euskal diaspora eta kultura
2010/05/07
Txileko Santiagoko Euzko Etxeak otsaileko lurrikara azkarrak kaltetutako Pintue herriskako biztanleei laguntzeko alkartasun kanpaina bati ekin dio, Aculeo laku ondoan, Paineko udalean kokatzen den auzo honetako eliza berreraiki edo konpontzeko, "berau baita bertakoek komunitate bizitza egiten duten lekua". Hiriburu txiletarreko euskal etxekoen esanetan, "ekimen hau eta leku hau hautatu ditugu geure hondar alea ipintzeko, dardarak gogor kaltetutako aldea izan arren, epizentroko tokietatik urrun delako egunkariak ez baitira hona iritsi eta ohargabean pasatu zaizkio komunitateari bertakoek jasan dituzten kalte eta galera handiak". Laguntza helburu honekin, Euskal Abesbatza eta EEko Dantza Taldekoek emanaldia eskainiko dute Maiatzaren 21an Pintueko Eskolan. Bertaratzeko gonbidapena luzatu diote publiko euskaldun eta ez-euskaldunari, eta baliabideak biltzeko asmo berarekin zabaldu dituzten kontu korronteetara diru emaitzak egiteko.
2010/05/07
Astigarragan kantatzen arituko balira bezala sentitu omen ziren Maialen Lujanbio eta Jon Maia bertsolariak joan den larunbatean, Maiatzaren Lehenean, Belfast-en, 'BertsoDinner' izenpean hirugarren edizioa bete zuen ekitaldian, Irlanda Iparraldeko hiri nagusiko euskal talde batek antolatutako egunpasa eta bertso-saioan. Partaideak Irlandako zenbait aldetatik, Eskoziatik eta Euskal Herritik --Biarritzetik bertara dagoen 'low cost' hegaldi batez-- iritsiak ziren, Langileen Eguneko asteburu berezi bat ospatzera, eta gustura atera ziren, Belfast hiria gida bereziez ezagutzeaz gain, Guinessa eta bestelako garagardoei buruz jakitatea aberasturik, euskal-irlandar giro berezi eta oso animatuko afari eta saioa bizi izan baitzuten, gaua ondoko dantzaleku batean amaitzeko. Bertaratutako asko datorren urterako planak egiten hasiak dira, festa honen laugarren edizioari begira.
2010/05/07
Joan den asteazkenean, maiatzaren 5ean, HABEko Euskara Munduan programaren arduraduna den Jose Franzisko Zinkunegi irakasleak hitzaldi bat eman zuen Buenos Airesko Liburu Azokako Hizkuntz Irakaskuntzaren Zikloan. “Hizkuntza ikasi eta irakatsi. Euskararekin on-line egindako esperientzia” izeneko mintzaldiaren bidez, Zinkunegik azaldu zion bildutako jendeari zein den euskararen gaur egungo egoera, zer-nolako hizkuntza politikak bultzatzen diren Euskadin, eta Argentinan Euskaraz programaren garapena. Mintzaldiaz gain, euskarari buruzko posterra ere egon da ikusgai azokan. 'Urtero hartzen dugu parte ziklo honetan arlo berrietan sartzeko asmoarekin', azaldu diote FEVAko arduradunek EuskalKultura.com-i. 'Euskaren status-a birbaliotzea, eta beste hizkuntza batzuekin harremanak sendotzea dugu helburu', aitortu dute Federazioko ordezkariek.
2010/05/06
Bisita egin zuen atzo Rio Gallegos, Santa Cruz Patagoniako probintzia argentinarreko hiriburura, Elvira Kortajarena Eusko Jaurlaritzako Argentina, Brasil, Paraguai eta Uruguairako Ordezkariak. Cesar Arizmendi Rio Gallegoseko 'Hegoalde Argentinarra' Euskal Etxeko lehendakariak eta euskal etxeko buruzagiek errezibitu zuten, ondoren, haien eskutik, Probintziako gobernadoreorde Luis Hernan Martinez Crespo bisitatzeko Diputatuen Ganberan --gobernadoreordea baita Argentinan probintzietako Diputatu Ganberetako presidentea-- eta arratsaldez, berriz, Rio Gallegos hiriko intendente edo alkatea, Hector Roquet.
2010/05/06
Euskal Herrian daude dagoeneko, atzo gonbidatu iritsita, bertsolari handiaren bi biloba, Mexikotik etorria Amelia Otaño eta Argentinatik, Susana Ardanaz Otaño, 'Txuri' ingurukoentzat. Euren aitona hil zela 100 urte betetzen diren eguna Zizurkil haren jaioterrian egingo den ekitaldian parte hartuz pasatuko dute. Izan ere, Zizurkilgo Udalak, bihar egingo duen osoko bilkura berezian, 'Herriko Seme Kuttun' izendatuko du bertsolaria, ondoren Omenaldia egingo zaio Herriko Plazan, mendeurrenaren plaka desestaliz, eta herri-afaria egingo da segidan pilotalekuan, Jexux Mari Irazu eta Sebastian Lizaso partaide, eta euskal diasporako zein Euskal Herriko bertsolari gogoangarri aparta izan zenaren bizitza eta bertsogintza kontatu eta kantatuko du Eñaut Agirrek ordubeteko saioan. Ekitaldiek, maiatzean eta ekainean zehar segituko dute, Euskal Herrian lehenik, baina Argentinan ondoren (ikus egitaraua). Aurretik, gaur arratsaldean, 'Pello Mari Otañoren arnasa' liburua aurkeztuko da Zizurkilgo Atxulondoko Kultur Etxean.
