euskal diaspora eta kultura
2010/01/14
Frankfurten egoitza duen Euskal Ikaskuntzen Alemaniako Etxeak zine emanaldiak berreskuratuz ekingo dio urte berriari; hala eginen du bihar bertan, ostirala, "San Fermines'78" dokumentala proiektatuz, ondoren hilaren 27an, asteazkena, Kimuak saileko lanak eskainiz segitzeko. Baina ororen buru esan beharra dago elkarte alemaniar euskaltzale horretako koordinatzaile Martin Petrus harremanetan jarri dela EuskalKultura.com-ekin deialdi bat luzatzeko euren lanak Frankfurten eta Alemaniako leku gehiagotan erakutsi nahi dituzten euskal luzemetraiagileei, harremanetan jar daitezen berarekin, herrialde germaniarreko zenbait zinemaldirekin ari baita lanean, euskal ikusentzunezko emaitzei ahalik eta hedapenik handiena ematearren. Laburmetraiagilea bazara, ez aukera galdu.
2010/01/13
Unai Elorriaga idazle getxoztarrak eta bere ingeleseratzaile Amaia Gabantxok New Yorken hasiko dute bihar datorren urtarrilaren 28ra arte Estatu Batuetako zenbait hiritan egingo duten irakurraldi bira. "Plants Don't Drink Coffee" da Elorriagak idatzirik ingelesez argitaratu den lehenengo liburu honen izena, izan ere Brooklyn-New Yorkeko Archipelago Books argitaldariaren eskutik. Bira honek New York, Washington Hiria, Menphis, Reno eta Bostoneraino ekarriko dute bikote idazle-itzultzailea.
2010/01/13
Eusko Jaurlaritzaren Gobernu Kontseiluak Lehendakaritzaren egitura organikoa eta egitekoak finkatzen dituen dekretua onartu zuen atzoko bilkuran, bi Idazkaritza Nagusi berri sortuz: Koordinaziorakoa, eta Herritarren Partaidetzarako eta Dokumentaziokoa. Kanpo Harremanetarako Idazkaritza Nagusiari dagokionez, orain arte iragarrita baina ofizialki onartu gabe zegoen Euskadiko Ordezkaritzen murriztea onartu zen, eta baita ere Julian Celaya buru duen Zuzendaritzaren izen aldaketa, EuskalKultura.com-ek bere momentuan aurreratu bezala, aurrerantzean Kanpoan diren Euskal Herritarrentzako eta Gizataldeentzako Zuzendaritza izena hartuko duena.
2010/01/12
Bilbotarra da Pedro J. Oiarzabal, baina andana bat urte eman ditu Euskal Herritik kanpo, besteak beste Nevada-Renoko Unibertsitatean, euskal Diaspora aztertzen. Oraingoan, Unibertsitate horretako Euskal Ikasketa Zentroa medio argitaratu duen "Gardeners of Identity, Basques in San Francisco Bay Area" (Identitatearen lorazain, San Frantziskoko Badialdeko euskaldunak) liburuarekin datorkigu. AEBetako komunitaterik zaharrenetakoa eta garrantzitsuenetakoa da San Frantziskokoa. Ezagutu nahi duenak, testua eta hainbat argazki, hemen dauka aukera. Argitalpenak bat egin du ia, aurten 50. urtebetetzea ospatzen ari den San Frantziskoko 'Basque Club' Euskal Etxearen urteurren biribilarekin.
2010/01/12
Chubut probintzia argentinarreko Diario de Chubut egunkariak artikulua eman zuen argitara joan den igandean, bertako Trelew herriko Chubut Ipar-Ekialdeko Euskal Etxeko obrei buruz. "Egoitza izango duen areto eder bat ari da eraikitzen Chubut Ipar-Ekialdeko Euskal Etxea Langileen Hiribidean -ia 25. errepidean- Trelew-en; berau bukatzeko babesa eskatu zion Probintziako Gobernuari eta horren zain dago", hasten da ondoko lerroetara ekarri dugun artikulua.2010/01/12
Atzo hartutako erabakiaren arabera Nafarroako Gobernuak bere doluminak adierazi nahi dizkio joan den abenduaren 31ean hil zen Teofilo Espadas Remirez jaunaren familiari, bereziki Rosarioko Nafar Etxeko lehendakari ohi zenaren Maria Eugenia eta Maria Fernanda alabei, eta baita Rosarioko eta, oro har, Argentinako gainerako Nafarroako Etxeei.
2010/01/11
Atzo amaitu zen Buenos Aires probintziako Chascomus herrian, Argentinako Udaleku edo lehenengo euskal udalekua, astebetez eta joan den astelehenetik, urtarrilak 4, urtarrilaren 10era arte bertako Zingirako Euskaldunak Euskal Etxeak antolaturik gauzatu dena. Maipú, Laprida, Gral. Villegas, Paraná, La Plata, Mar del Plata eta Chascomús bertako 12-16 urte bitarteko gaztetxoek hartu dute parte euskal testuinguruan kirol, aisialdi eta kultur arloak landu dituen ekitaldi honetan. Antolatzaileek emaitzek pentsatutakoa gainditu dutela esan dute, esperientzia ahaztezin gisa aipatuz, eta hasiak dira dagoeneko 2011ean bigarren edizioa prestatzen.
2010/01/11
Euskara eskolei berrekin nahi zieten eta halaxe egin dute. Joan den urriaren 5etik hasita ikasle talde bat osatu dute hiriburu paraguaitarreko Jasone Euskal Etxeko zenbait bazkide, lagun eta buruzagik eta errepublikan duela 39 baino gehiago daramatzan Jesus Nazabal berastegiarra irakasle Aitorren hizkuntzarekin ari dira astero, aldi berean Euskal Herriko kultur jakingarriak eskuratzen eta euskal lurralde, eskualde eta herri zein hirietara hurbiltzen.
2010/01/11
Bernardo Atxagaren bi kontaketa klasiko, euskal publikoarentzat aspaldidanik ezagunak direnak, ingeleseratu eta elkarrekin eman ditu argitara Nevada-Renoko Unibertsitateko Euskal Ikasketa Zentroak (CBS) 'Two Basque Stories' izenburupean. 'Bi letter jaso nituen oso denbora gutxian' eta 'Sugeak txoriari begiratzen dionean' dira testuok, Nere Leteren itzulpena medio oraingoan hurrenez hurren 'Two Letters All at Once' eta 'When a Snake Stares at a Bird' gisa kaleratuak. Liburua, gomendagarria lagun ingelesdunei oparitzeko, ingelesa praktikatzeko edo gustua berritzeko oraingoan ingelesez irakurriz, aise eros daiteke CBSren webgunean edota liburutegirik garrantzitsuenenetan.
2010/01/11
Bilboko apezpiku laguntzaile Mario Izetak eta Gasteizko apezpiku Migel Asurmendik atzorako iragarri zuten Ekuador-era egingo duten bidaiaren hasiera, herrialde amerikar horretan lanean ari diren euskal misiolariei bisita egin eta --apezpiku laguntzaileak esan duenez-- euren egoera in situ ezagutuz Euskal Elizbarrutien Misioen geroa hobekiago argitu ahal izateko, azaldu dute Bilboko Gotzaindegitik ohar baten bidez. Guayaquil-era heldu eta Arenillas, Huaquillas eta Santa Rosa bisitatuko dituzte Machala-ko Elizbarrutian eta Baba, Palenque, Vinces eta El Cafetal, Babahoyo-koan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
