euskal diaspora eta kultura
2010/04/28
Hirugarren ediziora iritsiko da ostegun honetan Rio Cuarton Euskal Zine Erakustaldia, bertako Gure Ametza (sic) Euskal Etxeak eta Rio Cuartoko Unibertsitate Nazionaleko Komunikazio Zientzietako Departamentuak elkarrekin antolatzen duten ekimena. Aurtengoan zortzi dira erakutsiko diren laburmetraiak, 2009ko Kimuak-eko uztakoak eta, programa honetan ohi bezala, dagoeneko mundu osoko hamaika zinemalditan sari ugari lortutakoak. Emanaldia bihar osteguna izango da, Rio Cuartoko Teatrino de la Trapalandan, iluntzeko bederatzietan.
2010/04/28
'Bonbardaketaren 73. urteurrenean, bihotza oraindik ere Gernikan' leloarekin gogoratu zuen FEVAk euskal egutegian marka gorria duen data hau Juan de Garay Fundazioarekin partekatzen duen Buenos Airesko Liburu Azokako stand-ean. Gernikarekiko oroitzapena igandean gauzatu zen, urteurrenaren bezperan, dantza eta musika erakustaldi batekin. Azoka maiatzaren 10era arte luzatuko da eta epe honetan euskal gaiei buruzko liburu zerrendatxo bat aurkeztuko da, tartean Juan de Garay Fundazioak argitaratutako “Juan de Garay, el Primer Urbanista del Río de la Plata”, “Don Pedro y Don Juan: Mendoza y Garay", “Humor Vasco”eta “2009 eta 2010ko Udako Euskal Unibertsitateko idazlanak”. Euskal standean kontsulta eta eros daitezkeen liburuak daude: besteak beste, Ekin Euskal Argitaletxekoak. Formakuntza arloan, Jose Franzisko Zinkunegi irakasleak mintzaldi bat eskainiko du heldu den astean Hizkuntza-Irakaskuntzaren XIII. Zikloan.
2010/04/27
Euskal-argentinar historian aditua den Mikel Ezkerroren hitzaldi batek abiatu zituen joan den asteazkenean Buenos Airesen, hiriburu argentinarreko Iparraldeko Euskal Etxearen 115. urteurreneko ekitaldiei. Ezkerro XIX. mende hondarreko Iparraldeko giroa aipatzetik hasi zen, bertatik Argentinara immigratzeko arrazoiak eta zergatiak aipatzeko, eta beraz 1895ean ofizialki Centro Vasco Frances izena hartu zuen erakundearen sorrera ekarriko zuten zioetako batzuk gogoratzeko. Aipatu zuen ibilbidea elkartearen egungo Kultura Azpibatzordearen lana zinez laudatuz bukatu zuen, azken urteotan euskal kultura biziberritzen eta erakundeari kultur bizitasuna ekartzen eta bizkortzen egiten ari den ahalegin etengabea aitortuz eta eskertuz. Datozen egunetan baieztatuko da 115. urteurrena ospatzeko gainerako ekimenen data, tartean ohiko senidetasun afariarena.
2010/04/26
Apirilaren 26a da gaur. Gaurko egun batez, duela 73 urte, Alemaniako gerla hegazkinek Gernikako hiria bonbardatu eta suntsitu zuten, Franco generalaren eta bere aliatuen mespretxua erakutsiz defensa gabeko hiri eta populazio baten kontra, eta gogor erasotu nahian Euskal Herriaren eta euskaldunen sinboloa den Gernikako hiri eta populuari. Data, urtero gogoratzen dute munduan zehar barreiatutako hainbat euskal etxek, izan ere euren egutegian gorriz markatutako data berezia baita. Artikulu honetan karia honetara egin diren deialdi eta ekimenetako pare bat soilik ez dugu aipatuko.
2010/04/26
Bogotako Euskal Etxeak azken asteotan garatu dituen ekimenei buruzko albiste sorta bat hasiko dugu gaurko artikulu honekin. Gaurkoa bezalako data batean, Apirilaren 26an, Gernika bonbardatu zuten 73. urteurren egunean, izan ere Gernikako alkate Jose Maria Gorroñok joan den martxoaren 26an Kolonbiara egin zuen bidaia ekarriko dugu hona. Gorroñok, besteak beste, bertako Gernika Parkea bisitatu zuen, Tesauquilloko tokiko alkateak dekorazio bat ipini zion, eta plaka bat ezarri zuen Quinta de Bolivar deitua den lekuan hazten ari den Gernikako Arbolaren kimuaren ondoan.