2010/05/06
Hegoamerikako euskal Diaspora ez da ahazten. Ez da ahazten eta euren komunitateetan duten eragina baliatuz, gizarte osoak gogoan atxiki dezan lan handia egiten dute euskal etxeetako kideek. Hori dela eta, urtero, salbuespenik gabe, 1937an Gernikan gertatutako sarraskia oroitzen eta salatzen dute euren baitan zein komunitateari begira antolatutako ekitaldietan. Chascomus, Mar del Plata eta Rosarioko ospakizunak fenomeno honen adibide ezin hobeak dira, hiru hirietan Gernikako Arbolaren kimua landatuta dagoen enparantzetan egin baitziren omenaldiak. Rio de la Plata ibaiaren beste aldean ere gogoratu zuten 1937ko apirilaren 26 hura. Montevideon, esaterako, eta Saltoko euskal etxeko kideek ere aipamen berezi bat jarri zuten euren blogean.
2010/05/05
Helena Taberna zinegile nafarra Buenos Airesera heldu da aste honetan, bere obrari buruzko atzerabegirakoa egingo baita hirian ostiral eta larunbatean, eta datorren astean zine mintegi batean hartuko baitu parte, 'zuzendari lana fikzioan' eta 'zuzendari lana dokumentaletan' izenburupean. Tabernari buruzko atzerabegirakoak bere tituluetako lau eskainiko ditu, hala nola ostiralean 'Yoyes' (2000) eta 'Extranjeras' (2003), larunbatean 'Nerabe' (1995) laburrarekineta 'La buena nueva'rekin (2008) segitzeko. Zuzendari altsasuarra Mujeres en foco izeneko ekimenak eta Buenos Airesko Espainiako Kultura Zentroak ekarrita iritsi da hiriburu argentinarrera, bertako Emakumearen eta Genero Berdintasunaren aldeko Lehenengo Nazioarteko Jaialdiaren eskutik.
2010/05/05
Eusko Jaurlaritzak atzoko buletinean (EHAAn) eman zuen argitara Euskal Etxeentzako 2010eko dirulaguntza deialdia. Orotara 1.429.395 euro banatuko dira munduko euskal etxeen eta euren federazio eta konfederazioen artean, horietarik milioi bat ohiko gastu eta jardueretarako (IV. kapitulua) eta gainerakoa azpiegitura eta ekipamendurako (VII. kapitulua). Jardueren atalean, arreta bereziz lagunduko dira gazteria, emakumea, kanpo irudia eta komunikazioa, eta memoria historikoaren berreskurapena aintzat hartzen dituzten egitasmoak, gehienez har dezaketen ekarpena 65.000 eurokoa izango delarik, eta gutxienez 300 eurokoa. Eskabideak aurkezteko epea 2010eko ekainaren 4ean amaituko da.
2010/05/05
Ekimenez betetako egitaraua proposatzen du Saladilloko Itxaropen Euskal Etxeak datozen hilabeterako. Hasteko, 300 bono kaleratuko ditu erakundearen egoitzako balio anitzeko aretoko lanak bukatu ahal izateko. Bonoak erosten dituzten partaideek Euskal Herrira bidaiatzeko bi pertsonentzako sari baten zozketan parte hartzeko aukera edukiko dute. Horrez gain, hil honetan sukalde tradizionaleko 'buseca' platera prestatuko dute euskal etxeko kideek, eta "Inmigrantes y criollos en el Bicentenario" izeneko liburua aurkeztuko da Bartolome Mitre Liburutegian. Uztailean, berriz, erakundearen 12. urtemuga ospatuko dute eta irailean Argentinako Immigrazioaren Museo Nazionaleko erakusketa ibiltaria jasoko dute, komunitateak Argentinara heldu ziren etorkinen istorioak ezagut ditzan.
2010/05/04
Kaliforniako Bakersfield-en bildu dira Ameriketako eta Euskal Herriko Etxamendi haurrideak, Ezterenzubi Mendiburukoak. "Denbora nola daien! Aspaldiko ixtoria dela iduri luke Ezterenzubi Mendiburuko familiatik lehenbiziko haurra edo gaztea Ameriketarat juan zela. 1949 agorrilaren 24 zen Manez anaia zaharrena etxetik abiatu zela delako Amerika hartarat buruz eta gaur gibelerat begiratu eta iduritzen zaut berrikiko gertakari bat dela; urteak juaiten dira ohartu gabe! Urteak joan eta urteak jin Mendiburuko familiatik bost haurride joan ziren Ameriketarat, azkena 1961 buruilean eta geroztik denak han bizi dira". Honela hasten da Arizonatik Martin Etxamendik Herria astekariaren azkeneko alean idatzi digun kronika, haurrideak ameriketaratu zirela 60 urte baino gehiago joan direnean, Euskal Herrian gelditu zen Eñaut anaiaren urrezko ezteien estakuruan bizirik diren sei anai-arrebok Ameriketan bildurik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
