euskal diaspora eta kultura
2010/02/12
Gaurtik aurrera eta asteburu luze osoan --astelehena jai da AEBetan-- San Frantziskoko Basque Cultural Center-ek (BCC) bere 28. urtebetetzea ospatuko du, zenbait ekitaldirekin. Horien barnean, NABOk bere neguko bilera egingo du bihar euskal etxean bertan eta gaur arratsaldez hasiko dira, bestetik, pilota protagonista berezi izango duten asteburuko ospakizunak, honetarako Euskal Herritik propio etorritako pilotari ordezkaritza bat medio, Euskadiko txapeldunak barne. Horrekin batera, programak 'kantu afari' bat, zenbait barbakoa eta otordu herrikoi, musika euskalamerikarreko dantzaldiak Ketxo talde baxenafartarra tarteko, eta klikaren, bertsolarien, dantzarien eta etxeko abesbatzaren emanaldiak ere baitaratuko ditu.
2010/02/12
![Vicente Fox Mexikoko presidente ohia [Donostian sortua du ama buruzagi mexikarrak, Mercedes Quesada] eta Julian Celaya, Jaurlaritzako Herritarrentzako eta Euskal Gizataldeentzako zuzendaria, Mexikon egindako bilkuran](https://www.euskalkultura.eus/fitxategiak/irudiak/solteak/2010/02/mini_foxcelaya-ha.jpg)
Eusko Jaurlaritzako Herritarrentzako eta Euskal Gizataldeentzako zuzendari Julian Celaya eta Mexikoko presidente ohi Vicente Fox Mexikoko Hirian bildu dira, Celaya eta bere departamentuko Benan Oregi teknikaria Ipar Ameriketara egiten ari diren bidaiaran barnean. Bidaia horren baitan, joan den asteburuan 'Begibistan ezkutatuta: euskaldunak' erakusketaren inaugurazio ekitaldietan hartu zuten parte New Yorken, Ellis Island-en. Bi euskal funtzionarioek bidaiari eutsiko diote eta asteburu honetan Estatu Batuetara itzuliko dira, NABOk San Frantziskoko Basque Cultural Center-en egingo duen bileran parte hartzeko, elkarte horren 28. urtebetetzeko programaren barruan.
2010/02/12
Elur ekaitzak ekarritako iztopoen gainetik, aurrera darrai Nafarroako ordezkaritza bat, Sanz presidentea buru Estatu Batuetara egiten ari den bidaia. Izan ere ohikoa bilakatzen ari da urte sasoin honetan bidaia hau, Estatu Batuetako Nafar Astean parte hartzeko --nafar gastronomia eta turismoa sustatuz, beraz-- eta aldi berean zenbait bilkura eta harreman burutzeko Estatu Batuetako alor ekonomikoko agenteekin eta administrazioarekin, partikularzki energia berriztagarrien alorrean, non Nafarroa lidergoan dabilen eta eredu izan daitekeen. Washinbtonen, Obama Administrazioko kargu altuekin bildu da Etxe Zurian ordezkaritza ostegunean. Sanz aurreko egunean heldua zen New Yorkeko JFK aireportura elurte handi baten erdian, hegaldi guztiak bertan behera utzi baino minutu batzuk lehenago.
2010/02/12
Otsailaren 6tik 14ra gauzatzen ari da Mendozako Nafar Etxean Nafar Dantzen 9. Ikastaroa. Urtero antolatzen den bilkura honetan, Txile eta Argentinako Nafar Etxeetako dantzariek hartzen dute parte, pauso berriak eta koreografiak ikasi eta hobetzeko. Aurten, etxe bakoitzeko 6 ordezkari bidaiatu dira Andeen magaleko hirira. Irakasleei dagokienez, Nafarroatik propio etorri dira ikastaroa ematera. Laurak Tuterako udal dantza taldean aritzen dira. Topaketa dantza erakustaldi batekin bukatuko da bihar larunbata. Gau hortako ikuskizunean dantzari guztiak pasatuko dira tauletatik. Ondoren, bisitariek eta Nafar Etxe anfitrioiko kideek afari bat partekatuko dute.
2010/02/11
Urtarrilaren 24an ospatu zen Necocheako Kolektibitateen Azokako azken eguna eta amaierarekin batera, jaiaren erregina hautatu zen ohi bezala. Tradizio handiko azokaren 28. edizio honetan, euskal etxeko ordezkaria zen Ayelen Hernandezek izan zuen erregina bilakatzeko ohorea. Printzesak, berriz, Italiako Elkartekoa eta arabiarren ordezkaria izan ziren. Herrialde ezberdinetako hamaika bat taldek hartu zuten parte aurtengo azokan eta beste ekintza batzuen artean bildutako publikoak --bertakoek eta baita turistek ere-- janari eta musika tipikoaz gozatzeko aukera izan zuen.
