euskal diaspora eta kultura
2009/12/30
Hirugarren urtez jarraian, Eusko Kultur Etxeak, edo askorentzat Eusketxe gisa ezagunagoa den Buenos Airesko elkarteak, berrehun bat laguntza-bonu jarri ditu salgai uztailetik, kultur ekimenek eta Etxeko sortutako gastuei aurre egiteko helburuarekin. Saldutako bonu hauen artean Euskal Herrirako bidaia zozkatu da joan den abenduaren 19an, erakundearen urte amaierako jaian. Dantzek, abestiek, pintxoek eta ardo onak inguru ezin hobea sortu zuten irabazlearen izena jakiteko. 147 zenbakiarekin, zorionduna Ekin Dantzari taldeko kide den Mariana Spallato izan da. Aurten zortea izan ez dutenek topa egin zioten Marianari eta erakundeari, datorren urtean eurak irabaziko dutelakoan.
2009/12/30
Bogotán, bertako Euskal Etxea Fundazioa lan bat ari da garatzen Kolonbian, euskal pilota sustatu eta kirolzale direnentzat edo kirola praktikatu nahi dutenentzat beste aukera polit, interesgarri eta egingarri gisa aurkeztuz. Ahalegin horretan, azaldua diote sostengua Bogota hiriburuko Alkatetzak, unibertsitateek eta kirol elkarte batzuek. Sartzear dagoen 2010erako iragarri dute honez gero Nazioarteko Pilota Jardunaldi batzuk, kantxan, euskal, mexikar, venezuelar eta kolonbiar pilotariak partaide.
2009/12/30
Teknologia berriek artisten lanak sustatzeko moduan zeresan handia izan dute, eta hari horri tiraka Test-Media ikertzaile talde euskaldunak, gaur egungo euskal musikariek internetekin eta web 2.0 orrialdeekin duten harremana ezagutzeko azterketa sakon bat burutu du. Last.fm, Myspace, Spotify eta Itunes dira aplikazio erabilienak eta sare sozialen artean Facebook da ospetsuena. Ondorengo lerroetan, internet komunikazio bide gisa gehien erabiltzen duten artisten zerrenda aurkitu dezakezue, Diasporako batzuk tartean.
2009/12/30
Rio Gallegos-en, Patagoniako Santa Cruz probintziako 'Hegoalde Argentinarra' Euskal Etxeak, Urte Azkeneko festa ospatu zuen joan den igandean. Euskal gizataldeko kide eta lagunek une goxoak pasatu zituzten 'asado' argentinar baten inguruan, txapelak eta euskal jantzi batzuk soinean, harro, euskaldun sentitzeak eta Euskal Herriarekiko hurbiltasunak bertara bilduta. Cesar 'Toti' Arizmendi lehendakari duen euskal elkarteak, urterokoa bilakatzen ari den Euskal Herrirako txartel biren zozketa ere egin zuen, sariaren osagarri mila euro dirutan, bidaia gastuetarako. Sinestea kostatu zitzaion Marela Cagnolok eskuratu zuen bidaia preziatua.
2009/12/30
2000. urtean Oñatiren eta José C. Paz herri argentinarraren artean senidetasun harremana bultzatu zuen lan-ildoak aurrera darrai. Bederatzi urtetik goiti baliabideak eta ahalegin solidario etengabea bideratzen aritu ondoren, hainbat proiektu eta ekimen jakin bultzatuz eta aurrerabidean ipiniz, halaegin oñatiar hori Gobernuz Kanpoko Erakunde (GKE) bilakatu da, Hermansoloña izena hartuz. Oraingo Eguberri kanpainan ere, Oñatiko zenbait elkarte laguntzailerekin batera lankidetzarako ohiko deialdiak egin dizkiote Oñatiko herriari. Baita bertsotan ere.
2009/12/29
Eusko Jaurlaritzak atzo eman zuen argitara Agerkari Ofizialean (EHAA) 'atzerrian dauden euskal gizataldeetako partaideak diren eta egoera larrian eta asistentzia faltan dauden pertsonei laguntzeko' 2009ko deialdiko emaitzak. Guztira 85 pertsona edo familia izango dira orotara 207.843 euroko kopurua banatuko duen programa honetako onuradunak, 26 euskal etxe eta bost herrialdetakoak, hala nola Argentina, Txile , Mexiko, Uruguai eta Venezuela.
2009/12/29
Asko dira urtean zehar Arrecifesko Euskal Etxeak antolatzen dituen ekintzak. Errepidea hartuz beste euskal etxe batzuek eratutako jardueretan ere hartzen dute parte Euskaldunak Denak Bat-eko kideek, hala nola, Cañuelasko 'Dantzari Egunean', edota Euskal Astean, batzuk aipatzearren. Alabaina, arrecifestarren urte amaierako festak zapore berezia izan ohi du arrazoi bat baino gehiagogatik: alde batetik, etxean egiten diren ekintzetako partaideak biltzen direlako; bestetik, herritik kanpo bizi direnak (euskal) etxera bueltatzen direlako jaiegunak pasatzera. Horrela, lagunen artean, agur esan zioten Arrecifesko euskaldunek mementu goibel baina alaiak ere daramatzan 2009 urteari.
2009/12/29
Atzo bertan jakin arazi zenez, euskal jatorriko Ron Parraguirre epaile nevadatarra estatu honetako Gorte Goreneko Justizia Buru izango da egun gutxi barru, 2010ean, orain arte zeregin horretan ibili den James Hardesty jujearen lekua hartuz zazpi kideko gorte honen buruzagi gisa. Urtero berritzen den Epaimahai Goreneko Justizia Burua (chief justice) Estatuko adar judizialaren buru administratiboa da eta gorte goren horretako eleduna.
2009/12/29
Deia egunkariak eman zuen argitara istorioa atzo. Gizona, Manuel Camara galdamestarra, egun 84 urte dituen eta duela 60 urte Argentinan bizi den gerlako euskal haurra, azkeneko urteotan joan da jakiten bazitekeela alaba bat --orain ia 60 urtekoa-- izatea Ingalaterran sortua. Manuel Ingalaterrara eraman zuten 1937an, 12 urte zituela eta bertan beste hainbeste urte eman zituen, 24 urte zituela Argentinara emigratzea erabaki zuen arte. Bera bizi zen etxeko emazteak izan zuen haurra, eta senarrarena balitz bezala hazi zuten, geroztik azken hiru bat urteetan egia plazaratzen joan bada ere.
2009/12/28
Abenduaren 19an aurkeztu da Jose C. Paz-eko Toki Eder Euskal Etxean 'Ellos lo hicieron' (Beraiek egin zuten) liburua. Maria del Pilar Uribeondo y Ruiz idazleak Jose C. Paz-en urtetan funtzionatu zuen Alvarez Vazquez lantegi eta langileen historia kontatzen du liburu honetan. 'Galiziako gizon batek Urbin, Basaurin, eraiki zuen bere lehenengo lantegia eta ekimentsua zenez, beste bi Ameriketan, Montevideon eta Argentinako Jose C. Paz-en. Makina bat euskaldun etorri ziren lantegi honetan lanera; hori dela eta gaur egun euskal jatorria duen jende ugari dago Jose C. Paz hirian, baita San Miguelen eta inguruko beste herri batzuetan ere', azaldu dio liburuaren egileak EuskalKultura.com-i. Oraingoz, 400 aleko tirada egin da eta FEVAk baimena eskatu dio Uribeondo andreari datorren urtean Buenos Airesko Liburu Azokan aurkezteko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