2010/04/26
Miriam Isasi (Gasteiz, 1981) eta Unai Requejo (Santzurtzi, 1982), 'Goazen Txinara' izeneko ekimeneko bigarren edizioko partaide diren bi euskal artista gazteek erakusketa zabaldu zuten atzo Pekinen. Zabaldu eta itxi, egun bakarreko erakusketa eta elkarretaratzea izan baitzen Judas Arrieta komikilari eta artista hondarribitarrak Pekinen sortu zuen eta kudeatzen duen aipatu ekimeneko egoitzan gauzatu zena. EHUko Arte Ederretako Fakultateak eta Eusko Jaurlaritzak urtero ematen duten bekako aurtengo bi irabazleak dira Isasi eta Requejo, helburu zehatza duen beka: euskal artista gazteak bi hilabetez Pekinen bizitzen jarri eta hango eta hemengo kultura eta moldeak elkarrekin harremanetan ipintzea, hortik gauza interesgarriak atera daitezkeelakoan.
2010/04/23
Elkarteko Araudiak dioenari jarraiki, San Juango Eusko Etxeak, Argentinako izen bereko Andeen magaleko probintzian, bere Ohiko Batzar Nagusia egin zuen joan den asteburuan, iazko Txostena eta Balantzea onartuz eta Zuzendari Batzordea berritzeko hauteskundeak eginez, azken hauetan berrautatu zelarik lehendakari Esteban Marticorena. Honekin batera arituko dira Paulo Landa, lehendakariorde; Cristina Ripoll, idazkari; eta Teresita Dubon, diruzain, beste zenbait bazordekide hautatuen artean.
2010/04/23
15 urte bete ditu aurten Ibai Ondoko Etxea Euskal Etxeak eta data berezi hau ospatzeko Buenos Airesko Euskaltzaleak eta Eusko Kultur Etxea erakundeen kultur ordezkari den Ekin Dantza Taldea gonbidatu zuen bere jaian parte hartzeko. Joan den asteburuan, ostiralez, apirilaren 17an, urteurrenaren bezperan, Uama Antzokian aurkeztu ziren dantzariak, Carmeloko dantzariekin batera. Aitor Alavaren gidaritzapean bi taldeak ibilkbide bat egin zuten euren koreografiekin Euskal Herriko dantzetatik. Dantzaldian, euskal etxe anfitrioiko kideek bideo instituzionala proiektatu eta erakundeko bi lehendakari ohiri, Julio Ariztia eta Mirta Isocori, omenaldia egin zieten. 200 bat lagun bertaratu ziren antzokira urtebetetzearen karietara antolatutako ez ohiko ikuskizunaz gozatzeko.
2010/04/23
Aberri Eguneko ospakizunen testuinguruan, Rio Cuartoko Gure Ametza-ko (sic) kideek omenaldia egin zioten etxeko sortzaileetako eta erakundeko lehenengo lehendakaria zen Imanol Bilbaori. Ekintza hau azkena izan zen aktibitate handiko hilabete batean Cordoba probintziako euskal etxe honetan. Izan ere martxoan zehar eta Gazteria Arloak antolatuta, politikari buruzko zine zikloa gauzatu zen Gure Ametza-ko egoitzan. Euskal baserrien eta musika tresnen argazki-erakusketa ibiltaria ere egon zen ikusgai euskal etxean, eta 150 lagun hurbildu ziren bai dokumentalak bai argazkiak ikustera.
2010/04/22
Joan den larunbatean, apirilaren 17an, FEVAko Zuzendaritza Batzordeak egin zuen bileran hartutako akordioen artean, Misiones probintziako bi euskal etxeak, Posadasko 'Euskal Jatorri' eta 'Eusko Etxea', bazkide galdegile edo 'postulante' izatetik 'bazkide oso' izatera pasatzea aipa daiteke, Federazioaren barne araudiak horretarako markatzen dituen epeak eta baldintzak beteta. Ondorioz, beraz, bi elkarteok FEVAko eskubide osoko kide bilakatzen dira, esan nahi baita mintzatzeko eskubideari, bozkatzekoa emendatzen diote. Erabaki hau FEVAko lehendakari Ricardo Basterrak eta diruzain Hugo Andiazabalek bi euskal etxeotara egindako bidairen ondotik gertatu da, Corpusen zein Posadasen bertako buruzagi eta kideekin bildu zirelarik, euren egoitzak eta planak in situ ezaguturik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