2010/02/11
Asel Luzarraga idazle euskalduna, abenduaren 31etik Temucoko (Txile) espetxean behin-behineko atxiloketaldian zegoena, atxiloketaldi hori etxean segi dezala onartu zuen atzo Temucoko Entzutegiak, idazle bermeotarra epailearen aurretik pasa ostean. Eraikin ofizial baten aurka eztanda egin ez zuen lehergailu bat jartzearekin zerikusia izateaz dago akusatua Luzarraga, maputxeen eskubideen aldeko burrukaren testuinguruan. Poliziaren ikerketa buru arte, hiru hilabeteko atxiloketaldia erabaki zuen urtarrilean epaileak, Temucoko espetxean, atzokoan atxiloketaldia etxean egin dezakeela deliberatu arte. Idazlearen egoera berriaren albistea berehala zabaldu zuten Luzarragaren alde ari den Asel Askatu plataformako lagunek.
2010/02/10
Joan den larunbatak aurpegi berezia azaldu zien Ellis Island-eko euskal erakusketaren inaugurazio ekitaldietara hurbildu zirenei. Gauzak ongi atera ziren eta, besteak beste, eguraldia ere portatu zen, elurtea, hotza eta ekaitza iragarrita baitzeuden, eta hala izan zuten Ellis Island eta Manhattan aldameneko herri eta barrutietan, euskal erakusketa zabaldu behar zen eremua errespetatuz, ordea. Beste leku batzuetan bi hildako utzi zituen ekaitzak, geruza txuri mehe bat baino ez zuen utzi bertan. Ferry-rako ilada osatzen zihoazen jendeen artean nabaria zen airean arnasten zen emozio puntua. Euren artean, dantzariz jantzitakoak zeuden, horretarako, dantza egiteko, propio AEBetako beste puntan dagoen Boisetik etorriak. Idaho, Kalifornia, Nevada, Wyoming... eta Quebec-ekorik ere bazen. Bidaia eta erakusketa Estatu Batuetako egungo euskal komunitatearen oinarria ezarri zuten euskal emigrante guztiei, eta egungo euskal komunitateari ere eginiko omenaldia bada.
2010/02/10
Txilen atxilotutako Asel Luzarraga euskal idazlea espetxetik Temucoko Entzutegira eramango dute berriro ere gaur asteazkenez. Euskal Herrian zein Argentinan eta Txilen ongi ezagutzen duten Diasporako lagunek, eta lagunek oro, garbi ikusten dute molestatu eta traba egiten zielako atxilotu dutela eta horregatik asmatu dituztela batere sinesgarriak ez diren Karguak. Luzarraga aska dezaten indarrean dagoen kanpainako parte, Laura Mintegi idazleak honako iritzi artikulua idatzi eta zabaldu du, 'Asel Luzarraga edo hitzaren arriskua' titulupean, Asel Aske-Asel Libre ekimeneko parte.2010/02/09
New York, 1913tik bere baitan euskal etxe bat daukan hiria --Estatu Batuetako euskal etxerik zaharrena da New Yorkeko Eusko Etxea-- euskal ekitaldi ezohiko baten lekuko izan da joan den asteburuan, berau gauzatu eta ospatzeko AEBetako Eki zein Mendebaldeko eta Europako euskaldunak ere bertara bildurik. 1892tik 1954ra bitartean Europatik etorritako 12 milioi immigranteren sarreragune eta galbahe izan zen Ellis Island, gaur egun turisten bisitaleku bihurtua, euskaldunei buruzko erakusketa adierazgarri eta esanguratsu baten egoitza bilakatu da. Larunbatean inauguratua, hiru hilabetez egongo da bertan, eta 300 mila bisitari espero zaizkio. Ellis Island pasabide gisa indarrean egon zen bitartean, euskaldunak jantzitakoa ondasun bakartzat heltzen ziren etorkizun bila AEBetara. Iragan asteburuan, euren ondorengo euskal-amerikarren omena jaso dute, bat eginik Euskal Herriko euskaldunekin. Itsasoz bi aldeetako euskaldunek bat egin dute euren historia eta nortasun propioa aldarrikatu eta --italiarrek, irlandarrek, poloniarrek edo armeriarrek bezala-- gainerako amerikarrekin partekatu nahi izaterakoan.
2010/02/09
Joan den ekainaren 21ean jaio zen, Buenos Aires probintziako San Miguel hirian, Askatasunaren Bidea, "euskal kultura zabaltzea eta bide aske batetik ibiltzea helburua duen elkarte euskal argentinarra". Instituzioaren ibilbidea oraindik laburra den arren, lanean daraman urte erdi honetan jende anitz bildu ditu egindako ekitaldietan. Orain, urte berriari begira, beste proposamen batez plazaratu dira elkartearen sortzaileak. Instituzioaren aktibitateak eta baita Euskal Herriko hainbat kultur gai ere blog bat medio zabalduko ditu erakunde gazteak. Blog-a Santa Ageda Bezperan jarri da sarean eta dagoeneko bisitari asko eta laguntzaile euskaldunak ditu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
