ko saioak, besteak beste Euskal Etxeko Zuzendaritza Batzordeko kide izan zen Rafael Martin omenduz eta bere familia bertan, EEko areto nagusiari haren izena ipiniz. Horrekin batera, Astearen azkeneko egunak, euskal zine emanaldiak, hezkuntza zineari buruzko foroa eta egitarauaren hondarreko hitzorduen ahitzea ekarri du, arrakastaz, izan ere.
2009/10/02
Patxi Lopez lehendakariak lehenengo bidaia ofiziala egingo du Europara datorren astelehenean, Bruselara, eta Eskualdeetako Komitearen osoko bilkuran parte hartuko du --euskal presidente batek hala egingo duen lehen aldia izango da--, Durao Barroso Europar Batzordeko presidentearekin eta Joaquin Almunia Europar Komisario bilbotarrarekin bilduko da, eta euskal enpresari talde batekin bilera pribatu bat egingo du, eguna Euskadiko Ordezkaritzan Bruselan bizi den euskal gizataldeari harrera ekitaldi bat eginez amaituko duelarik, euskal europarlamentariak eta bestelako gonbidatu batzuk ere bertan. López lehendakariak Kanpo Harremanetarako Idazkari Nagusi Guillermo Echenique izango du laguntzaile; idazkari nagusiak asteartean, hilaren 6an, Bruselan egingo diren zenbait bileretan parte hartuko du, lehendakaria gabe.
2009/10/02
Euskal egitarau aberatsa heldu den astelehenean Bremen-en: Euskararen inguruko hitzaldiak irakasle alemanek emanik, Jabi Elortegi zuzendariaren 'Zorion Perfektua' filmaren estreinu alemaniarra eta ondoren mahai-ingurua bat partaide gisa zuzendaria bera, Anjel Lertxundi idazlea eta Jaurlaritzako Euskararen Sustapenerako zuzendari den Lourdes Auzmendi, eta horrekin batera Frankfurt-eko 'Euskal Ikaskuntzen Alemaniako Etxe'ko Euskara eta Euskal Kultura lektore den Mercedes Perez-en sarrera ikastarotxo bat euskararen gainean... honelako zenbait ekimenek osatzen dute datorren astelehenean Bremengo 'Hizkuntzen Jaialdia'k euskarari eskainiko dion eguna. Hori guztia Jaialdiaren aurtengo eslogana burutik kendu gabe: 'Language is fun, Language is culture, Language is society, Language is life' (hizkuntza ongi pasatzea da, hizkuntza kultura da, hizkuntza gizartea da, hizkuntza bizitza da).
2009/10/02
Nafarroako Gobernuak, Argentinako Nafar Etxeen Federazioarekin adostuta, Buenos Airesen egun gutxi barru egitekoa zen Argentina eta Txileko nafar gizataldeen bilkuraren X. edizioa aurtengoz bertan behera uztea erabaki du, "indarrean dagoen krisialdi ekonomikoak gastuak zorrozteko eta lehentasunak ezartzeko neurriak aregotzea eskatzen baitu". Erabakia, Gobernuak nafar etxeekiko politikan lehenetsi behar dituen ekimenak adostu ondoren hartu da, foru exekutibotik EuskalKultura.com-i adierazi zaionez.
2009/10/01
Eusko Jaurlaritzako ordezkaritza bat partaide da Europako Migrazio Institutuen Elkartea (Association of European Migration Institutions, AEMI) Alemanian egiten ari den bilkuran. Gasteizko gobernua AEMI-ko kide da erakunde horrek 2007an Finlandiako Turku herrian eginiko bileran onartu zuenetik, eta elkarteak iaz Italiako Genoban egin zuen elkarretaratzean ere izan zen partaide. Kanpo Harremanetarako bi teknikarik osatzen dute ordezkaritza, Benan Oregi eta Andoni Martin-ek. Aurtengo saioak atzo asteazkenetik datorren larunbatera arte luzatuko dira --irailaren 30ean eta urriaren 1, 2 eta 3an-- Alemaniako Bremen eta Hanburgo hirietan.
2009/10/01
Argentinaren Bigarren Mendeurreneko ekitaldien barne antolatutako ekimen honetara Chacoko hainbat buruzagi bertaratu ziren, tartean Resistencia hiriburuko alkatea, Aida Ayala, Maria Luisa Lucas Justizia Epaimahai Goreneko Ministroa --estatuaren emaile--, Carlos Garcia Luzuriaga, omenduaren berbiloba, Bigarren Mendeurreneko Batzordeko presidenteordea Jorge Bernal eta estatua --generalaren bustoa-- egin duen artista, Miguel Angel Acosta. Buruzagi eta ordezkari andana bat gehiago ere bazen, Euskal Etxeko ordezkaritza ere tartean. Enrique Miguel Luzuriaga generala, Manuel Luzuriaga Elgarresta merkatari eta arrantxu-jabearen berbiloba zen; eta Hego Ameriketako zenbait herrialdetako historia liburutan izena ezarria duten hainbat senide eman dituen familia bateko kide.
2009/10/01
Bidasoaldeko (Gipuzkoa-Nafarroa arteko eskualdea) hainbat sukaldari eta artistak elkartasunezko afari eta pintura-eskultura erakusketa batera hurbiltzeko deia egin dute 'Taupadak' euskal GKEa, Boliviako amazoniar oihanean emakume indigenek gestionatuko duten turismo-zentro bat eraikitzeko garatzen ari den proiektuari laguntzeko. Zentroa ireki aurretik, Taupadak emakumeen formakuntzaz arduratuko da, lan munduan behar bezala sar daitezen. Bilbon egon ala ez, ekimenari laguntasuna eskaini nahi badiozu, egin dezakezu, 'zero mahaia' ere erosi ahal izango baita.
2009/09/30
Emakume bat hamar gizonen artean. Hala adostu zuen Txileko Nafar Etxeak joan den abuztuaren lehenean Santiagon eginiko Bazkideen Bilkuran. Hamar gizonen artean, eta buru, baztandarrak nagusi diren etxe honetan Diharasarri baztandarra presidente hautatu baitzuten bere batzordekideek. Harekin batera hona zuzendaritza batzordekide izateko hautatuak izan zirenak: Javier Aguerrea, Fernando Alvarez, Francisco de Almozara, Simon Echenique, Eusebio Ilzauspe, Juan Cruz Istilart, Javier Mendiburu, Agustin Otondo, Francisco Otondo eta Fernando Perez.
2009/09/30
Hiru Michelin izar dituen Martin Berasategi euskal sukaldari ospetsuak jatetxe berria zabaldu du joan den astelehenean, Espainiako estatutik kanpo irekitzen duen lehena, non eta Shanghain, Txinako hiriburu ekonomikoan. Irailaren 28an [txinatar egutegiaren arabera oparotasuna eta zorte ona ekarriko duten faktoreak biltzen dituen eguna] ateak irekita, bere euskal sukaldaritza --eta baita pintxoak ere-- dastatu nahi dituenak badu bertan biltoki polita. Hirurogei pertsona dauzka lanean --gehienak bertakoak-- eta sukaldeburu gisa Maxime Fanton eta Yago Marquez gazteak, luxuzko eraikin eta inguru lakudun eder batek lagunduta lanean. A, eta pintxo barra ere badauka.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
