euskal diaspora eta kultura
2008/04/22
Kolonbiako Kultura ministroa, Paula Marcela Moreno, Euskal Herrian izan da egunotan eta Eusko Jaurlaritzarekin lankidetza akordioa sinatu du bere herriko hizkuntza indigenen garapen eta sustapena bultzatu asmoz. Kolonbian kreolera, romanesera eta hainbat etnia indigenen hizkuntzak ofizialak dira, bakoitza bere eremuan, eta bertako gobernuak Eusko Jaurlaritzak euskararekin egindako lana eredu hartu nahi du sustapen prozesu honi ekiteko.
2008/04/22
Montevideoko Sala Zitarrosa Antzokia txiki gelditu zen euskal bertsolari eta payadore latinamerikarren arteko saio bikaina ikusteko bildu zirenen guztiak hartzeko joan den martxoaren 29an. Euskaldunen aldetik Maialen Lujanbio, Xabi Paia eta Fredi Paya zeuden, Argentinatik Wilson Saliwonczyk; Brasiletik Paulo de Freitas Mendonça eta Uruguaitik Walter Apesetche eta Gabriel Luceno. Inprobisazio eskola desberdinen arteko konexioak giro ederra sortu zuen eta ekitaldiak hizkuntzak eta mugak gainditu dituen nazioarteko birari bukaera borobila eman zion.
2008/04/22
Joseba Azkarraga Eusko Jaurlaritzako Justizia, Lan eta Gizarte Segurantza sailburuak zenbait hitzaldi, mintegi eta bileratan partaide izan da edo eskaini ditu Argentina, Bolivia eta Perura burutu berria duen bost eguneko bidaia ofizialean. Hitzaldietan, 'Euskal gatazka eta Nazio Estatu harremana' (La Platan, Argentina) edo 'Autonomia: eredu juridiko politiko ekonomikoaren azterketa' (Santa Cruzen, Bolivia) izenekoak eta Cuscoko (Peru) mandatariekin edukitako bilerak nabarmendu dira hiru lurralde horietan garatu dituen jardunaldietan. Sailburua, 'Bisitari Ospetsu' izendatu zuten La Platako Unibertsitate Nazioanlean (UNLP) eta 'Ohorezko Bisitari' Cuscoko Unibertsitate Andinoan.
2008/04/22
Elkartea bera sortu zeneko urteurren berri bat ospatzeko antolatutako egitarauaren baitan, Paraná-ko Urrundik Euskal Etxeak, Entre Ríos probintzia argentinarrean, esku pilota txapelketa bat eratu du datorren astebururako, trinkete modalitatean. Txapelketara Argentinako zenbait probintzietako pilotariak bilduko dira eta ekitaldiak larunbatez zein igandez garatuko dira, apirilaren 26 eta 27an, adierazi dute Urrundik-etik.
2008/04/21
Etzi hasiko da Literaldia 08, kataluniarrentzat hitzordu garrantzitsua den Sant Jordirekin (Kataluniako patroia eta Liburuaren Eguna). Aurten ere Euskal Etxeak ahalegin polita egin du euskal literaturak bere lekua izan dezan, hilabete oso bat iraungo duen Literaldia 08 jaialdia antolatuz. Harkaitz Cano, Koldo Izagirre eta Joseba Tapia, Iñigo Aranbarri eta Beñat Sarasola, besteak beste, bartzelonaratuko dira, Euskal Etxeak gonbidaturik, euren lanen bidez egungo Euskal Herriaren egoera aztertzeko.
2008/04/21
Mendozako euskal komunitatea, Argentinan, hondarreko ukitua ari zaio ematen datorren asteburuan --apirilaren 26 eta 27an-- Gernika suntsitu zuteneko 71. urteurrena gogoan atxikitzeko antolatutako egitarauari. Horren baitan, Denak Bat Euskal Etxeko kideek 'Bakearen Haritzak' izenaz bataiatu duten Euskal Zelaia inauguratuko dute hiriko garrantzitsuena den Independentzia Plazan. EEren egoitzan moldatu duten hostel edo taldeentzako aterpetxea ere inauguratuko dute eta tartean dokumental bat emango, pilota partidak jokatuko eta EEko Mendigoizaleak Dantzari Taldearen emanaldi bat eskainiko dituzte.
2008/04/21
Chacabuco hiri argentinarreko Guillermo Larregui Euskal Etxea pozik agertu da hilabete hasieran inauguratu zuen 'Euskal Zine Kultural mintegia'ren lehen saioetan lortutako erantzunarekin. Maricel Pelegrin antropologo eta dokumentalistaren gidapean, euskal etxeko egoitzan bildutako lagunek 'etnogenesi --nazioen edo arrazen jatorria-- garaikidearen mugimenduak aztertuz' hasi zituzten ekitaldiak. Igandero eskaintzen diren saiook ekaineko azkeneko astebururaino luzatuko dira Chacabucon.
2008/04/19
Erbesteko euskal kulturaren azterketa eta lanen berreskurapena sustatzen du Hamaika Bide Elkarteak eta helburu horrekin iragan urtean webgunea ipini zutem martxan. Ordutik hona elkartea atalak berritzen eta ikerketa berriak sareratzen ari da etengabe. Oraingoan, besteak beste, Aurora Arnaiz Amigo idazle euskal mexikarrak 1992an eman zuen Transterrados mintzaldia sareratu du, eta baita ere Mikel Rodriguez historialariaren Los falsificadores del PCE artikulua. Alderdi Komunistan aritu ziren faltsutzaile asko euskaldunak izan ziren, Rodriguezen artikuluak azaltzen duenez.
2008/04/19
General Rodriguezeko 'Eusko Aterpea' Euskal Etxeak Aberri Eguna ospatu zuen iragan apirilaren 6an Buenos Aires probintzian. Ospakizunean bildutako 130 partaideek Jubilatuen eta Pentsiodunen aretoa bete zuten eta euskal eta argentinar musiken, krioilo erre baten gozamen, joko eta zenbait zozketen artean, parte hartzaileek ekitaldiaz gozatu ahal izan zuten berandu arte. Ekintzan Lujan, Las Heras, Moreno, Marcos Paz eta Pilarreko delegazioak aritu ziren.
2008/04/18
New European Poets da europar poesia berriaren antologiaren izenburua eta egileak Kevin Prufer eta Wayne Millar literatur adituak izan dira. Liburua argitaratu berria da Estatu Batuetan, Graywolf Press argitaletxearen eskutik. Antologiak XX. mende bukaerako eta XXI. mende hasierako 270 idazle europarren lana jasotzen du, tartean Kirmen Uribe eta Bernardo Atxaga euskaldunak ere agertzen direlarik. Egileek azaldu dutenez 'egungo europar poesiari buruz ingelesez egiten den lehen antologia' da hau eta ingeles, frantses, espainiar edo errusiar tradizioko egileak biltzeaz gain euskaraz, gaelikoz edo sumi hizkuntzan idazten duten ahots berriei ere tartea egiten die.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
