euskal diaspora eta kultura
2009/10/14
Brasilgo 'O Globo' egunkari garrantzitsuak, Fabio Aristimunho Vargas poeta eta itzultzaileak espainiar, galiziar, katalan eta euskal poesiez portugesez plazaratu dituen sail bereko lau liburuez artikulu erreseina argitaratu zuen joan den ostiralean. Bella Jozef irakasleak sinatzen du lana 'Herrialde baten aurpegi anitzak' izenburupean, eta aukera edertzat jotzen ditu liburuak Brasilen gutxi ezagutzen diren literatura hauetara hurbildu eta konturatzeko horra bildu dena zatiño txiki bat baino ez dela.
2009/10/14
Bisita luzatuko diete Donostiako Gaztelubideko abesbatzako kantari eta lagunek Shanghaiko Euskal Etxeko euskaldunei. Datorren igandean, urriaren 18an izango da, eta egun osoko kantu giroa agintzen du heldu zaigun gonbidapenak. Ekitaldiak goizeko hamarretan hasiko dira, talde bisitaria Shanghaiko Euskal Etxearen egoitzara iritsi eta harrera ekitaldia egingo zaionean. Eguerdian, ostera, meza abestua gauzatuko du koralak, Saint Peter elizan. Ondotik, senidetasun bazkaria egingo da Chinoise Story jatetxean, kantuak eta ikuskizuna barik 'entzunkizuna' programako parte. Shanghaira hurbiltzen diren Txinako euskaldunek denbora luzean gogoan gordeko duten oroitzapenaren itxura hartua du hitzorduak. Euskal Etxetik, baina, bazkarirako erreserbak astearte gaueko hamarrak aurretik egitea eskatzen dute.
2009/10/13
Jakina denez Buenos Aires probintzia hego-mendebaldeko Bahia Blanca hirian izango da aurten Argentinako Euskal Aste Nazionala eta horri dagokionez plazartu berria du bertako Union Vasca Euskal Etxeak urriaren 26tik azaroaren 1era arte garatuko den hitzordu horren behin betirako egitaraua. Ekitaldiak urriaren 26an, astelehenez, hasiko dira Euskal Baserriei buruzko argazki erakusketa batekin Euskal Etxearen egoitzan; eta igandez, azaroaren 1ean bukatuko, ohiko senidetasun bazkariarekin, FISA delako aretoan.
2009/10/13
Yolanda Arrietaren 'Badago ala ez dago?' obra --"patua/halabeharra eta sorginak osagai dituen komedia dinamikoa"-- irakurriko du gaur Buenos Airesko VII. Nazioarteko Antzerki Jaialdiaren baitan bertako Laurak Bat Euskal Etxeko talde batek 'Babel, la biblioteca' zikloan. Ziklo honetan hogei bat antzerki-lan irakurriko dira euren jatorrizko hizkuntzetan, ezezagunak edo 'urrunak' diren hizkuntzak eta kulturak ezagutarazteko asmoarekin. Obraren egilea, Yolanda Arrieta Malaxetxebarria, Argentina eta AEBetako diasporan ahaideak dituen euskalduna, pozik azaldu zaio EuskalKultura.com-i 1992ko Euskadi Antzerki Saria lortu zuen lan hau Buenos Airesen aukeztuko dutela jakitean. Emanaldia, gaur, arratsaldeko zazpietan, sarrera doan.
2009/10/12
Zegokion data A gripea dela-eta hartutako neurriengatik atzeratu ondoren, joan den larunbatean ospatu zuen Saladillo 'Itxaropen' Euskal Etxeak bere 11. urtemuga eta, ohi bezala, bere bazkide eta lagunak bazkari eta elkarretaratze batera gonbidatuz egin zuen. Ohiturari jarraituz baita ere, bazkariko mahaiburukoa --postre edo deserta-- berezia izan zen, eta hizki jangarrietan idatzirik zeukan lagunak otordu horretara biltzeko efemeridea. Elkartearen izenean, Hector Altamira EEko lehendakari berria mintzatu zen, bildutakoei euren presentzia eskertuz eta epe labur eta ertainerako planak azalduz.
2009/10/12
2009/10/10
Paraná hiriburu entrerriostarretik astero aireratzen den Presencia Vasca irratsaio euskal-argentinarrak Elvira Kortajarena, Eusko Jaurlaritzaren Argentinako Ordezkari berria elkarrizketatuko du igande honetako saioan, saioko zuzendari eta esatari den Federico Borras Alcain-en eskutik. Kortajarena, ia 14 urtez Madrilgo Parlamentu espainiarrean Gipuzkoako hautetsi gisa izan duen eserlekuari uko egin ondoren etorri da Argentinara. Eskarmentu politiko handiduna, ongizate sozialean aditua da eta Ibarretxeren gobernuak izendatu zuen Marieli Diaz de Mendibil-en ordea hartua du joan den hilabetean.
2009/10/09
Euskal Herritik, Euskal Abertzaletasunaren Museoa, Sabino Arana Fundazioak kudeaturikoa, FEVAri eta euskal-argentinar komunitateari zuzendu zaio, Agirre Lehendakaria agertzen diren irudi finko zein mugikorrak eskuratzeko. Jakina denez, Agirre Jaurlaritzako lehenengo Lehendakaria izan zen, eta lau bidaia egin zituen Argentinara. Norbaitek hau irarri eta berak ez, baina halakorik izan lezakeen beste norbait ezagutuko balu, erregua luzatzen zaio baita ere, bigarren pertsona edo erakundearen datuak pasa ditzan, operazio honen helburuak batera edo bestera bete ahal izan daitezen.
2009/10/09
Amodioak mugarik ez duela esanez idatzi digute Argentinako Chaco probintziatik, bertan joan den asteko ostiralean izan zen ezkontza baten berri emanez. Ezkontideak, Mikel Olkoz eibartarra eta Vanesa Gerardi chacotarra izan ziren, eta ezkontza "euskal moldekoa", dantzariak, arkoak, musika, aurreskua eta beste hainbat gauza 'euskal erara' egin baitziren. Apaiza ere --'aita Migel Angel'-- euskal jatorriduna omen zen eta ezkontza ondoko festetan ez ziren fandango eta arin-arinak batere faltatu. Eibartik senargaiaren familia bertaratu zen, eta zeremonia bukatu zenean, norbaitek "nobixuak zoriontsu izan daitezela" esan omen zuen. Chacoko 'Kotoiaren Lurra' euskal etxeko kideak bikotea eskortatu zuten egun osoan, haiei onena opatuz.
2009/10/09
Elkarretaratze polita egin zuten igandean Baigorrin, Estatu Batuetan ibili ziren berrehundik goiti personek, tartean gizon-emazteak eta familiak, eta haurrak ere. Izan ere, hiru 'amerikano' belaunaldi bildu ziren, gisa batez edo bestez Estatu Batuei lotuak, urtean behin urriaren lehenengo asteburuan normalean Nafarroa Behereko herri diferente batean egiten den bilkura eta festara. Pozik ziren antolatzaileak, eta euretako Henri Oçafrain bankarrak --urte andana bat San Frantziskon eginik orain Euskal Herrian bizi denak--, EuskalKultura.com-i esan dionez "gauza polita da ikustea hitzordu honek jende gehiago biltzen duela urterik urte, belaunaldi gazteak partikularzki".
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
